1 aCorinthien 15:1-58
15 Aita, fadeso mbi yeke tene na ALA tënë na ndo ti nzoni tënë so mbi fa lani na ALA, so ALA wara ni nga so ALA ngbâ na yâ ni.
2 Na lege ti nzoni tënë ni so ALA mä na yanga ti mbi, a yeke sö fini ti ALA fadeso tongana ALA gbu ni ngangu. Tongana a yeke tongaso pëpe, andâ ALA ga azo so amä na bê gi senge senge.
3 Teti, na popo ti aye so ayeke akozo ye ni, mbi fa na ALA ye so mbi nga mbi wara: Christ akui ndali ti asiokpari ti e alingbi na tënë ti Mbeti ti Nzapa.
4 Biani a lu lo, na a zingo lo na kuâ na ota lango ni a lingbi na tënë ti Mbeti ti Nzapa.
5 Lo si na Céphas, na pekoni lo si na adisciple bale-oko na use.
6 Na pekoni, lo si na aita ahon ngbangbo oku na ngoi oko; mingi ti aita so angbâ na fini juska laso, me ambeni akui* awe.
7 Na peko ti ye so, lo si na Jacques, nga na pekoni lo si na abazengele kue.
8 Me ndangba ti azo ni kue so lo si na lo ayeke mbi; lo si na mbi tongana zo so ayeke mbeni molenge so a dü lo kozo si ngoi ti dungo lo alingbi.
9 Mbi yeke zo so ayeke kete mingi na popo ti abazengele ni kue, na mbi lingbi pëpe ti tene a iri mbi bazengele, ngbanga ti so mbi sara lani ye ti ngangu na congrégation ti Nzapa.
10 Me na lege ti kota nzobe ti Nzapa mbi ga zo so ALA yeke bâ lo fadeso. Nga, kota nzobe ti Nzapa na mbage ti mbi angbâ senge senge pëpe, me mbi sara kua ngangu mingi ahon ala kue. Ye oko, a yeke mbi si mbi sara kua tongaso pëpe, me a yeke kota nzobe ti Nzapa so ayeke na mbi si asara ni.
11 Me, atâa a yeke mbi wala ambeni bazengele ni, a yeke tongaso si e yeke fa tënë nga a yeke tongaso si ALA mä na bê.
12 Tongana e yeke fa tënë e tene so a zingo Christ na kuâ awe, a sara tongana nyen si na popo ti ALA ambeni zo ayeke tene so zingongo ti akuâ ayeke dä pëpe?
13 Biani, tongana zingongo ti akuâ ayeke dä pëpe, andâ a zingo nga Christ na kuâ pëpe.
14 Me tongana a zingo Christ na kuâ pëpe, biani tënë so e yeke fa ayeke senge senge, na mabe ti e ayeke senge senge.
15 Nga, tongana biani a yeke zingo ande akuâ pëpe, andâ Nzapa azingo Christ lani na kuâ pëpe. Na a yeke bâ e tongana azo so ayeke sara tënë ti wataka na li ti Nzapa, ngbanga ti so e tene lo zingo Christ na kuâ.
16 Teti tongana a yeke zingo ande akuâ pëpe, andâ Christ kue a zingo lo na kuâ pëpe.
17 Na ndo ni, tongana a zingo Christ na kuâ pëpe, mabe ti ALA ayeke ye senge nga ALA ngbâ lakue na yâ ti asiokpari ti ALA.
18 Biani, a ye ti tene nga so ala so akui beoko na Christ, ti ala ahunzi awe.
19 Tongana a yeke gi na yâ ti fini so la si e yeke na beku na Christ, andâ e yeke azo so mawa ti e ahon ti tanga ti azo kue.
20 Me, biani a zingo Christ na kuâ awe, na lo yeke kozo li ni ti azo so akui.
21 Teti so kuâ aga na lege ti koli oko, zingongo ti akuâ aga nga na lege ti koli oko.
22 Legeoko tongana ti so na yâ ti Adam ala kue akui, tongaso nga na yâ ti Christ ala kue ayeke wara fini.
23 Me zo oko oko na molongo ti lo: Christ kozo li ti ye ni, na pekoni ala so ayeke ti Christ na ngoi so lo yeke si na lo yeke duti dä.
24 Nga, tongana lo futi angorogbia kue, akomandema kue nga na ngangu kue awe, na nda ni, lo yeke mû ande royaume ni na Lo so ayeke Nzapa nga Babâ ti lo.
25 Teti a lingbi lo komande tongana gbia juska Nzapa azia awato ti lo kue na gbe ti gere ti lo.
26 Ti kuâ so ayeke ndangba wato ni, fade a yeke futi lo biaku biaku.
27 Teti Nzapa “azia ye kue awe na gbe ti gere ti lo.” Me tongana a tene so ‘a zia aye kue na gbe ti lo’, a yeke polele so zo ti ziango aye ni kue na gbe ti lo ayeke ti lo na yâ ni pëpe.
28 Me tongana aye kue aga ande na gbe ti lo awe, fade Molenge ni nga ayeke duti na gbe ti Lo so azia aye kue na gbe ti lo Molenge ni, si Nzapa aga aye kue teti zo oko oko kue.
29 Tongana ye ni ayeke tongaso pëpe, ala so a yeke batize ala ti tene ala duti akuâ, fade ala yeke sara ande nyen? Tongana a yeke zingo akuâ oko pëpe, ngbanga ti nyen a ngbâ nga ti batize ala ti tene ala duti tongaso?
30 Ngbanga ti nyen fini ti e nga ayeke lakue na lê ti kuâ?
31 Lâ na lâ mbi yeke bâ kuâ lê na lê, tâ gi tongana ti so mbi yeke na ngia mingi ndali ti ALA na yâ ti Christ Jésus Seigneur ti e.
