1 aCorinthien 5:1-13
5 Biani, a tene so lango-sioni ayeke na popo ti ALA, mbeni mara ti lango-sioni so ayeke même pëpe na popo ti amara: mbeni koli ayeke duti na wali ti babâ ti lo.
2 Na baba ahon ndo ti ALA? A lingbi ALA sara fade vundu ti tene a lungula na popo ti ALA koli so asara ye so pëpe?
3 Ti mbi, atâa so mbi yeke dä pëpe na mitele, me na yingo mbi yeke na tere ti ALA, mbi fâ ti mbi ngbanga awe na ndo ti koli so asara mara ti ye tongaso mo bâ mo tene mbi yeke na tere ti ALA,
4 si, tongana ALA bungbi tere ti ALA, nga so yingo ti mbi na lege ti ngangu ti Seigneur ti e Jésus ayeke na ALA, na iri ti Seigneur ti e Jésus
5 ALA zia mara ti zo tongaso na maboko ti Satan ti lungula ye so ayeke ti mitele si a sö bibe ni na lâ ti Seigneur.
6 Nda ti tënë ti pikango kate ti ALA ni ayeke nzoni pëpe. ALA hinga pëpe so kete mama ti mapa asara si mengo farine ni kue asuku?
7 ALA zi ngbene mama ti mapa ni tongaso si ALA duti mbeni fini mengo farine, legeoko tongana ti so ALA yeke na mama ti mapa na tere ti ALA pëpe. Biani, a mû Christ, ngasangbaga ti Pâque ti e, a fâ lo awe.
8 Ndani la, zia e ngbâ ti sara matanga ni na ngbene mama ti mapa pëpe, wala na mama ti mapa ti sioni na ti siokpari pëpe, me na amapa so a sara na mama ni pëpe, amapa ti vuru bê na ti tâ tënë.
9 Na yâ ti mbeti ti mbi, mbi tene na ALA ti zia ti sara songo na azo ti sarango lango-sioni.
10 Mbi tene pëpe ti ke biani biani ti sara songo na azo ti sarango lango-sioni ti dunia so, wala azo ti sarango bê ti ye, azo ti mungo ye ti zo na likisi wala azo ti vorongo ayanda. Tongana tënë ti mbi ni ayeke tongaso, andâ a lingbi ALA sigigi na yâ ti dunia so biani.
11 Me ti fadeso, mbi yeke sara mbeti na ALA ti tene ALA zia ti sara songo na mbeni zo so a iri lo ita na so lo yeke zo ti sarango lango-sioni, wala zo ti sarango bê ti ye, wala zo ti vorongo ayanda, wala zo ti zongango ndo, wala ngbâa ti sämba, wala zo ti mungo ye ti zo na likisi, na même ti tene ALA te kobe na mara ti zo tongaso pëpe.
12 Ti mbi dä nyen ti fâ ngbanga ti azo ti gigi? A yeke ti ALA ti fâ ngbanga ti azo so ayeke na yâ ni pëpe?
13 na ti azo ti gigi, Nzapa si ayeke fâ ngbanga ti ala pëpe? “ALA zi zo ti sioni na popo ti ALA.”
