1 aCorinthien 8:1-13
8 Fadeso, a yeke tënë ti akobe so a mû na ayanda: Ti tâ tënë ni, e kue e hinga tënë ti ye so awe. Hingango ye apusu zo ti sara baba, me ndoye akpengba zo.
2 Tongana mbeni zo abâ ti lo atene ni hinga ye na ndo ti mbeni ye awe, ade lo hinga ye ni so pëpe tongana ti so a lingbi lo hinga ni.
3 Me tongana mbeni zo andoye Nzapa, Nzapa ahinga zo ni so.
4 Na ndo ti tënë ti tengo akobe so a mû na ayanda, e hinga so yanda ayeke ye oko pëpe na yâ ti dunia so, na e hinga so Nzapa ayeke gi oko.
5 Atâa so na yayu wala na sese azo ayeke dä so a iri ala “anzapa”, legeoko tongana ti so “anzapa” ayeke mingi na “aseigneur” nga ayeke mingi,
6 ti e, Nzapa ayeke biani gi oko, Babâ ni, lo so aye kue alondo na lo na e yeke na fini ndali ti lo. Nga, Seigneur ayeke gi oko, Jésus Christ, lo so aye kue abâ gigi na lege ti lo, nga e yeke na fini na lege ti lo.
7 Ye oko, azo kue la ahinga ye so pëpe. Me ambeni, teti so li ti ala angbâ na ndo ti ayanda juska laso, ala yeke te kobe tongana mbeni ye so a mû na sandaga na ayanda na yingo-ti-hinga ti ala so awoko aga sioni awe.
8 Me kobe la ayeke sara si e ga nzoni na lê ti Nzapa pëpe. Tongana e te ye pëpe, e girisa mbeni ye pëpe, nga tongana e te ye, e yeke wara mbeni gonda na ndo ni pëpe.
9 Me ALA sara hange si, na mbeni lege, droit ti ALA so aga pëpe mbeni ye ti pikango gere ndali ti ala so awoko.
10 Teti tongana a si so mbeni zo abâ mo, mo so mo hinga ye na ndo ti tënë so, mo yeke te kobe na yâ ti mbeni temple ti ayanda, fade yingo-ti-hinga ti zo so awoko so ayeke gue na lo juska ti te akobe so a mû na ayanda pëpe?
11 Biani, ndali ti ye so mo hinga, zo so awoko awe ayeke buba, lo so ayeke ita ti mo so Christ akui ndali ti lo.
12 Me na ngoi so ALA sara siokpari tongaso na tere ti aita ti ALA nga ALA sara si yingo-ti-hinga ti aita ni so awoko afâ ngbanga na ndo ti ala wani, ALA yeke sara siokpari na tere ti Christ.
13 Ni la, tongana mbeni kobe asara si ita ti mbi atï, mbi yeke kiri ti te nyama mbeni pëpe si mbi sara pëpe si ita ti mbi atï.
