Agostinho, so ayeke na Brésil, atene: “Mbi kono na yâ ti mbeni ferme ti kodro ni. E yeke lani tâ pauvre mingi. Mbi zia lani ti gue na ekole tongaso si mbi sara kua ti mû na sewa ti mbi aye so e yeke na bezoin ni”. Juska na ngu 33 la Agostinho amanda ti diko mbeti nga ti sû ni. Lo tene: “So mbi manda ti diko mbeti nga ti sû ni asara si mbi bâ so mbi ne na lê ti azo.”

 Agostinho ayeke na popo ti azo so ahon 250 000 so aTémoin ti Jéhovah afa na ala ti diko mbeti nga ti sû ni, so ahon ngu 70 tongaso awe. Ngbanga ti nyen la aTémoin ti Jéhovah aleke ti fa mbeti na azo? Tongana nyen la azo awara ye ti nzoni na pekoni?

 Ti si na ngu 1935, aTémoin ti Jéhovah ayeke fa tënë na yâ ti akodro 115. Ti fa tënë na azo so ayeke tene ayanga ti kodro nde nde, amissionnaire ayeke zia a-audio ti adiskur so a traduire ni, nga parfois ala yeke kangbi ambeti na ayanga ti kodro ti azo ni. Mingi ti azo ni aye ti hinga ye na ndö ti Bible, me mingi ti ala ahinga ape ti diko mbeti nga ti sû ni, a sara si ayeke ngangu na ala ti manda ye tongana ti so ala ye.

 So azo ni wani apeut ti diko Bible ape, a yeke ngangu na ala ti manda ti sara ye alingbi na amama-ndia ti Bible (Josué 1:8; Psaume 1:2, 3). Ti sara akua ti ala ti Chrétien nzoni ayeke nga mbeni kpale. Na tapande, tongana babâ na mama ahinga ti diko mbeti ape, a yeke duti ngangu na ala ti fa na amolenge ti ala aye so Bible afa (Deutéronome 6:6, 7). Nga azo so aga aTémoin ti Jéhovah fini fini so ahinga ti diko mbeti ape ayeke ngangu na ala ti sara kua nzoni na Bible ti fa ye na azo.

 Na yâ ti angu 1940 ti si na 1950, Nathan Knorr na Milton Henschel, so ayeke azo so ayeke mû li ni na popo ti aTémoin ti Jéhovah, ague na akodro nde nde ti aidé ti leke yâ ti kua ti fango tënë. Na yâ ti akodro so azo mingi ahinga ape ti diko mbeti nga ti sû ni, aita-koli use so a-encouragé afiliale ti ndo ni ti leke mbeni programme na yâ ti acongrégation ti fa mbeti na azo.

 Afiliale ni afa na acongrégation ni akode ti fango mbeti na azo. Na yâ ti ambeni kodro, gouvernement ti ndo ni ayeke déjà na ambeni programme so apeut ti sara kua ni. Na tapande na Brésil, gouvernement ni amû na filiale ambeti nga na agbakuru ti kua, na filiale ni atokua ni na yâ ti acongrégation. Na yâ ti ambeni kodro nde, aTémoin ti Jéhovah wani asigi na programme ti fango mbeti ti ala.

 Lege azi na akoli, awali, amaseka nga na ambakoro kue ti manda mbeti. Ye so awafango mbeti ni aye lani ayeke ti aidé awamandango mbeti ni ti hinga ti diko mbeti na yanga ti kodro ti ala, même si na yâ ti congrégation oko, a peut ti leke ti fa mbeti na ayanga ti kodro nde nde.

 Tongana nyen la programme ti mandango mbeti so a-aidé azo? Mbeni ita-wali na Mexique atene: “Fadeso mbi peut ti mä yâ ti Bible nzoni, ye so asara si Bible andu bê ti mbi mingi. So mbi hinga ti diko mbeti a-aidé mbi ti sara lisoro nzoni na amba ti mbi nga ti fa tënë na azo nzoni.”

 Programme ti fango mbeti so a-aidé azo na yâ ti aye mingi ahon gï ti mä yâ ti ye so Bible afa. Isaac so ayeke na Burundi atene: “So mbi manda ti diko mbeti nga ti sû ni amû lege na mbi ti manda akode ti lekengo da. Lekengo da aga kua ti nginza ti mbi, nga fadeso mbi yeke mû li ni na yâ ti akota projet ti lekengo da.”

 Mbeni wali na Pérou so iri ti lo ayeke Jesusa, akomanse ti manda ti diko mbeti nga ti sû ni na ngoi so lo yeke na ngu 49. Lo tene: “So mbi yeke mama ti sewa, mbi bezoin diko ngere nga na iri ti aye na gara. Kozo ayeke ngangu na mbi. Grâce na mandango mbeti so, mbi yeke gi bê ti mbi encore mingi ape na ngoi so mbi yeke vo ye ndali ti sewa ti mbi.”

 Na yâ ti angu so ahon, akota zo ti akodro nde nde agonda aTémoin ti Jéhovah ndali ti angangu kua so ala sara ti fa mbeti na azo. Laso, aTémoin ti Jéhovah angbâ ti sara kua na aprogramme nga na agbakuru ti kua so a kiri a leke yâ ni nzoni na yâ ti angu so ahon ti fa na mbeti na azo. Ala sigi nga na abrochure na ala imprimé ni nduru na million 224 na ayanga ti kodro 720 ti aidé azo ti manda ti diko mbeti wala ti aidé azo so amanda mbeti ayo ape. a