1 Timothée 4:1-16
4 Ye oko, tënë so alondo na yingo vulu atene biani so na yâ ti angoi so ayeke ga ande, ambeni zo ayeke dö lege ti mabe azia ndali ti so ala dengi mê na atënë ti handango zo so alondo na ayingo, nga na afango ye ti asioni yingo.
2 Ala dö lege ti mabe ni azia ngbanga ti sarango ye ti azo so ayeke tene mvene si ayeke sara ye ti handa lê ti azo, ala so yingo-ti-hinga ti ala amü mo bâ mo tene a zö ni na wen so a yôro na yâ ti wâ si a be.
3 Ala ke na azo ti sara mariage nga ala mû yanga na azo ti gbanzi tere ti ala na akobe so Nzapa aleke ti tene azo so ayeke na mabe nga so ahinga tâ tënë mbilimbili ate ni na kiringo singila na lo Nzapa.
4 Biani, aye kue so Nzapa asara ayeke nzoni mingi, na mbeni ye ti tene zo ake ni ayeke dä pëpe tongana zo ate ni na kiringo singila na Nzapa,
5 teti na lege ti tënë ti Nzapa nga na lege ti sambela so a sara na ndo ni, kobe ni so aga nzoni-kue awe.
6 Tongana mo yeke mû awango so na aita, fade mo yeke ga tâ nzoni wakua ti Christ Jésus, so kobe ti tengo ti mo ayeke atënë ti mabe nga na nzoni fango ye so mo yeke mû tâ gi pekoni.
7 Ye oko, mo ke ambaï ti mvene so abuba nengo ti ye so ayeke nzoni-kue, so ambakoro-wali ayeke tene ni. Me mo tara tere ti mo tongana ti mbeni wanguru na ziango na gbele mo ti gbu tënë ti Nzapa ngangu.
8 Teti tarango tere na lege ti ngia ti awanguru ayeke sara nzoni na zo gi kete; me gbungo tënë ti Nzapa ngangu ayeke sara nzoni na zo na yâ ti aye kue, teti a yeke na zendo ti fini ti laso nga ti so ayeke ga.
9 Tënë so, zo alingbi ti zia bê ti lo na ndo ni nga a lingbi ti tene zo ayeda na ni kue.
10 Ndali ti tënë so si e yeke sara kua ngangu na e yeke tirika ngangu ngbanga ti so e zia beku ti e na ndo ti mbeni Nzapa so ayeke na fini, lo so ayeke Sauveur ti mara ti azo nde nde kue, na mbilimbili, ti azo so ayeke be-ta-zo.
11 Ngbâ ti mû yanga na azo na ndo ti aye so nga ngbâ ti fa ni.
12 Zia lege oko pëpe na mbeni zo ti bâ mo tongana mbumbuse zo ndali ti so mo de maseka. Me mo ga mbeni tapande ndali ti azo so ayeke be-ta-zo, na lege ti tënë ti yanga ti mo, sarango ye ti mo, ndoye so mo yeke na ni, na lege ti mabe nga na dutingo so ayeke na sioni oko pëpe.
13 Ti ku na singo ti mbi, mo ngbâ ti mû bê ti mo kue na dikongo mbeti na gbele azo, na mungo wango na ala nga na fango ye na ala.
14 Mo sara mbana pëpe na matabisi so a mû na mo na lege ti tënë ti prophétie na ngoi so bungbi ti a-ancien azia maboko ti ala na ndo ti mo.
15 Mo gbu li ti mo na ndo ti aye so, mo bi tere ti mo kue na yâ ni, si azo kue abâ maïngo ti mo.
16 Mo sara hange lakue na aye so abâ mo nga na fango ye ti mo. Mo ngbâ gi dä, teti na sarango tongaso fade mo yeke sö ande mo wani nga na ala so ayeke mä mo.
