Aita so e ye ala mingi:

So e ndoye Nzapa nga na azo apusu e ti ‘gue ti sara si azo na popo ti amara kue aga adisciple. E batize ala’. (Mat. 28:​19, 20; Marc 12:​28-31). Ndoye so ayeke pensé gï na nzoni ti azo ayeke ngangu mingi. Mara ti ndoye so apeut ti ndu bê ti azo so “ayeke nduru ti yeda na tënë ni ti wara fini ti lakue lakue”.—Kus. 13:48.

Ândö, e zia li ti e na ndö ti batango akode ti fango tënë na li nga ti zia ambeti na azo. Me ti fadeso, e bezoin ti gi ti maï kode ti sarango lisoro na azo. E ye ti fa so e ye azo na lege so e sara lisoro na ala na ndö ti atënë so agbu bê ti ala. So aye ti tene e yeke nduru ti changé atënë ti e alingbi na aye so asi nga ti gbu li nzoni na ndö ti ye so agbu bê ti zo oko oko. Tongana nyen la brochure so ayeke aidé e ti sara ni?

Brochure so ayeke na aye ti manda 12 so ayeke fa na e asarango ye so e bezoin ni, tongaso si e ndoye azo nga e sara adisciple. Na yâ ti ye ti manda oko oko, mo yeke wara mbeni mbaï ti Bible so afa tongana nyen la Jésus wala mbeni kozo Chrétien afa mbeni mbilimbili sarango ye na ngoi so lo yeke fa tënë. A sigi na brochure so ti aidé e ti bata akode ti fango tënë na li ape, me ti bâ tongana nyen la e peut ti fa so e ye azo. Atâa so e bezoin asarango ye so kue na yâ ti ambage kue ti fango tënë ti e, e yeke bâ tongana nyen la e bezoin ambeni mbilimbili sarango ye na ngoi so e yeke to nda ti lisoro na azo, e yeke sara vizite na ala nga e yeke manda Bible na ala.

Na ngoi so mo yeke bâ ye ti manda oko oko, gbu li nzoni ti bâ tongana nyen la mo peut ti fa sarango ye ni na ngoi so mo yeke sara lisoro na azo na ndo so mo yeke dä. Gi ti ndoye Jéhovah nga na azo mingi. Ndoye so, so ahon mbeni mbilimbili kode so e sara na kua, la ayeke aidé mo ti si na ye so mo ye, so ayeke ti sara adisciple.

E bâ na nene ni kota pasa so e yeke na ni ti sara kua maboko na maboko na mo (Soph. 3:9). Zia Jéhovah angbâ ti sara tufa mingi na ndö ti mo na ngoi so mo ngbâ ti ndoye azo nga ti sara adisciple.