Na yâ ti mingi ti akodro, ngere ti kobe, ti abongo nga na ti louengo da aga cher mingi na asara si gigi akpengba na azo, même na aTémoin ti Jéhovah kue. Me, ye so a-aidé aTémoin ni ti hon ndö ti gingo bê ti ala ayeke so ala hinga so Jéhovah ayeke “girisa” awakua ti lo “lâ oko pëpe.” (aHébreu 13:5). Lakue, lo yeke sara ye alingbi na zendo so. Lo sara ni nga na kodro ti Philippines, so mingi ti azo ni ayeke vivre na yâ ti pauvreté. Ti londo na ngu 1970 ti si na ngu 1980, kodro so ayeke lani na yâ ti ngangu kpale.

 Mbeni ita-wali so iri ti lo ayeke Vicky a atene so “parfois mbi yeke toto lani ndali ti so ye ti tengo ni ayeke dä ape. Na ambeni ngoi, e yeke gï na loso, ingo nga na ngu.” Mbeni ita-koli, so iri ti lo ayeke Florencio, awara kua ti sara ape. Lo tene: “Mbi yeke lani gï na achemise ota nga na apantalon ota, so mbi yeke yü ni ti gue na ni na abungbi nga na a-assemblée.” Tongana nyen la awakua ti Jéhovah agbu ngangu na yâ ti ye so? Nyen la a-aidé ala lani ti ngbâ be-ta-zo na Jéhovah? Nga, tongana nyen la tapande ti ala apeut ti aidé e laso tongana situation ti e achangé gï hio tongaso?

 A-Témoin so ayeke na Philippines ayeke lani sûr so Jéhovah ayeke bâ lege ti ala na ngoi ti ngangu kpale so (aHébreu 13:6). Nga mingi ni, lo yeke sara ni na ambeni lege so ala ku terê ti ala na ni ape. Na tapande, mbeni ita-wali, so iri ti lo ayeke Cecille adabe ti lo, atene: “Na peko ti so e tö tanga ti loso ti e ti te na ndapre, sewa ti e so e yeke osio na yâ ni ayeke na ye oko ti tengo ni ape. Tongaso, e sambela ti tene Jéhovah amû na e ye so e yeke na bezoin ni. Na temps so e ngbâ ti te ye ni, mbeni ita-koli aga na cinq kilo ti loso. Terê ti e anzere na ngu ti lê ti e asigi. So ayeke biani mbeni tufa ti Jéhovah. E yeke na gbâ ti a-expérience tongana ti so.”

 Na ndö ni, aita ti e asara ye alingbi na awango ti ndara so ayeke na yâ ti Bible (aProverbe 2:6, 7). Na tapande, gigi akpengba lani mingi na mbeni ita-wali so iri ti lo ayeke Arcelita so awara lani batême fini fini nga lo yeke célibataire na temps ni so. Me, lo fa agingo bê ti lo kue na Jéhovah. Na pekoni, lo gbu li na ndö ti aProverbe 10:4, so atene: “Maboko so asara kua pëpe asara si zo atï na yâ ti yere, me maboko so asara kua ngangu aga na mosoro na azo.” Lo ye ti sara ye alingbi na atënë so, tongaso lo décidé ti sara mbeni jardin. Lo tene: “Jéhovah asara tufa biani na ndö ti a-effort ti mbi. Ti vrai ni, mbi wara kobe so mbi yeke na bezoin ni nga nginza ti tene mbi payé na lege.”

 Aita ni ayeke lani na nginza mingi ape ti vo mbeni terrain nga ti leke aDa ti Royaume. Me, ala découragé ape ti sara ye alingbi na commandement so a hunda ti tene e bungbi ndo oko ti wa terê na popo ti e (aHébreu 10:24, 25). Ala sara achangement ti lingbi na situation ni. Na tapande, mbeni ita-wali, so iri ti lo ayeke Deborah adabe ti lo, atene: “E yeke lani omene so e yeke sara bungbi na gbe ti mbeni kete kpangba so mbi na mbeni mba ti mbi pionnier la e leke ni. Ti li ti da ni, e leke ni na akugbe ti mbûrü, ti amur ni ayeke na akugbe ti coco, nga ti aye ti duti ni ayeke na agunda ti coco.”

