Mbeni ye so alingbi ti mû vundu mingi na e ayeke tënë ti bingo mbeni fami wala kamarade ti e na gigi ti bungbi ndali ti so lo sara siokpari na lo changé bê ti lo pëpe. Sarango ye ti e alingbi na aye so Bible afa na ndö ti tënë so ayeke fa wala e ye Nzapa mingi nga e ye ti ngbâ be-ta-zo na aye so lo zia na sese na yâ ti bungbi. * Bâ ambeni hundango ndo so alondo ndali ti tënë so.

A lingbi e sara ye tongana nyen na mbage ti azo so a bi ala na gigi ti bungbi? Bible atene: “Ala zia ti sara songo na mbeni zo so a iri lo ita na so lo yeke zo ti sarango lango-sioni, wala zo ti sarango bê ti ye, wala zo ti vorongo ayanda, wala zo ti zongango ndo, wala ngbâa ti sämba, wala zo ti mungo ye ti zo na likisi, na même ti tene ala te kobe na mara ti zo tongaso pëpe.” (1 aCorinthien 5:11). Bible atene na ndö ti zo kue so “[a]ngbâ na yâ ti fango ye ti Christ pëpe,” atene: “Ala yamba lo na da ti ala pëpe na ala bara lo nga pëpe. Biani, zo so abara lo amû mbage na asioni kusala ti lo.” (2 Jean 9-11). E yeke na songo ti ita ti bungbi mbeni pëpe na azo so a bi ala na gigi ti bungbi wala e yeke na songo ti kamarade mbeni pëpe na ala. Tour ti Ba Ndo ti lango 15 ti décembre, ngu 1981, na lembeti 23, na Français, atene: “Gï tenengo ‘Bara mo’ na mbeni zo alingbi ti mû lege na e ti to nda ti sara lisoro na lo na même ti gue na e ti sara kamarade na lo. E yeke ye ande ti bara mbeni zo so bungbi abi lo na gigi?”

A hunda biani ti fâ yâ ti songo ni kue kue kue? En, a hunda ti sara tongaso ndali ti araison mingi. Kozoni kue, sarango tongaso afa so e yeke be-ta-zo na Nzapa nga na Bible. E yeke mä yanga ti Jéhovah gï pëpe na ngoi so ye ni anzere na e, me nga na ngoi so sarango tongaso ayeke ngangu. Ndoye ti e ndali ti Jéhovah apusu e ti bata acommandement ti lo kue, ndali ti so e hinga so lo yeke Nzapa ti mbilimbili na ti ndoye nga andia ti lo ayeke sara nzoni mingi na e (Ésaïe 48:17; 1 Jean 5:3). Use ni, ti fâ yâ ti songo na zo so a bi lo na gigi ti bungbi ayeke bata e nga na tanga ti aita ti  congrégation ni si lo buba songo ti e na Jéhovah pëpe nga lo buba nzoni sarango ye ti e pëpe; a yeke sara nga si nzoni iri ti congrégation abuba pëpe (1 aCorinthien 5:6, 7). Ota ni, so e ngbâ gï na ndö ti amama-ndia ti Bible alingbi même ti sara nzoni na zo so a bi lo na gigi so. Tongana e fa so e yeda na desizion so komite ni amû, e lingbi ti sara si wasiokpari ni, so ade ayeda pëpe na ye kue so a-ancien asara ti mû maboko na lo, agbu li ti lo. So wasiokpari ni ayeke na songo ti kamarade mbeni pëpe na azo so lo ye ala mingi alingbi ti sara si “li ti lo aga dä” na lo bâ so sioni so lo sara ayeke kota mingi, na lo gi lege ti kiri na mbage ti Jéhovah.—Luc 15:17.

Ka tongana a yeke mbeni fami ti mo la a bi lo na gigi? Tongana ye tongaso asi, kpengba songo so ayeke na popo ti azo ti sewa alingbi ti duti mbeni tara ndali ti zo so aye ti duti be-ta-zo na Jéhovah. A lingbi e sara ye tongana nyen na mbage ti mbeni fami ti e so a bi lo na gigi ti bungbi? Na yâ ti mbeti so, e lingbi pëpe ti fa aye kue so alingbi ti si, me zia e bâ gï ambeni use.

Ti ambeni sewa, fami ni so a bi lo na gigi so angbâ ti lango da oko na ala. Bingo lo na gigi ti bungbi afâ yâ ti songo ti fami ni pëpe; tongaso, ala yeke ngbâ ti sara akua ti da legeoko nga ti sara lisoro. Me, na lege ti ye so lo sara, lo fâ yâ ti songo so abungbi lo ândö na tanga ti sewa ni na yâ ti kua ti Nzapa. Tongaso, tanga ti amembre ti sewa

ni so angbâ na bungbi alingbi mbeni pëpe ti sara beoko na lo na kua ti Nzapa. Na tapande, lo lingbi pëpe ti sara tënë na ngoi so sewa ni ayeke voro Nzapa na yâ ti sewa, atâa so lo lingbi ti duti dä. Ye oko, tongana zo ni so a bi lo na gigi ti bungbi ade kete, a yeke ti babâ na mama ti lo ti ngbâ ti fa ye na lo nga ti fa lege na lo. Ni la, babâ na mama so asara ye na ndoye alingbi ti leke kapa ti manda Bible na molenge ni. *—aProverbe 6:20-22; 29:17.

Ti ambeni sewa ni, lo so a bi lo na gigi so alango da oko na ala pëpe. Atâa so ngoi na ngoi a lingbi ti si so ala sara tënë na lo ndali ti ambeni kota ye so andu sewa ni, a lingbi a duti lakue lakue pëpe. Aita so ayeke be-ta-zo na Jéhovah ayeke gi pëpe araison ti ngbâ ti  sara songo na fami ti ala so a bi lo na gigi na so ala na lo alango da oko pëpe. Ahon ti gi araison, dutingo ti ala be-ta-zo na Jéhovah nga na bungbi ti lo ayeke pusu ala ti yeda na ye so Bible ahunda ti sara na mbage ti zo so a bi lo na gigi ti bungbi. Dutingo ti ala be-ta-zo afa so ala ye nzoni ti lo so a bi lo na gigi so, na peut-être a lingbi ti mû maboko na lo ti bâ nzoni na lege ti gbotongo mê so lo wara. *—aHébreu 12:11.