Na août 1967, na temps so a dü mbi, mbi yeke lani nzoni, me na peko ti so mbi yeke na ngu oko na ndambo, mbeni ngangu fièvre asara mbi. Na ndade ni na ndapre na temps so mbi zingo, agere ti mbi use kue awoko. A sara na mbi a-examen na hôpital so ayeke na Freetown, na Sierra Leone, ndo so mbi yeke vivre dä. A-examen ni afa so mbi yeke na polio, mbeni kobela so asara si zo aparalysé, so mingi ni a yeke sara amolenge so ayeke na gbe ti ngu oku. Azo so ayeke sara rééducation awara lege ape ti sara si agere ti mbi akiri akpengba. Yeke yeke, agere ti mbi akomanse ti nge nga apeut ti supporté poids ti mbi ape. Ndali ti kobela ti mbi ni, babâ ti mbi ayeke tene lani fani mingi na mbi so mbi yeke mbeni molenge so ayeke gï moitié. Ndali ti so mbi yeke hara harango, mbi bâ so mbi yeke limité nga mbi yeke ye oko ape.

 Mbi na mama ti mbi e vivre lani na yâ ti mbeni ndo so mingi ti azo ni ayeke pauvre mingi. Atâa so mingi ti azo ni aye mbi, me babâ ti mbi aye mbi ape. Ambeni apensé so kobela ti mbi ni ayeke vrai kobela ape, me azo ti likundu la asara ye na mbi. Ambeni atene na mama ti mbi ti gue ti bi mbi na devant ti ndo so a yeke occupé na amolenge so mbage ti terê ti ala abuba dä. Ala tene na lo so tongana lo sara tongaso, lo yeke duti libre. Mama ake atënë ti ala ni, na lo sara kua ngangu ti occupé na mbi.

 Ndali ti so mbi peut ti luti wala ti tambela ape, mbi hara harango. So mbi yeke gboto agere ti mbi gbotongo na sese, a sara si mbi wara akä. Ti tene mbi wara kä ape, mbi yü anengo bongo. So mbi yeke na gant ape, ti tene mbi protegé maboko ti mbi, mbi yü ngbala na maboko ti mbi. Na pekoni, a leke na mbi mbeni cale ti keke na forme ti U ti tene aprotegé maboko ti mbi. Ti tambela na ni, mbi zia ni na devant, na mbi avancé. Na pekoni, mbi bi gere ti mbi na devant, nga mbi ba peko ti mbi ti hon na ni. Mbi yeke sara tongaso ti gue na ni na ayeke ngangu mingi. Ye so asara si maboko ti mbi nga na épaule ti mbi ason. Ti sara mouvement tongaso ahunda effort mingi asara si mbi yeke gï na yanga-da. Mbi peut lani ti gue na ekole ape wala ti sara ngia na amba ti mbi ape. Mbi yeke gi bê ti mbi mingi na ndö ti ye so ayeke si ande na mbi, tongana mama akui.

 Mbi sambela lani Nzapa, na mbi hunda na lo ti aidé mbi nga ti tene mbi ga zo ti iringo ye ape. Mbi hinga so tongana mbi ga nduru na lo, na mbi sara na lo na lege ni, lo yeke bâ lege ti abezoin ti mbi. Tongaso, mbeni lâ na ngu 1981, atâa so ayeke lani ngangu na mbi, mbi gue na mbeni eglize so ayeke na yâ ti rue ti e. Kamene asara mbi ndali ti fason so azo ayeke bâ lani na mbi. Pasteur ni ayamba mbi nzoni ape, na lo suku na mama ti mbi ndali ti so mbi duti na place ti mbeni zo so lo payé ni awe. Mbi décidé ti kiri kâ encore ape.

 Na ngu 1984, na temps so mbi yeke na ngu 18, na mbeni ndapre mbi monté escalier, mbi gue mbi duti na place so mbi yeke duti ka dä na terê ti fenêtre. Ge la mbi yeke bâ aye so ayeke passé na gigi. Me mbi décidé ti descend ti gue na yâ ti lacour, so mingi ni azo ayeke dä ape. Na temps so mbi yeke na yâ ti lacour ni, mbi bâ akoli use so ayeke fa tënë da na da. Ala sara tënë ti mbeni pendere gigi ti kekereke na mbi so na yâ ni situation ti mbi ayeke changé ande. Ala diko na mbi Ésaïe 33:24 nga na Apocalypse 21:3, 4. Na pekoni, ala mû na mbi mbeni pendere brochure so iri ni ayeke Vivez éternellement heureux sur la terre! nga ala tene na mbi so ala yeke kiri ande ti fa ambeni ye encore na mbi.