 Me, na yâ ti mingi ti aye ni, e yeke sara abungbi na ndo ti aita. Mbeni ita-wali, so iri ti lo ayeke Virginia, atene: “A sara kete da ti e na pere nga na bambou. Chaque samedi, e yeke sigi na aye ti yâ ti da ti e ti tene e wara place si na ndade ni e sara bungbi dä.” Ti mbeni da ni nde, li ti da ni ayeke yuru. Mbeni ita-koli, so iri ti lo ayeke Noel adabe ti lo, atene: “Tongana ngu-nzapa apika, e yeke zia lani aseau na aplace so ngu ni ayuru dä. Me, ye ni so agêné e lani ape ndali ti so e bungbi ndo oko na aita ti e ti voro Jéhovah.”

 Aita ti e angbâ lani ti yapu na fango tënë, atâa so ala yeke na aye ti sese mingi ape. Lindina, so ayeke na île de Negros adabe ti lo, atene: “So e yeke na yâ ti kota sewa nga gï babâ oko la asara kua, lakue e yeke na nginza ti payé lege ape. Tongaso, mingi ni, e yeke tambela na gere ti gue na fango tënë. Me, anzere lani na e ndali ti so e kue e yeke ensemble. E hinga nga so a-effort so e sara anzere na Jéhovah.”

 Mbeni kota kpale ni ayeke so e yeke gue lani ti fa tënë na ando so ayo na ndö ti ahoto ndali ti so taxi ayeke mingi ape wala ayeke dä ape. Esther, so ayeke na île de Luçon, atene: “Groupe ti e aTémoin so wungo ti e alondo na 6 ti si na 12, e yeke hon lani na kota yanga ti ndapre ndali ti so e yeke tambela na gere teti akilomètre mingi. E yeke fa tënë na yâ ti lango ni kue. E yeke gue lani na akobe na e yeke te ni na gbe ti akeke. Me, ambeni ita so ayeke na aye ti tengo ni ape, a yeke ga nga lani. E yeke tene na ala: ‘Ala gi bê ti ala ape. E yeke na kobe ndali ti azo kue.’”

 Jéhovah abénir tâ bibe ti sacrifice so. Na tapande, na ngu 1970, awafango tënë na Philippines ayeke 54 789. Na ngu 1989, wungo ni so ague na li ni fani use, awafango tënë ayeke 102 487. Na ngu 2023, wungo ti awafango tënë na Philippines ayeke 253 876.

 Atâa so aTémoin ayeke na kpale ti nginza, ala yeke na ngia ti sara aye mingi na yâ ti kua ti Jéhovah. Mbeni ita-koli, so iri ti lo ayeke Antonio, atene: “Atâa so e yeke pauvre akanga lege na e ape ti ndoye Jéhovah.” Ita-wali Fe Abad atene: “Na temps so mbi na koli ti mbi e yeke na kpale ti nginza, e ngbâ lani nduru na Jéhovah na e bâ so zo ayeke duti na ngia tongana lo yeke na mbeni gigi so ayeke simple. Ye ti peko ni ayeke so, amolenge ti e amanda nga ti sara confiance na Jéhovah.”

 Lucila, so ayeke na île de Samar, atene: “So e yeke pauvre ayeke mbeni kpale ape na ngoi so e yeke sara na Jéhovah.” Lo kiri lo tene: “Tongana e zia Nzapa na kozo ndo, e yeke gi ti zia bê ti e gï na ndö ti ye so e yeke na ni nga e yeke ngbâ ti duti na nzoni bango ndo. Ti vrai ni, anzere na mbi ti bâ azo so mbi manda Bible na ala ahinga Jéhovah, nga ambeni ngoi na pekoni, mbi na ala e sara kua ti pionnier legeoko.”

 So e hinga so na yâ ti angoi so ayeke ga e yeke tingbi na angangu kpale, e peut ti manda ye na lege ti atënë ti mbeni ancien so iri ti lo ayeke Rodolfo, so atene: “Na temps so e vivre lani na ngoi ti angangu kpale so ayeke na popo ti ngu 1970 nga na ngu 1980, mbi bâ biani maboko ti Jéhovah na yâ ti fini ti mbi. Même si mbi yeke na nginza mingi ape, mbi bâ so mbi yeke pauvre ape. Jéhovah abâ lege ti mbi nzoni. Juska laso mbi vivre tâ mbeni nzoni gigi, nga mbi yeke ku kungo ‘tâ fini ni biani’ na yâ ti Paradis ande.”—1 Timothée 6:19.