Atënë ti kengo zo, sarango sioni na zo ndali ti so mo ke lo, sarango ye ti ngangu na zo ndali ti mara ti lo nga na tënë ti bira asi singo na yâ ti asango.

•   “Bira so ayeke na popo ti Israël na Gaza nga na azo so aye ti ga na changement asara si atënë ti kengo zo asi singo na ndö ti aréseaux sociaux.”​—The New York Times, 15 novembre 2023.

•   “Depuis na lango 7 ti octobre, wungo ti azo so ake amba ti ala senge senge ague na li ni mingi, ye so asara si gï hio tongaso tënë ti kengo zo nga na sarango ye ti ngangu na zo amû yâ ti dunia ahon ti kozo.”​—Dennis, président ti assemblée générale ti Nations unies, 3 novembre 2023.

 Atënë ti kengo zo, sarango ye ti ngangu na zo nga na tënë ti bira ayeke fini ye ape. Ti vrai ni, Bible asara tënë ti azo ti ândö so “[aleke] asioni tënë ti ala ti tokua ni tongana alê ti kokora” na ala sara lani aye ti ngangu na zo na yâ ti abira (Psaume 64:3; 120:7; 140:1). Me, Bible afa so tënë ti kengo zo so e yeke bâ ni laso ndani ayeke dä.

 Bible afa araison use so ndali ni tënë ti kengo zo ahon ndö ni laso.

1.  1. A sara tënë ti ngoi so ‘ndoye ti mingi ti azo ayeke dë dengo.’ (Matthieu 24:12). Ahon ti tene azo asara ye na ndoye, ala yeke sara aye so ayeke pusu azo ti ke amba ti ala.​—2 Timothée 3:1-5.

2.  2. So azo ayeke ke amba ti ala mingi laso afa so ala yeke sara ye tongana ti Satan Zabolo so ayeke zo ti sioni nga zo ti handango azo. Bible atene so “dunia so kue ayeke na gbe ti Zo ti sioni.”​—1 Jean 5:19; Apocalypse 12:9, 12.

 Me, Bible afa so na yâ ti kete ngoi Nzapa ayeke zi ande aye kue so ayeke na gunda ti kengo zo. Na ndö ni, lo yeke zi ande akpale kue so kengo zo aga na ni. Bible amû zendo so:

•   Nzapa ‘ayeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.’​—Apocalypse 21:4.