1 Timothée 5:1-25
5 Mo suku ngangu mingi pëpe na mbeni mbakoro-koli. Me, mo voro yanga na lo tongana babâ ti mo; mo voro yanga na amaseka-koli tongana aita ti mo ti koli,
2 mo voro yanga na ambakoro-wali tongana amama ti mo; mo voro yanga na amaseka-wali tongana aita ti mo ti wali, mo sara ni na bê so ayeke tâ nzoni-kue.
3 Mo ne awomua so ayeke awomua biani.
4 Me tongana mbeni womua ayeke na amolenge wala na atarä, zia ala manda kozoni kue ti gbu tënë ti Nzapa ngangu na popo ti azo ti da ti ala, na ti ngbâ ti kiri peko ti anzoni ye so ababâ na amama ti ala nga na a-âta ti ala asara ândö na ala, teti ye so ayeke nzoni na lê ti Nzapa.
5 Wali so ayeke womua biani nga so lo yeke na mbeni ye pëpe azia beku ti lo na ndo ti Nzapa, na lo ngbâ lakue ti voro tere na Nzapa nga ti sambela lo bï na lâ.
6 Me ti womua so amû tere ti lo na yâ ti ngia ti wara nzerengo tere, lo kui awe atâa so lo yeke na fini.
7 Tongaso mo ngbâ ti mû yanga na ala na ndo ti aye so, si ala duti na tënë na li ti ala pëpe.
8 Ti tâ tënë ni, tongana mbeni zo abata azo ti lo pëpe, na mbilimbili azo ti da ti lo, lo dö lege ti mabe lo zia awe, na sioni ti lo ahon ti zo so amä na bê pëpe.
9 Ti diko mbeni womua na popo ti ala so ayeke awomua biani, a lingbi a diko lo so ngu ti lo ayeke na gbe ti ngu bale-omene pëpe nga lo yeke ândö wali ti koli oko,
10 a sara nzoni tënë ti lo ndali ti apendere kua so lo sara, tongana lani lo bata amolenge, lo yamba agene, lo sukula gere ti azo so ayeke nzoni-kue, lo dë bê ti azo so ayeke na yâ ti ye ti vundu, lo sara nzoni kusala kue na bê ti lo kue.
11 Me ti awomua so ade maseka, mo diko ala pëpe, teti tongana nzara ti tere ti ala aga aluti na popo ti ala na Christ, ala ye ti sara mariage,
12 na ala iri ngbanga na ndo ti ala ndali ti so ala bâ na nene ni pëpe kozo yanga so ala mû na lege ti mabe.
13 Na oko ngoi ni, ala manda ti duti senge senge, ti tambela na yanga-da ti azo; biani, ala duti gi senge senge pëpe, me ala yeke diko kpere-kpere na ala yeke yôro yanga ti ala na yâ ti atënë ti ambeni zo, nga ala yeke sara tënë ti aye so a lingbi ala tene ni pëpe.
14 Ni la, mbi ye si awomua so ade maseka asara mariage, ala bata amolenge, ala fa lege na azo ti da ti ala nga ala mû lege pëpe na wato ti zonga e.
15 Ti tâ tënë ni, ambeni adö lege ni azia awe ti mû peko ti Satan.
16 Tongana mbeni wali so amä na bê ayeke na awomua na yâ ti sewa ti lo, zia lo wani lo mû maboko na ala, na kungba ni aduti na ndo ti congrégation pëpe. Tongaso, congrégation ayeke wara lege ti mû maboko na ala so ayeke awomua biani.
17 A-ancien so ayeke fa lege nzoni, zia a bâ ala tongana azo so alingbi ti wara gonda fani use, mbilimbili ala so ayeke sara kua ngangu na lege ti tënë ti yanga ti ala nga na lege ti fango ye ti ala.
18 Teti tënë ti Mbeti ti Nzapa atene: “A yeke nzoni mo kanga yanga ti bagara pëpe na ngoi so lo yeke sara kua na ndo so a yeke soso alê ti kobe dä.” Nga a tene: “Zo ti kua alingbi na futa ti lo.”
19 Yeda pëpe na tënë so a bi na li ti mbeni ancien, me mo yeda na ni gi tongana atémoin use wala ota ayeda na tënë so a bi na li ti lo.
20 Ala so angbâ na yâ ti siokpari, mo suku na ala na lê ti azo kue, si tanga ti azo ni nga asara mbeto.
21 Mbi wa mo mingi na lê ti Nzapa, na lê ti Christ Jésus nga na lê ti a-ange so Nzapa asoro ala, ti bata aye so na fango ngbanga na ndo ni na yâ ti bê ti mo kozoni pëpe, na bango yâ ti azo bango pëpe tongana mo yeke sara ye na ala.
22 Mo dö tere lâ oko pëpe ti zia maboko ti mo na li ti mbeni zo; nga mo yô mbage ti siokpari ti mbeni zo pëpe; bata tere ti mo nzoni-kue.
23 Mo nyon ngu mbeni pëpe, me mo nyon vin kete ndali ti yâ ti mo nga ndali ti kobela so ayeke sara mo lakue.
24 Asiokpari ti ambeni zo ayeke sigigi polele na gbele azo, na a yeke gue gi hio na ngbanga; me ti ambeni zo, asiokpari ti ala nga ayeke sigigi na pekoni ande.
25 Legeoko nga, anzoni kusala ayeke sigigi polele na lê ti azo, nga ti anzoni kusala so a bâ ni pëpe, a lingbi ti ngbâ ande gi na hondengo ni pëpe.
