LANGO so mo yeke gue na kua pëpe la. Mo yeke leke tere ti mo ti sigigi na fango tënë. Mo gi bê ti mo kete ndali ti so mo fatigué. Ndapre ni so akpa mbeni nzoni ngoi ti wu tere. Me mo sambela, na mo mû desizion ti sigigi. Mo sara kua na tere ti mbeni ita-wali mbakoro so aninga na yâ ti kua ni, na lo yeke sara ye na nzoni bê. Ye so apika bê ti mo mingi. Na ngoi so ala yeke fa tâ tënë da na da, mo bâ so aita-koli na aita-wali ti dunia kue ayeke fa oko tënë so. Ala yeke sara kusala so na a-oko mbeti nga ala yeke wara nzoni na lege ti oko ye so a yeke fa na e. Tongana mo kiri na yanga-da, mo kiri mo wara ngangu. Tere ti mo anzere so mo ngbâ fade na kodoro ape so!

Laso, fango tënë ayeke kota kua so Royaume ti Nzapa ayeke sara. Jésus atene lani so yâ ti kusala ti fango tënë ayeke kono mingi na ngoi ti alango ti nda ni (Mat. 24:14). Ye so ayeke ga tâ tënë tongana nyen? Na yâ ti mbage so, e yeke sara tënë na ndo ti azo, akode nga na agbakuru ti kusala so amû maboko mingi na kua ti fango tënë. Kua ni so asara si azo kutu mingi na yâ ti dunia abâ Royaume ti Nzapa tongana tâ ye na lê ti ala.