 Na temps so ala kiri aga, ala tene na mbi so ala yeke ga ande na Pauline, mbeni missionaire so aga fini fini ti continué lisoro ni. A yeke ye so ala sara la. Songo ti mbi na Pauline aga tongana ti mama na molenge. Mama ti dungo mbi a-encouragé mbi ti tene “fini mama ti mbi,” so aye mbi, akanga bê, asara ye na nzoni bê, apensé na mbi nga so lakue ayeke gi ti hinga dutingo ti mbi angbâ ti manda Bible na mbi. Pauline afa lani na mbi ti diko mbeti. Lo sara kua na Mbeti ti ambaï ti yâ ti Bible, ti sara si mbi hinga Babâ ti ndoye so mbi gi ti hinga lo lani.

 Aye so mbi manda na yâ ti Bible asara si mbi yeke na ngia mingi. Mbeni lâ, mbi hunda na Pauline wala mbi peut ti gue na bungbi ti aTémoin ti Jéhovah, na Mandango Buku ti Congrégation, a so a yeke sara ni na ndo ti mbeni Témoin ti Jéhovah so ayo kete na ndo so mbi lango dä. Pauline ayeda. Na mardi ti peko, lo ga lo ku mbi ti tene mbi sukula ngu nga mbi yü bongo tongaso si e gue na bungbi ni legeoko. Mbeni zo atene na mbi so mbi doit ti hunda Pauline ti payé taxi na mbi, me mbi tene: “Mbi yeke tambela na acale ti mbi ti keke ti gue kâ.”

 Na temps so e ye ti hon, mama ti mbi nga na avoizin ti e ayeke bâ e na ala yeke gi bê ti ala. Tongana e yeke hon na yâ ti lacour ni, ambeni voizin ni adekongo atene na Pauline: “Mo la mo yeke force lo!”

 Na nzoni bê, Pauline ahunda mbi: “Jay, mo ye ti gue?” A yeke vrai moment ni la ti tene mbi fa so mbi sara confiance na Jéhovah (aProverbe 3:5, 6). Mbi tene: “En! Mbi la mbi ye ti gue.” Avoizin ni abâ e kpô na bango ndo ti ala achangé na temps so e si na portail. Tongana mbi sigi na yâ ti gbagba ni, ala pika maboko.

 Bungbi ni anzere lani na mbi mingi! A dë bê ti mbi. Azo kue ayamba mbi nzoni. Zo oko abâ mbi na sioni lê ape. Mbi sentir terê ti mbi à l’aise. Tongaso, mbi gue lakue na abungbi. Kete na pekoni, mbi hunda wala mbi peut nga ti gue na bungbi so a yeke sara ni na Da ti Royaume ti aTémoin ti Jéhovah. Mbi yeke pauvre, na mbi yeke lani gï na arobe use nga na poro oko. Me, mbi yeke sûr so awakua ti Nzapa ayeke ke mbi ape. Ti tâ tënë ni, ala ke mbi ape.

 Ti gue na Da ti Royaume, a hunda ti tene zo atambela juska na fin ti rue ni, na pekoni lo mû taxi ti gue na gbe ti hoto na ndo so salle ni ayeke dä. Aita ayeke yô mbi na maboko, ti monté ti gue na mbi na salle.

 Mbi bâ so Jéhovah ayeke nzoni, na mbi ye ti tene lo ga ndo ti batango terê ti mbi. Mbi décidé ti gue lakue na abungbi (Psaume 34:8). Na temps ti ngu-nzapa, mingi ni tongana mbi si na salle, ngu amouillé mbi na terê ti mbi kue ayeke popoto nga mbi doit ti changé bongo. Me, mbi regretté ni ape.

 A sara tënë ti mbi na yâ ti Annuaire des Témoins de Jéhovah ti ngu 1985. Na peko ti so Josette, so ayeke mbeni Témoin ti Jéhovah, na Suisse, adiko histoire ti mbi na yâ ti Annuaire ni, lo tokua na mbi mbeni tricycle so mbi peut ti pédalé ni na maboko. Mbeni ye ayeke na terê ti tricycle ni so apeut ti sara si popoto atuku na terê ti mbi ape nga mbeni phare ti couleur ayeke dä. Grâce na ni, mbi peut ti hon sân kamene. Tongana amolenge abâ tricycle ni, terê ti ala anzere na ala tene na mbi so ala ye ti bâ mbi na kpengo na ni. Mbi so lani mbi yeke ye oko ape so mbi ga mbeni zo so azo ayeke ne lo, mo bâ mo tene mbi yeke mbeni reine.

