Jéhovah aye ti fa ye na azo ti lo. Ye so asara si, bungbi ti lo asigi na gbâ ti a-ekole ti formé a-élève tongaso si ala sara kua ti ala na yâ ti bungbi ti Jéhovah nzoni. Mbeni oko ti a-ekole ni ayeke Ekole ti awafango nzoni tënë ti Royaume (EAR). Na yâ ti angu so ahon ade ti ninga ape, bungbi ti Jéhovah aluti gï pëpe na ndö ti aye so a yeke fa, me nga na ndö ti ada so a yeke sara a-ekole ni dä. Mbeni kota objectif ni ayeke ti tene a leke mbeni ndo so amû lege na a-instructeur ni ti fa ye nzoni nga ti tene a-élève ni amanda ye nzoni. Tongana nyen la a-offrande so ala mû ayeke aidé e ti si na objectif so?

 Teti angu mingi, a yeke sara a-ekole ti bungbi ti Jéhovah na yâ ti aDa ti Royaume nga na aDa ti assemblée. Ngbanga ti nyen la ade ti ninga ape, e leke afini da wala e leke peko ti ambeni so a yeke sara kua na ni fadeso gï ndali ti a-ekole ti bungbi ti Jéhovah? Bâ araison ni ota:

 A yeke na bezoin ti awafango tënë mingi. Christopher Mavor, wamungo maboko na Komite ti kusala ti Bebungbi, atene: “Abureau ti afiliale afa so a yeke na bezoin ti aita-koli nga na aita-wali mingi ti aidé na yâ ti territoire. Na tapande, na ngu 2019, filiale ti Brésil afa so a bezoin ti wara na ndö ni adiplômé ti EAR 7 600 ti aidé na yâ ti territoire ti filiale ti ala.” Filiale ti États-Unis afa so a yeke na bezoin ti gbâ ti apionnier so alingbi so apeut ti formé ambeni ita ti fa tënë na ando so azo ayeke hon dä mingi na yâ ti akota gbata, ti fa tënë na aport nga na ada ti kanga. A yeke nga na bezoin ti aita-koli ti sara kua na Service ti lekengo ada so ayeke na gbe ti mbeni filiale (LDC) nga na aKomite so abâ lege ti songo na ada-nganga (CLH). Aita so awara diplôme ti EAR apeut ti aidé ti sara akua ni so.

 Wungo ti a-élève ni ayeke mingi. Demande ti a-élève so afiliale awara ayeke mingi ahon nombre so a hunda. Na tapande, gï na yâ ti ngu oko, filiale ti Brésil awara demande ti aita 2 500 so aye ti sara ekole ti EAR. Me ndali ti so ndo so aita ni ayeke sara ekole ni dä akono ape, filiale ni amû gï a-élève 950.

 Anzoni ndo ti lango. Tongana a-élève ni asara ekole ni na Da ti Royaume wala na Da ti assemblée, mingi ni, ala yeke lango na yanga-da ti aita ti ndo ni. Lekengo ye ni so ayeke marché na yâ ti akodro so aklase ni ayeke mingi ape na yâ ti ngu oko oko. Me na ando so aklase ni ayeke mingi, a peut ti duti ngangu na awafango tënë ti ndo ni ti yamba a-élève ni teti gbâ ti anze na yâ ti ngu ni. Tongaso, a leke ada so ayeke nzoni ndali ti a-élève ni nduru na klase ni.

 Ti leke mbeni da so ayeke wara mbeni klase, mbeni ndo ti lango ndali ti a-instructeur na a-élève 30 tongaso nga na aservice ti mungo maboko, a peut ti hunda gbâ ti million ti dollars (États-Unis), adépend ndo ni nga na ambeni ye nde.

 Mingi ni, a yeke sara a-ekole na mbeni ndo so ayeke kpô na ayeke na yâ ti gbata ape, me nduru na ndo so agare ayeke dä. A yeke sara ni na ando so awafango tënë ayeke dä mingi so apeut ti aidé na yâ ti ambeni kua si ekole ni atambela nzoni nga ti bâ lege ti ada nga na aye ti kua ni.

 Ada ti ekole ni ayeke na abibliothèque, ando ti mandango ye, a-ordinateur, a-imprimante nga na ambeni ye ti kua. Mingi ni, mbeni salle à manger ayeke dä ti tene a-élève nga na a-instructeur ni ate ye place oko. Mbeni ndo ayeke nga dä ndali ti sarango sport nga na angia.

 A leke klase ni pendere mingi. Troy, so asara kua na LDC na Kota ndokua ti e na Warwick, na New York, atene: “E bâ lani aita ti ndokua ti a-ekole ti bungbi ti Jéhovah ti tene ala aidé e ti sara plan ti aklase so ayeke mû lege na a-élève ni ti duti à l’aise ti manda ye. Aita ni afa na e konongo ti aklase ni, fason so a yeke leke na yâ ni, mara ti lumière so alingbi na ni nga na aye ti audio/vidéo so a bezoin ni.” Na ndö ti tënë ti installation ti aye ti audio, Zoltán, mbeni instructeur ti EAR na Hongrie, atene: “Na début ni, e yeke lani na amicro ape, tongaso e yeke tene lani fani mingi na a-élève ni ti sara tënë na kota go. Me, fadeso na ndö ti table oko oko, mbeni micro ayeke dä. A leke problème ni awe.”

 So a leke ada ni pendere so asara nyen na ndö ti a-instructeur nga na a-élève ni? Angela, so ague na EAR na Palm Coast, Floride, na États-Unis, atene: “A yeke mbeni ndo so ayeke kpô mingi. Aye ni kue ayeke tâ bien, andu klase ni nga na achambre ti e, tongaso si e peut ti zia li ti e na ndö ti mandango ye ni.” Csaba, so ayeke mbeni instructeur na Hongrie, a-apprécié temps ti tengo kobe na a-élève ni mingi. Lo tene so na a-occasion tongaso, “a-élève ni ayeke fa atënë ti bê ti ala na e nga ala yeke fa aye so asi na ala. Ye so asara si e hinga ala nzoni na e peut ti fa ye nzoni mingi alingbi na bezoin ti ala.”

 A-élève nga na a-instructeur abâ ada so a leke ni ti ga ada ti ekole tongana mbeni tufa so alondo na Jéhovah, “Kota maître” ti e (Ésaïe 30:20, 21). Mbeni ita-wali na Philippines so asara ekole ti EAR, na yâ ti mbeni da so a leke ni ti ga da ti ekole, atene: “Ekole ni arappelé e so e yeke gï a-élève ape, me e yeke a-invité ti Jéhovah so ayeke spécial. Lo ye ti tene e duti nzoni nga na ngia na temps so e yeke manda Tënë ti lo.”

 E wara lege ti leke ada ti ekole, ti kiri ti leke peko ti ambeni nga ti bâ lege ni, grâce na a-offrande ti ala, so mingi ni ala yeke mû ni na lege ti donate.pr418.com. Merci mingi ndali ti bi bê ti mungo ye ti ala.