Mênë ayeke kota ye mingi. Sân ni, zo apeut ti ngbâ na fini ape. So Nzapa la acréé e, lo yeke na droit ti fa na e tongana nyen la e peut ti sara kua na mênë. Lo tene nyen na ndö ti mênë? A peut ti te ni wala ti zia ni na terê ti zo? Tongana nyen la mo peut ti mû anzoni desizion na ndö ti tënë so?

1. Bango ndo ti Jéhovah na ndö ti mênë ayeke so wa?

Jéhovah atene na awakua ti lo ti ândö, atene: “Fini ti ye kue so ayeke na nyama ti terê ayeke mênë ti lo.” (Lévitique 17:14). Na lê ti Jéhovah, mênë ayeke fini. So fini ayeke mbeni cadeau so ayeke nzoni-kue so alondo na Nzapa, mênë nga kue ayeke nzoni-kue.

2. Nyen la Nzapa ake ti tene a sara na mênë?

Jéhovah amû yanga lani na awakua ti lo ti ândö ti te mênë ape. (Diko Genèse 9:4 nga Lévitique 17:10.) Lo fa so tënë so angbâ na ngangu na ngoi so bebungbi amû yanga lani na aChrétien ti “gbanzi terê ti ala . . . na mênë”.​—Diko Kusala 15:28, 29.

Ti gbanzi terê na mênë aye ti tene nyen? Tongana docteur atene na mo ti gbanzi terê ti mo na sämba, mo yeke nyon ni ape. Me eskê mo yeke te kobe so sämba ayeke na yâ ni wala mo yeke yeda si a zia ni tongana sérum na terê ti mo? Ên-ën. Legeoko nga, yanga so Nzapa amû na e ti gbanzi terê ti e na mênë aye ti tene e nyon mênë ape wala e te pëpe nyama so mênë ni angbâ dä. Nga, e yeke te pëpe mbeni kobe so a zia mênë dä.

Ka tongana a sara kua na ni ti soigné zo? Ambeni kode ni ague tâ nde na ndia ti Nzapa. Na tapande, mungo mênë kue wala mbeni kota mbage ti mênë tongana bengba globule, vuru globule, plaquette na plasma. Ti ambeni kode ni, na bango ni, a gue nde na ndia ti Nzapa ape. Na tapande, ambeni kode ni ahunda ti sara kua na akete kete mbage ti mênë so a mû ni na yâ ti mbeni oko ti akota mbage ti mênë. Ti ambeni kode ni, a hunda ti sara kua na mênë ti zo wani. A yeke na zo oko oko ti mû desizion na ndö ti kode wa la lo peut ti yeda na ni. a—aGalate 6:5.

 GI TI HINGA AYE MINGI

3. Soro akode ti kaïngo na kobela so azia ngia na bê ti Jéhovah

Tongana nyen la mo peut ti mû adesizion so ague oko na bango ndo ti Nzapa? Zia VIDÉO ni, na pekoni bâ ndani so a yeke kota ye ti sara ye alingbi na aye so ayeke na gbe ni ge.

• Sambela ti wara ndara.—Jacques 1:5.

• Gi amama-ndia ti Bible na bâ tongana nyen ti sara ye alingbi na ni.—aProverbe 13:16.

• Bâ akode wa la a yeke sara kua na ni na ndo so mo yeke dä.

• Bâ akode wa la mo peut ti yeda na ni ape.

• Sara kue ti tene desizion so mo mû asara si mo duti na nzoni conscience.—Kusala 24:16. b

• Hinga so mbeni zo la adoit ti tene na mo ape desizion wa la mo yeke mû na ndö ti atënë so abâ conscience ti zo, atâa a yeke koli wala wali ti mo, mbeni ancien wala zo so ayeke manda Bible na mo.—aRomain 14:12.

• Sû desizion so mo mû na mbeti.

4. A-Témoin ti Jéhovah ayeke gi anzoni kode ti soigné terê ti ala

Zo apeut ti sara ye alingbi na ndia ti Nzapa nga ti soigné terê ti lo nzoni sân mênë. Zia VIDÉO ni.

Diko Tite 3:2, na pekoni kiri tënë na hunda so:

• Ngbanga ti nyen la a yeke lakue nzoni ti ne adocteur na ngoi so e yeke sara lisoro na ala?

 5. Ka ti akete kete mbage ti mênë?

Mênë ayeke na akota mbage osio: bengba globule, vuru globule, plaquette nga na plasma. Gbâ ti akete kete mbage, so a iri ni akete kete mbage ti mênë, ayeke na yâ ti akota mbage ni so. c A zia ambeni kete kete mbage ti mênë na yâ ti yorö ti soigné na kobela wala ti kanga lege si mênë ayuru mingi ape.

Tongana a yeke tënë ti akete kete mbage ti mênë, a yeke na Chrétien oko oko ti mû desizion lo wani alingbi na conscience ti lo so Bible afa lege na ni. Ambeni Chrétien apeut ti ke akete kete mbage ti mênë na ngoi ti mbeni kode ti kaïngo na kobela wala na ngoi ti mbeni examen. Ti ambeni, conscience ti ala amû lege na ala ti yeda na ni.

Gbu li ti mo na ndö ti hunda so na ngoi so mo yeke mû adesizion:

• Tongana nyen la mbi yeke fa na mbeni docteur ndani so mbi ke wala mbi yeda na ambeni kete kete mbage ti mênë na ngoi so a yeke soigné mbi?

 NA NDURU TËNË

Jéhovah aye ti tene e sara kua na mênë kirikiri ape.

Dango bê

• Ngbanga ti nyen la Jéhovah abâ mênë tongana ye so ayeke nzoni-kue?

• E hinga tongana nyen so yanga so Nzapa amû ti gbanzi terê ti e na mênë andu mungo mênë?

• Tongana nyen la mo peut ti mû anzoni desizion na ndö ti tënë ti sarango kua na mênë ti kaï na kobela?