Na nze ti juillet 2022, sarango ye ti ngangu na azo na ngombe apassé na yâ ti dunia:

•   “Fango kota zo ti poroso so iri ti lo awu mingi [Shinzo Abe, so ayeke ngbene Premier ministre] na Japon ason lani bê ti azo na yâ ti kodro ni nga na yâ ti dunia kue, mbilimbili ndali ti so mara ti sarango ye ti ngangu tongaso na Japon ayeke mingi ape nga so andia so a lu na ndö ti mungo ngombe ayeke ngangu mingi.”—The Japan Times, 10 juillet 2022.

•  

•   “Afrique du Sud: Azo 15 akui na peko ti so ambeni koli atiré azo na ngombe na yâ ti mbeni bar na Soweto.”—The Guardian, 10 juillet 2022.

•   “Na lango 4 ti nze ti juillet na week-end, na ngoi ti mbeni ti matanga, azo so a fâ ala na ngombe na États-Unis ahon 220.”—CBS News, 5 juillet 2022.

 Eskê mbeni beku ayeke dä so mara ti sarango ye ti ngangu tongaso ayeke hunzi ande? Bible atene nyen na ndö ni?

 Bible airi ngoi ti e “lâ ti nda ni,” mbeni ngoi so azo ayeke sara aye ti sioni, nga ala yeke sara ye ti ngangu (2 Timothée 3:1, 3). Asarango ye ti ngangu tongaso asara si azo ayeke na mbeto (Luc 21:11). Me, Bible amû zendo so na mbeni ngoi sarango ye ti ngangu na zo ayeke hunzi ande nga azo “ayeke sara kodro na ndo so siriri ayeke dä, na yâ ti ada so ayeke bata zo nzoni nga na ando so asara si ala wu terê ti ala nzoni.” (Ésaïe 32:18). Sarango ye ti ngangu ayeke hunzi ande tongana nyen?

 Nzapa ayeke futi ande azo ti sioni nga na aye ti sarango na bira kue.

•   “Âdu ti azo ti sioni, a yeke zi ala na ndö ti sese.”—aProverbe 2:22.

•   ‘Nzapa ayeke sara si abira ahunzi na ndö ti sese kue. Lo fâ yâ ti kokora, nga lo fâ yâ ti likongo kete kete; lo zö apuse ti mbarata ti sarango na bira.’—Psaume 46:9.

 Nzapa ayeke zi ande aye so ayeke na gunda ti asarango ye ti ngangu na lege so lo yeke fa na azo ti sara ye na siriri.

•   “Ala yeke sara ye ti sioni pëpe, na ala yeke buba ye pëpe na ando kue so ayeke na ndö ti hoto ti mbi so ayeke nzoni-kue, ndali ti so hingango ye na ndö ti Jéhovah ayeke mû ndö ti sese kue tongana ti so ngu-ingo asi singo na ngu.”—Ésaïe 11:9.

•   Même laso, Nzapa ayeke fa na azo na yâ ti dunia kue ti kpe ti sara ye ti ngangu nga ti kpe ti sara kua na aye ti bira, ti “pika a-épée ti ala si aga alê ti kpoka ti charrue nga ala yeke pika alikongo ti ala si aga azembe ti fango na amaboko ti keke.”—Michée 4:3.

 Ti hinga ye mingi na ndö ti zendo ti Bible ti mbeni dunia so mbeto ayeke dä ape, diko article “Affranchis de la peur : est-ce possible ?”

 Ti hinga ye mingi na ndö ti ye so a yeke hunzi biani biani na sarango ye ti ngangu, diko article “Enfin la paix sur la terre !”