1 aCorinthien 7:1-40
7 Fadeso, ti aye so ALA sû mbeti na mbi na ndo ni, a yeke duti nzoni ti tene mbeni koli andu wali pëpe.
2 Me teti so lango-sioni ahon ndo ni, zia koli oko oko ayeke na wali ti lo wani, na zia wali oko oko ayeke na koli ti lo wani.
3 Zia koli amû ye ti wali ti lo na lo, na zia wali nga asara tongaso na koli ti lo.
4 Wali ayeke na komandema na ndo ti tere ti lo wani pëpe, me a yeke koli ti lo si ayeke na komandema na ndo ni. Nga, koli ayeke na komandema na ndo ti tere ti lo wani pëpe, me a yeke wali ti lo si ayeke na komandema na ndo ni.
5 ALA gbanzi tere ti ALA na popo ti ALA pëpe, ALA gbanzi tere ti ALA gi tongana ALA use kue amä tere ti sara tongaso teti mbeni ngoi, ti tene ALA mû ngoi ndali ti sambela na ALA kiri ALA bungbi, tongaso si Satan angbâ ti tara ALA pëpe ndali ti so ALA kanga nzara ti tere ti ALA pëpe.
6 Mbi tene tongaso ti mû lege na ALA ti sara ni, me mbi gbu ALA na ngangu pëpe.
7 Mbi ye si azo kue aduti tongana mbi. Ye oko, zo oko oko ayeke na matabisi ti lo so Nzapa amû na lo, ti mbeni ayeke tongaso, ti mbeni nga ayeke nde.
8 Na ala so ade ti sara mariage pëpe nga na awomua, mbi tene tënë so: a yeke nzoni ala ngbâ tongana mbi.
9 Me tongana ala lingbi ti hon ndo ti nzara ti bê ti ala pëpe, zia ala sara mariage, teti a yeke nzoni mingi ti sara mariage ahon ti tene nzara ti tere ti ala ahon ndo* ti ala.
10 Mbi mû wango so na ala so asara mariage awe, na wango ni alondo na mbi pëpe, me na Seigneur: a yeke nzoni mbeni wali akangbi na koli ti lo pëpe.
11 Me tongana a si so lo kangbi na lo, zia lo mû mbeni koli pëpe wala zia lo kiri lo leke songo na koli ti lo. Nga, a yeke nzoni mbeni koli azia wali ti lo pëpe.
12 Mbi tene tënë so na atanga ni, tënë ni alondo na Seigneur pëpe, me na mbi: Tongana mbeni ita-koli ayeke na mbeni wali so amä na bê pëpe, na wali ni aye ti ngbâ na lo, a yeke nzoni lo zia wali ni pëpe.
13 Nga, tongana mbeni wali ayeke na koli so amä na bê pëpe, na koli ni aye ti ngbâ na lo, a yeke nzoni lo zia koli ti lo pëpe.
14 Mbeni koli so amä na bê pëpe ayeke ga nzoni-kue ndali ti wali ti lo, na mbeni wali so amä na bê pëpe ayeke ga nzoni-kue ndali ti koli ti lo; tongana a yeke tongaso pëpe ka amolenge ti ALA ayeke duti sioni, me fadeso amolenge ni ayeke nzoni-kue.
15 Me tongana koli wala wali so amä na bê pëpe aye ti kangbi na ita ni, zia lo kangbi na lo. Na yâ ti mara ti ye tongaso, mbeni ye ti kanga ita-koli ni wala ita-wali ni na lo ayeke dä pëpe, me ti ALA Nzapa airi ALA ti duti na siriri.
16 Mo wali, mo hinga tongana nyen so mo yeke sö ande koli ti mo pëpe? Wala mo koli, mo hinga tongana nyen so mo yeke sö ande wali ti mo pëpe?
17 Ye oko, teti so Jéhovah amû mbeni mbage ti ye na zo oko oko, zia zo kue atambela tongana ti so Nzapa airi na lo. Na a yeke yanga so mbi mû na acongrégation kue.
18 Mbeni zo afâ ganza awe si a iri lo? Zia lo ngbâ gi tongaso. Mbeni zo ade ti fâ ganza pëpe si a iri lo? Zia lo ga pëpe zo so afâ ganza.
19 Fango ganza ayeke mbeni ye pëpe, na fango ganza pëpe ayeke nga mbeni ye pëpe, kota ye ni ayeke batango acommandement ti Nzapa.
20 Atâa mbeni zo ayeke na yâ ti dutingo wa si a iri na lo, zia lo ngbâ gi tongaso.
21 A iri mo na ngoi so mo yeke lani ngbâa? Zia mo gi bê ti mo dä pëpe. Me tongana mo lingbi ti sigigi na gbe ni, mo sigigi biani.
22 Teti, na yâ ti Seigneur, zo kue so a iri lo na ngoi so lo yeke lani ngbâa, lo yeke zo so Seigneur azi lo awe. Legeoko nga, zo so a iri lo na ngoi so lani lo yeke ngbâa pëpe, lo yeke ngbâa ti Christ.
