Na yâ ti dunia kue, azo ayeke bâ pasi ndali ti angu so asuku amû ndo. Bâ aye so a fa ge:

•   “Mbeni mbeti sango afa so na yâ ti alango so ahon, ngu apika ngangu na capitale ti chine ahon ti so ayeke pika ka na yâ ti angu 140 tongaso. Ti londo na samedi ti si na mercredi, ngu asuku asi 744,8 mm (29,3 centimètre).”—AP News, 2 août 2023.

•   “Jeudi ayeke use lango so mbeni kota pupu so a iri ni typhon Khanun asara si ngu apika mingi nga pupu aya ngangu na sud ti Japon. Ye so asara si azo use tongaso akui. . . . Pupu ni ayeke sara ande si kota ngu ayeke pika asuku asi 0,6 mètre na ndo so ahoto ayeke dä na centre ti Taïwan.”—Deutsche Welle, 3 août 2023.

•   “Ngu so asuku amû ndo na week-end na [Nouvelle-Écosse] na ando so ayeke na terê ti ngu-ingo ti Atlantique na Canada, aga na lege ti kota ngu so apika, so mara ni ade ti si ape na yâ ti angu 50 so ahon.”—BBC News, 24 juillet, 2023.

 Bible atene nyen na ndö ti mara ti aye tongaso?

 Bible afa so e yeke na mbeni ngoi a iri ni “lâ ti nda ni” (2 Timothée 3:1). Jésus atene kozo awe so na ngoi ti e, e yeke bâ “aye so amû mbeto na zo,” wala aye ti mbeto (Luc 21:11). Changement ti climat ayeke na popo ti aye so ayeke na gunda ti aye tongana angu so asuku amû ndo wala kota pupu, ye ni so azo aku terê ti ala na ni ape asi fani mingi nga ayeke ngangu mingi ahon ti kozo.

 Bible afa na e so aye so amû mbeto na zo so ayeke passé na ndö ti sese laso amû na e raison ti duti na beku. Ngbanga ti nyen la e tene tongaso? Jésus atene: “Tongana ala bâ aye so ayeke si, ala nga, zia ala hinga so Royaume ti Nzapa aga nduru awe.”—Luc 21:31; Matthieu 24:3.

 Aye so ayeke asi so e yeke bâ ni, afa so Royaume ti Nzapa aga nduru ti sara si aye tongana ngu nga na pupu aga na kpale na azo na ndö ti sese ape.—Job 36:27, 28; Psaume 107:29.

 Ti hinga tongana nyen la Royaume ti Nzapa ayeke leke ande akpale so aye so angoro e aga na ni, bâ article “Qui sauvera la terre?”