32 So mbi tiri na anyama ti ngonda na Éphèse tongana ti so ambeni zo asara, ye ti nzoni wa mbi wara na pekoni? Tongana a yeke zingo akuâ pëpe, “zia e te na e nyon ngbanga ti so kekereke e yeke kui kuingo.”
33 Zia ambeni zo ahanda ALA pëpe. Ti sara songo na asioni zo ayeke buba anzoni sarango ye ti zo.
34 ALA zingo, zia li ti ALA aga dä, a lingbi na lege so ayeke mbilimbili nga ALA ngbâ na yâ ti siokpari pëpe, teti ambeni zo ahinga ye oko pëpe na ndo ti Nzapa. Mbi yeke sara tënë so ti zia kamene na lê ti ALA.
35 Ye oko, mbeni zo ayeke tene ande, a tene: “A yeke zingo akuâ tongana nyen? Mara ti tere wa si ala yeke zingo na ni?”
36 Mo zo so li ti mo ayeke dä pëpe so! Ye so mo lu ayeke kiri na fini gi tongana a kui si.
37 Ti mo, ye so mo lu, mo lu pëpe tere ni so ayeke maï ande, me senge lê ni; a lingbi ti duti lê ti blé wala mbeni lê ti kobe nde.
38 Me Nzapa ayeke mû na lê ti kobe ni mbeni tere tongana ti so bê ti lo aye, nga lo yeke mû na angongoa oko oko tere so alingbi na angongoa ni.
39 Mi kue ayeke legeoko pëpe, mi ti azo ayeke nde, mi ti anyama ayeke nde, mi ti andeke na ti asusu ayeke nga nde nde.
40 Atere so ayeke ti yayu ayeke dä, na atere so ayeke ti sese ayeke nga dä; me gloire ti atere so ayeke ti yayu ayeke nde, nga gloire ti atere so ayeke ti sese ayeke nde.
41 Gloire ti lâ ayeke nde, gloire ti nze ayeke nde na gloire ti atongoro ayeke nga nde. Biani, gloire ti mbeni tongoro ayeke nde na ti mbeni.
42 Zingongo ti akuâ ayeke nga tongaso. A lu tere ni tere so ayeke buba bubango, na a zingo ni tere so alingbi ti buba pëpe.
43 A lu ni na yâ ti kamene, a zingo ni na yâ ti gloire. A lu ni na yâ ti wokongo, a zingo ni na yâ ti ngangu.
44 A lu ni tere so ayeke ti zo ti sese, a zingo ni tere so ayeke ti yingo. Tongana tere so ayeke ti zo ti sese ayeke dä, tere so ayeke ti yingo ayeke nga dä.
45 A sû même tënë so na Mbeti ti Nzapa, a tene: “Kozo koli, Adam, aga mbeni âme so ayeke na fini.” Ndangba Adam aga mbeni yingo so amû fini.
46 Ye oko, kozo tere ni ayeke ti yingo pëpe, me a yeke tere so ayeke ti zo ti sese; na tere so ayeke ti yingo aga na pekoni.
47 Kozo koli ni ayeke ti sese na a leke lo na fuku ti sese. Use koli ni ayeke ti yayu.
48 Ala so a leke ala na fuku ti sese ayeke nga tongana lo so a leke lo na fuku ti sese; ala so ayeke ti yayu ayeke nga tongana lo so ayeke ti yayu.
49 Gi tongana ti so e kpa lo so a leke lo na fuku ti sese, fade e yeke kpa nga lo so ayeke ti yayu.
50 Ye oko, aita, mbi yeke tene tënë so na ALA: mitele na mênë alingbi pëpe ti lï na yâ ti royaume ti Nzapa, wala tere so ayeke buba bubango alingbi pëpe ti wara tere so alingbi ti buba pëpe.
51 Bâ, mbi yeke sara na ALA tënë ti mbeni ye so Nzapa ahonde nda ni: E kue e yeke lango na yâ ti kuâ pëpe, me ti e kue, fade a yeke gbian tere ti e,
52 gi hio tongaso, tongana ti so zo ayeke ko lê ti lo, na ngoi ti ndangba trompette. Teti trompette ayeke toto ande na a yeke zingo akuâ na mbeni tere so alingbi ti buba pëpe, na fade a yeke gbian tere ti e ande.
53 Teti a lingbi tere so ayeke buba bubango ayü tere so alingbi ti buba pëpe, na a lingbi tere so ayeke kui kuingo ayü fini so alingbi ti hinga kuâ pëpe.
54 Me na ngoi so tere so ayeke buba bubango ayü tere so alingbi ti buba pëpe, na tere so ayeke kui kuingo ayü fini so alingbi ti hinga kuâ pëpe, na ngoi ni so tënë so a sû na Mbeti ti Nzapa ayeke ga ande tâ tënë, so atene: “A mene kuâ biaku biaku awe.”
55 “Kuâ, songo benda ti mo ni ayeke na ndo wa? Kuâ, kî ti mo so mo yeke kpo na zo ayeke na ndo wa?”
56 Siokpari ayeke kî so akpo zo na kuâ, me ngangu ti siokpari alondo na Ndia.
57 Me singila na Nzapa, teti so lo sara si e sö benda na lege ti Seigneur ti e Jésus Christ!
58 Ndani la, aita ti mbi so mbi ndoye ALA mingi, ALA luti ngangu, ALA yengi pëpe, ALA duti lakue na ye mingi ti sara na yâ ti kusala ti Seigneur; na tongana a yeke tënë ti aye ti Seigneur, zia ALA hinga so ngangu kua so ALA sara ayeke ngbâ senge senge pëpe.
Akete tënë na terê ni
^ Na Grec: “alango (na yâ ti kuâ).”