23 A vo ALA lani vongo na mbeni ngere. Tongaso ALA zia ti ga angbâa ti azo.
24 Aita, atâa mbeni zo ayeke na yâ ti dutingo wa si a iri na lo, zia lo ngbâ gi tongaso na yâ ti songo ti lo na Nzapa.
25 Ti ala so ade ti hinga wali wala koli pëpe, mbi yeke na mbeni ndia ti Seigneur ti fa na ala pëpe, me mbi fa na ala bango ndo ti mbi tongana mbeni zo so Seigneur asara nzoni bê na lo si lo duti be-ta-zo.
26 Ni la, ndali ti akpale so ayeke na e ge, mbi bâ ti mbi so a yeke nzoni na mbeni koli ti ngbâ gi tongana ti so lo yeke duti na ni so.
27 A kanga mo na tere ti mbeni wali? Mo zia ti gi ti zi tere ti mo. A zi mo na tere ti mbeni wali awe? Mo zia ti gi ti wara mbeni wali.
28 Me tongana mo sara mariage biani, mo sara siokpari pëpe. Nga, tongana mbeni zo so ade ti hinga wali wala koli pëpe asara mariage, lo nga kue lo sara siokpari pëpe. Me ala so asara mariage ayeke wara aye ti vundu na yâ ti mitele ti ala. Me mbi ye ti zi ALA na yâ ni.
29 Nga, mbi tene tënë so na ALA, aita: Ngoi so angbâ ayeke mingi pëpe. Ni la, zia ala so ayeke na wali aduti mo bâ mo tene ala yeke na wali pëpe,
30 nga ala so atoto aduti tongana ala so atoto pëpe, ala so ayeke na ngia aduti tongana ala so ayeke na ngia pëpe, ala so avo ye aduti tongana ala so ayeke na ye pëpe,
31 ala so ayeke sara kusala na ye ti dunia so aduti tongana ala so ayeke sara kusala na ni kue pëpe; teti aye so ayeke si na yâ ti dunia so ayeke changé tere changengo.
32 Biani, mbi ye si ALA duti na gingo bê oko pëpe. Koli so asara mariage pëpe ayeke gi bê ti lo na ndo ti aye ti Seigneur ti bâ tongana nyen lo lingbi ti nzere na lê ti Seigneur.
33 Me koli so asara mariage awe ayeke gi bê ti lo na ndo ti aye ti dunia so ti bâ tongana nyen lo lingbi ti nzere na lê ti wali ti lo,
34 na bê ti lo ayeke use use. Na ndo ni, wali so asara mariage pëpe, nga wali so ade ti hinga koli pëpe, ayeke gi bê ti lo na ndo ti aye ti Seigneur, si lo duti nzoni-kue na yâ ti tere ti lo nga na yâ ti li ti lo. Me, wali so asara mariage awe ayeke gi bê ti lo na ndo ti aye ti dunia so, ti bâ tongana nyen lo lingbi ti nzere na lê ti koli ti lo.
35 Mbi yeke sara tënë so ndali ti nzoni ti ALA wani, mbi ye ti bi kamba na go ti ALA pëpe, me mbi ye ti gue na ALA na mbage ti ye so ayeke na lege ni na ye so a bâ ni tongana sarango kusala lakue na Seigneur, na ziango si mbeni ye agboto lê ti ALA pëpe.
36 Me tongana mbeni zo so ade ti hinga wali wala koli pëpe abâ ti lo so lo yeke bata tere ti lo nzoni pëpe, tongana lo kpengba koli wala wali awe, na a lingbi ye ni aduti tongaso, zia lo sara ye so lo ye, lo sara siokpari pëpe. Zia ala sara mariage.
37 Me tongana mbeni zo aleke na bê ti lo ti ngbâ ti duti zo so ade ti hinga wali wala koli pëpe, na mbeni ye agbu lo na ngangu pëpe, me lo yeke na komandema na ndo ti ye so lo ye ti sara nga lo mû desizion so na bê ti lo wani awe, lo yeke sara ande nzoni.
38 Tongaso tongana zo so ahinga wali wala koli pëpe asara mariage, lo sara nzoni, me tongana zo so ahinga wali wala koli pëpe asara mariage pëpe, lo yeke sara ande nzoni mingi.
39 A kanga mbeni wali na tere ti koli ti lo na ngoi kue so koli ti lo ayeke na fini. Me tongana a si so koli ti lo akui,* wali so alingbi ti sara mariage na koli so bê ti lo aye, me gi na yâ ti Seigneur.
40 Me na bango ndo ti mbi, lo yeke duti na ngia mingi tongana lo ngbâ tongaso. Mbi hinga biani so mbi nga mbi yeke na yingo ti Nzapa.
Akete tënë na terê ni
^ Na Grec: “nzara ti tere ti ala agbi ala gbingo.”
^ Na Grec: “alango (na yâ ti kuâ).”
