ALA LANGO PËPE!
Sarango ye ti ngangu na azo ndali ti tënë ti poroso: Bible atene nyen na ndö ni?
A yeke sara ye ti ngangu na azo laso mingi ndali ti tënë ti poroso, ye so asara si azo ayeke gi bê ti ala na yâ ti dunia kue.
Na Mexique, na ngoi ti élection ti ngu 2023-2024, wusuwusu atï na yâ ti kodro ni na peko ti so a fâ acandidat 39 nga a sara ambeni ye ti ngangu ni nde na azo.
Ade ti ninga ape na Europe, a sara gbâ ti aye ti ngangu na azo ndali ti tënë ti pororo, so na popo ni a tara lani ti fâ Premier ministre ti Slovaquie na lango ti 15 mai 2024.
Li ti azo ti kodro ti États-Unis aga kirikiri na lango 13 ti juillet 2024 na peko ti so a tara ti fâ ngbene gbia ti kodro ni Donald Trump.
Ngbanga ti nyen la a yeke sara ye ti ngangu na azo mingi ndali ti tënë ti poroso? A yeke hunzi ande mbeni lâ? Bible atene nyen na ndö ni?
Bible afa kozo awe so yâ ti azo ayeke kangbi ndali ti tënë ti poroso
Bible afa kozo awe so na ngoi ti e so airi ni “lâ ti nda ni,” mingi ti azo ayeke duti ande na asarango ye so alingbi ti dü sarango ye ti ngangu na zo nga na tiri.
“Na lâ ti nda ni, angoi ti akpale so ayeke ngangu na zo ti kanga bê na yâ ni ayeke duti dä, ngbanga ti so azo ayeke duti ande. . . azo so ahinga ti kiri singila pëpe, azo so ayeke abe-ta-zo pëpe, . . . azo so aye ti mä terê na amba ti ala pëpe, . . . azo so ayeke asioni zo, . . . azo ti kango amba ti ala, azo so li ti ala akpengba, azo so wuma ti ala ahon ndö ni.”—2 Timothée 3:1-4.
Bible afa nga kozo awe so ngoi ti e ayeke duti ande mbeni ngoi so aye ti wusuwusu tongana kengo yanga ti azo ti gouvernement nga na fango ngonzo ti bê ndali ti tënë ti poroso ayeke duti ande dä mingi (Luc 21:9, kete tënë na gbe ni). Ye oko, sarango ye ti ngangu na zo ndali ti tënë ti poroso nga na tënë ti kangbi ayeke hunzi mbeni lâ.
Sarango ye ti ngangu na zo ndali ti tënë ti poroso ayeke hunzi
Bible afa so Nzapa ayeke zi gouvernement ti azo kue na lo yeke zia gouvernement ti lo, so ayeke mbeni gouvernement ti yayu na place ni.
“Nzapa ti yayu ayeke sigi na mbeni royaume so. . . ayeke neka aroyaume so kue nga ayeke futi ala biaku biaku, na gï royaume so oko la ayeke ngbâ lakue lakue.”—Daniel 2:44.
Royaume ti Nzapa ayeke bungbi biani azo kue oko na ayeke sara si siriri aduti na ndö ti sese kue.
A iri Jésus Christ Gbia ti Royaume ni “Mokonzi ti siriri,” nga lo yeke sara kue si “siriri ayeke hunzi ande pëpe.”—Ésaïe 9:6, 7.
Même laso, azo ti gbe ti Royaume ni ayeke manda déjà awe tongana nyen ti duti na siriri. Bible afa kozo awe atene: “Ala yeke pika a-épée ti ala si aga alê ti kpoka ti charrue nga ala yeke pika alikongo ti ala si aga azembe ti fango na amaboko ti keke. Mara ayeke mû épée na terê ti mbeni mara pëpe, nga ala yeke manda sarango bira encore ape.”—Ésaïe 2:3, 4.
Ti hinga aye mingi na ndö ni, diko article “Nyen la Royaume ti Nzapa ayeke ga ande ti sara?” nga bâ vidéo Royaume ti Nzapa ayeke nyen?