 A yeke lani facile na mbi ti gue na li ni na lege ti yingo ndali ti so mbi yeke na mbeni vie so ayeke simple nga mbi yeke na nzoni sarango ye. Tricycle ni amû lege na mbi ti ga wafango tënë so ade ti wara batême ape, nga na lango 9 ti août 1986, mbi wara batême. Batême ni achangé aye mingi na yâ ti fini ti mbi, a yô mbi na nduzu na mbeni lege so mbi imaginé ni ape. Mbi yeke na siriri ti bê, gigi anzere na mbi, mbi bâ so mbi ne na lê ti azo nga mbi yeke sûr na terê ti mbi ndali ti so mbi yeke na mbeni Babâ so aye mbi nga na azo so apensé na mbi.

 Ti kiri singila na Jéhovah ndali ti aye so lo sara na mbi, mbi pensé ti mû kua ti pionnier permanent, me mbi bâ so mbi peut ti sara ni ape (Psaume 116:12). Mbi sambela ndali ni nga mbi décidé ti essayé ni. Mbi ga pionnier na lango oko ti janvier 1988 na mbi ngbâ ti sara kua ti pionnier. So ayeke mbeni tufa ndali ti mbi! Aita-koli na aita-wali so aye mbi a-aidé mbi ti atteindre objectif ti mbi nze na nze. Nga mbi bâ comment Jéhovah a-aidé mbi na lege ti yingo vulu ti lo.—Psaume 89:21.

 So mbi yeke pionnier, mbi yeke sigi mingi, ye so a-aidé gere ti mbi atâa so angbâ ti woko. Asi na mbeni temps, mbi gue na mbeni clinique so a zi fini fini, ti tene a sara na mbi rééducation nga na ambeni ye nde. Me, infirmière ni atene na mbi so mbi bezoin ti ga encore ape ndali ti so na yâ ti kete temps, mbi yeke kui kuingo. Na temps so mbeni infirmière ni nde atene na mbi gï même tënë, mbi découragé. Tongana mbi kiri na yanga-da, mbi sambela Jéhovah ti aidé mbi ti hon ndö ti découragement ni nga ti aidé mbi ti gi mbeni lege nde ti sara rééducation ni.

 Fango tënë ayeke mbeni nzoni yorö so asoigné mbi. A yeke tongana sarango sport. Ambeni ngu na pekoni, mbeni infimière ni so atene lani na mbi so na yâ ti kete temps mbi yeke kui kuingo so ahon na devant ti Da ti Royaume na lo bâ mbi. A étonné lo ti bâ so mbi ngbâ na fini.

 Atâa situation ti mbi, mbi gi ti ngbâ ti sara kua ti Jéhovah mingi. Aita afélicité mbi ndali ti so mbi yapu nga mbi yeke ga na abungbi na l’heure. Mbi yeke si ka na l’heure ndali ti so amû lege na mbi ti bara aita nga ti fa na ala so mbi pensé na ala.

 Mbi tara na mbi bâ so Jéhovah ayeke nzoni, nga mbi wara gbâ ti atufa na yâ ti gigi ti mbi. Anzere na mbi so mbi aidé azo ota ti wara batême. Amelia, so ayeke mbeni oko na popo ti ala, ague na ekole ti Galaad ti klasse 137 ni. Mbi gue na ekole ti apionnier fani mingi, so ayeke mbeni pendere disposition so alondo na Jéhovah. Jéhovah asara si mbi yeke na ngia, gigi anzere na mbi, mbi bâ so mbi ne na lê ti azo nga mbi yeke sûr na terê ti mbi. Mbi sara kamene ti terê ti mbi encore ape. Mbi yeke na anzoni kamarade na yâ ti tâ tënë na ndo so mbi yeke dä, na Freetown, na yâ ti kodro ni kue nga na yâ ti dunia kue.

 A sara presque ngu 40 tongaso la mbi hinga tënë ti zendo ti fini dunia, so na yâ ni a yeke sava ande azo so mbage ti terê ti ala abuba. Zendo so a-encouragé mbi, na mbi yeke ku kungo ti bâ gango tâ tënë ni. Mbi ngbâ ti kanga bê ti ku ndali ti so mbi hinga so Jéhovah Nzapa ti mbi ayeke sara ye na retard ape (Michée 7:7). So mbi kanga bê mbi ku, mbi wara gbâ ti atufa. Jéhovah a-aidé mbi ti hon ndö ti gbâ ti akpale. Lo aidé mbi lakue na tâ ngoi ni. Mbi yeke na ngia mingi nga mbi yeke he ngia lakue ndali ti so mbi so mbi yeke hara harango na sese lani, Jéhovah ayô mbi na nduzu na mbeni lege so mbi imaginé ni ape.