Mbeni ita-wali, so iri ti lo ayeke Nicole na Colombie, atene: “Mbi ye Da ti Royaume ti e mingi. A yeke ndo so mbi na aita, e peut ti wara terê dä.” Eskê mo kue mo pensé tongaso?

 Na yâ ti dunia kue, aTémoin ti Jéhovah ayeke sara bungbi na yâ ti aDa ti Royaume ahon 63 000. Ada so amû lege na e ti voro Nzapa na yâ ti mbeni ndo so ayeke nzoni. Me, e yeke sara aye mingi dä. David, mbeni pionnier permanent so ayeke na Colombie, atene: “Ada ti Royaume ti e asara si azo akiri aye afango ye ti e mingi. Mingi ti azo so asara vizite ni ayeke étonné ti bâ tongana nyen la e bâ lege ti da ni nzoni mingi.” Ye ni so ayeke ga gï tongaso ape. E sara kua ngangu ti nettoyé aDa ti Royaume ti e nga ti bâ lege ni nzoni. E yeke bâ lege ni tongana nyen?

 Acongrégation so ayeke sara bungbi na yâ ti Da ti Royaume ni la ayeke bâ lege ni. Ti sara ni, aita ayeke nettoyé aDa ti Royaume ti ala lakue. Ala yeke sara nga ambeni ye kozo ti bâ lege ni nga ti leke ambeni kete ye so abuba na terê ni.

 Ti mû maboko na acongrégation ti bata aDa ti Royaume ti ala, Service ti lekengo ada so ayeke na gbe ti mbeni filiale (LDC) ayeke formé aita ti bâ lege ni. Formateur oko oko ayeke bâ lege ti aDa ti Royaume omene ti si na bale-oko. Ita ni ayeke gue na ndo so aDa ti Royaume ni ayeke dä nga lo yeke formé awafango tënë ti yâ ti acongrégation ni ti tene ala bâ lege ti ada ni. Tongana ngu ota ahon, lo yeke gue ti contrôlé ada ni oko oko nga ti bâ akpale so andu tënë ti sécurité wala ati so a bezoin ti bâ lege ni.

 Aita akiri singila ndali aformation so ala wara so amû lege na ala ti bata da ni nzoni. Indhumathi, so ayeke mbeni ita-wali na Inde, atene: “Formation ni ayeke lani pendere mingi. A nzere lani na mbi ti hinga ye so e peut ti sara ti bâ lege ti salle ti e nzoni.” Evans, mbeni ita-koli so ayeke na Kenya, atene: “E manda lani comment ti kpe ti sara akota dépense na lege so e gi ti leke akete kpale hio kozo si aga akota kpale.”

 Ngu oko oko, adépense so a yeke sara ti bâ lege ti mbeni Da ti Royaume nga ti bata ni nzoni apeut ti hunda gbâ ti nginza, a na adépend na ndo so salle ni ayeke dä, a leke ni asara ngu oke nga acongrégation oke la ayeke sara bungbi dä. Tongana nyen la a yeke wara nginza ti sara na adépense so?

 A yeke bâ lege ti aDa ti Royaume na lege ti a-offrande. Alexander, mbeni ita-koli so ayeke na Kazakhstan, atene: “A yeke mû mbage ti a-offrande ni ti payé na Internet nga na ambeni ye, na tapande ngu nga na wâ. Mbeni mbage ni amû lege ti payé na ambeni ye tongana papier hygiénique, agant, aproduit ti nettoyage nga na peinture.” Ambeni nginza so a mû na offrande na yâ ti dunia kue ayeke aidé ti bâ na lege ti akota projet so abezoin gbâ ti nginza.

 Tongana a-ancien abâ so nginza so ala yeke dépensé ti bâ na lege ti mbeni Da ti Royaume ahon nginza so ala yeke dépensé ka ndali ti salle ni na yâ ti nze use wala nze ota, ala yeke hunda na LDC ti aidé ala. Tongana LDC ayeda na projet ni, mingi ni lo yeke sara kua na a-offrande so a mû na yâ ti dunia kue ti bâ na lege ti projet ni. Na yâ ti ngu ti kusala ti ngu 2023, ti bâ lege ti aprojet 8 793, a bezoin lani million 76 na ndambo ti dollar ndali ni (46 029 947 200 FCFA). Bâ ambeni projet ni use.

 Na Angola, mbeni Da ti Royaume so asara lani ngu 15 abuba mingi. A bezoin ti changé système ti courant ni, amur ni asuru nga avoizin so ayeke na terê ti salle ni atene so ngu ni ayeke yuru ague na ndo ti ala. LDC aleke lani ti tene a leke akpale ni so. A bezoin dollar 9 285 (5 629 713 FCFA) ndali ti projet ni. Avoizin ni atene lani merci, nga fason so a sara na kua ni a-étonné ala.

 Na Pologne, li ti mbeni Da ti Royaume ayeke yuru lani nga atapis ni abuba kue. LDC ayeda ti tene a kiri a leke li ti da ni nga a changé atapis ni. A bezoin lani dollar 9 757 (5 915 897 FCFA) ndali ti projet ni. Grâce na akua so a sara, a bezoin ape ti kiri ti leke peko ti ambeni ye na terê ti Da ti Royaume ni teti angu mingi.

 Bango lege ti aDa ti Royaume ti e amû lege ti sara kua nzoni na a-offrande, me a yeke mû nga gonda na Jéhovah. Shaun, mbeni ita-koli so ayeke na Tonga, atene: “Grâce na akua so a sara, e yeke voro Jéhovah na yâ ti mbeni Da ti Royaume so ayeke propre, aye kue ayeke na lege ni nga ayeke nzoni, ye so asara si a mû gonda na iri ti Jéhovah na yâ ti ndo. Anzere na e ti invité azo na Da ti Royaume ti e.”

 E kue e peut ti aidé ti nettoyé ndo so e yeke voro Jéhovah dä nga ti bâ lege ni. Marino, mbeni formateur so ayeke bâ lege ti Da ti Royaume, atene: “E kue e peut ti bâ lege ti aDa ti Royaume ti e. Tongana e sara ni, e yeke mû lege ti tene a bata nginza mingi nga ti tene a sara kua na a-offrande ni na ndo so vraiment bezoin ayeke dä.”

 Anzere mingi na Joel, mbeni ita-koli so ayeke na Inde, ti bâ lege ti Da ti Royaume ti ndo so lo yeke dä. Lo tene: “Tongana mbi yeke sara kua legeoko na aita ti mbi a-aidé mbi ti imaginé tongana nyen la gigi ayeke duti ande na yâ ti fini dunia.” Nicole, so e sara tënë ti lo fade, atene: “Ade ti ninga ape, na temps so aita ayeke gi ti leke ngu so ayeke yuru na yâ ti douche, mbi yeke essuyé ndo ni. Même si mbi la mbi leke ye ni so ape, mbi aidé ti tene mbeni zo atï ape.”

 Tongana mo ye ti duti volontaire ti tene mo aidé na bango lege ti Da ti Royaume ti ndo so mo yeke dä, sara tënë ni na a-ancien ti congrégation ti mo. Na ndö ni, a-offrande so ayeke aidé ti tene a bâ na lege ti Da ti Royaume ti ndo so mo yeke dä nga na ti ambeni Da ti Royaume na yâ ti dunia kue. A yeke zia a-offrande so na yâ ti aboîte ti Da ti Royaume ti ndo so mo yeke dä wala a yeke mû ni na lege ti donate.pr418.com. E tene merci mingi na ala ndali ti bibe ti mungo ye so ala yeke na ni.