1 aCorinthien 16:1-24
16 Na ndo ti tënë ti bungbingo nginza ndali ti azo so ayeke nzoni-kue, ALA sara nga gi tongana ti so mbi mû lani yanga na acongrégation ti Galatie ti sara.
2 Na kozo lango ti yenga oko oko, zia zo oko oko azi mbeni ye abata na da ti lo a lingbi na ye so lo yeke na ni, si tongana mbi si kâ a lingbi ande ti bungbi nginza na ngoi ni so pëpe.
3 Me tongana mbi si kâ, akoli kue so ALA sara nzoni tënë ti ala na mbeti, ala si fade mbi yeke tokua ala na Jérusalem na matabisi so ALA mû na nzoni bê.
4 Ye oko, tongana a yeke nzoni ti tene mbi kue mbi gue kâ, fade mbi na ala e gue.
5 Me tongana mbi hon na yâ ti Macédoine awe fade mbi yeke si na ALA kâ, teti mbi leke ti hon na yâ ti Macédoine ni.
6 Peut-être mbi yeke duti ande na ALA teti kete ngoi, wala mbi yeke duti na ALA na ngoi ti dê ni kue, si ALA lingbi ti zia mbi na lege ti gue na ndo so mbi ye ti gue dä so.
7 Teti mbi ye ti bâ gi ALA bango ti hon pëpe, me mbi yeke na beku ti ngbâ ngoi kete na tere ti ALA, tongana Jéhovah aye.
8 Me mbi ngbâ na Éphèse juska na matanga ti Pentecôte;
9 ngbanga ti so mbeni kota yanga-da azi na mbi ti sara kusala, me azo ti kangango lege ayeke mingi.
10 Ye oko, tongana Timothée asi, ALA bâ si lo duti na popo ti ALA na mbeto pëpe, ngbanga ti so lo nga lo yeke sara kusala ti Jéhovah tongana ti so mbi yeke sara.
11 Tongaso zia mbeni zo abâ lo tongana mbumbuse zo pëpe. ALA zia lo na lege na yâ ti siriri, si lo ga na mbi ge, ngbanga ti so mbi yeke ku lo legeoko na aita.
12 Âdu ti ita ti e Apollos, mbi voro yanga na lo mingi ti gue na ALA kâ legeoko na aita ni, me a yeke tâ ti bê ti lo pëpe ti gue fadeso; me fade lo yeke gue kâ tongana lo wara lege ni.
13 Zia lê ti ALA angbâ na zingo ni, ALA luti ngangu na yâ ti mabe, ALA sara ye tongana akoli, ALA kpengba.
14 Zia ALA sara aye ti ALA kue na ndoye.
15 Ti fadeso, aita, mbi mû wango so na ALA: ALA hinga so a yeke azo ti dä ti Stéphanas si ayeke akozo li ti ye ti Achaïe nga so ala mû tere ti ala ti sara kua na azo so ayeke nzoni-kue.
16 Zia ALA nga ALA ngbâ ti woko tere na gbe ti mara ti azo tongaso nga na gbe ti azo kue so ayeke sara ye maboko na maboko nga ayeke sara kua ngangu.
17 Me mbi yeke na ngia teti so Stéphanas, Fortunatus na Achaïcus ayeke dä na tere ti mbi, ngbanga ti so ala kanga dû ti peko ti ALA, so ALA yeke dä pëpe so.
18 Teti ala dë bê ti mbi na ti ALA. Tongaso zia ALA bâ azo tongaso na nene ni.
19 Acongrégation ti kodoro-komanda ti Asie atokua bara na ALA. Aquila na Prisca nga na congrégation so ayeke na da ti ala abara ALA mingi mingi na yâ ti Seigneur.
20 Aita kue abara ALA. ALA bara tere na popo ti ALA na ALA su ngbangba ti mba tongana aita.
21 So bara ti mbi Paul la, so mbi wani mbi sû na maboko ti mbi.
22 Tongana mbeni zo aye Seigneur pëpe, zia lo ga zo so a deba lo awe. Ô Seigneur ti e, mo ga!
23 Zia kota nzobe ti Seigneur Jésus aduti na ALA.
24 Zia ndoye ti mbi aduti na ALA kue so asara beoko na Christ Jésus.
