1 aCorinthien 9:1-27
9 Mbi yeke zo so a zi lo awe pëpe? Mbi yeke bazengele pëpe? Mbi bâ Jésus Seigneur ti e pëpe? ALA yeke kusala ti mbi na yâ ti Seigneur pëpe?
2 Tongana mbi yeke bazengele ndali ti ambeni zo pëpe, mbi yeke biani bazengele ndali ti ALA, ngbanga ti so ALA yeke nzoroko so afa kusala ti mbi ti bazengele na yâ ti Seigneur.
3 Tënë so mbi tene ti gbu koko ti mbi na gbele ala so abâ tënë ti mbi ayeke so:
4 E yeke na droit ti te ye na ti nyon ye, ni la pëpe?
5 E yeke na droit ti sara mariage na mbeni ita-wali si lo tambela na tere ti e pëpe? tongana ti so tanga ti abazengele, aita ti Seigneur nga na Céphas asara.
6 Wala a yeke gi mbi na Barnabas si e yeke na droit ti ngbâ lakue ti sara mbeni kua ti wara na kobe ti yanga ti e?
7 Zo wa si ayeke sara kua ti turugu na lo wani lo futa tere ti lo? Zo wa si alu yaka ti vigne na lo te lengo ni pëpe? Wala zo wa si ayeke bata anyama na lo nyon mbeni lait ni pëpe?
8 Mbi yeke sara tënë ti aye so na lege ti andia ti azo? Wala Ndia nga asara tënë ti aye so pëpe?
9 Teti a sû na yâ ti ndia ti Moïse, a tene: “A yeke nzoni mo kanga yanga ti bagara pëpe na ngoi so lo yeke sara kua na ndo so a yeke soso alê ti kobe dä.” A yeke tënë ti abagara si agbu bê ti Nzapa?
10 Wala a yeke gi ndali ti e si lo sara tënë so? Biani, a sû tënë so ndali ti e ngbanga ti so zo so ayeke fâ yaka, a lingbi lo fâ yaka ni na beku, nga zo so ayeke pika alê ti kobe, a lingbi lo pika ni na beku ti wara ti lo mbage ni.
11 Tongana e lu na ALA aye ti yingo, a yeke sioni tongana e yeke ko aye ti mitele na mbage ti ALA?
12 Tongana ambeni zo ayeke nga na droit so na ndo ti ALA, e yeke ti e na ni ahon so pëpe? Ye oko, e sara kusala na droit so pëpe, me e ngbâ ti kanga bê ti e na gbele aye kue, si e sara pëpe mbeni ye so akanga lege na nzoni tënë na ndo ti Christ.
13 ALA hinga pëpe so akoli so ayeke sara kusala ti Nzapa ayeke te aye ti temple? Nga ALA hinga pëpe so azo so ayeke sara kua lakue na gbele gbalaka ayeke wara ti ala mbeni mbage ti ye ti gbalaka ni?
14 A yeke nga tongaso si Seigneur amû yanga ti tene ala so ayeke fa nzoni tënë awara ye ti ala na lege ti nzoni tënë ni.
15 Me mbi sara kusala pëpe na mbeni oko ti aye so. Biani, mbi sû mbeti na ndo ti aye so ti tene a sara tongaso na mbi pëpe, teti ahon tënë mbi kui ahon ti tene . . . zo oko ayeke sara pëpe si nda ti tënë so mbi yeke na ni ti pika kate ti mbi alï ngu!
16 Tongaso, tongana mbi yeke fa nzoni tënë, a yeke mbeni ye ti pika kate ti mbi dä la pëpe, teti a yeke ye so a hunda na mbi ti sara ni la. Biani, mawa na mbi tongana mbi fa nzoni tënë pëpe!
17 Tongana mbi sara ye so na bê ti mbi wani, mbi yeke wara mbeni futa. Me tongana mbi sara ni na bê use, kamême a zia mbeni ye na maboko ti mbi ti bata ni.
18 Tongaso, futa ti mbi ni ayeke nyen? A yeke so tongana mbi yeke fa nzoni tënë, mbi lingbi ti sara si azo awara nzoni tënë senge senge, si tongana a ndu nzoni tënë ni, mbi sara ye na droit ti mbi ahon ndo ni pëpe.
19 Teti, atâa so mbi yeke ngbâa ti zo oko pëpe, mbi sara tere ti mbi ngbâa ti azo kue, si mbi wara mingi ti azo.
20 Tongaso na popo ti aJuif, mbi ga tongana mbeni Juif si mbi wara aJuif. Na popo ti azo so ayeke na gbe ti ndia, mbi ga tongana zo so ayeke na gbe ti ndia, atâa so mbi wani mbi yeke na gbe ti ndia pëpe, si mbi wara ala so ayeke na gbe ti ndia.
21 Na popo ti ala so ayeke na ndia pëpe, mbi ga tongana zo so ayeke na ndia pëpe, atâa so na gbele Nzapa mbi yeke zo so ayeke na ndia, nga na gbele Christ mbi yeke na gbe ti ndia, si mbi wara ala so ayeke na ndia pëpe.
22 Na popo ti ala so awoko, mbi ga tongana zo so awoko, si mbi wara azo so awoko. Mbi ga ye kue ndali ti mara ti azo nde nde kue, si na yâ ti ye kue mbi sö fini ti ambeni.
23 Me mbi sara ye kue ndali ti nzoni tënë si mbi wara mbage ti mbi dä legeoko na ambeni zo.
24 ALA hinga pëpe so na yâ ti mbeni mandako ti kpengo loro, azo ti kpengo loro ni kue ayeke kpe loro, me gi zo oko si ayeke wara futa ni? Tongaso ALA kpe loro ni ti tene ALA wara ni.
25 Na ndo ni, zo kue so ayeke sara mbeni mandako ayeke kanga nzara ti bê ti lo na yâ ti aye kue. Tâ tënë, ala yeke sara tongaso ti wara mbeni couronne so ayeke buba bubango, me e, e sara tongaso ti wara mbeni couronne so alingbi ti buba pëpe.
26 Ni la, lege so mbi yeke kpe na loro ayeke kirikiri pëpe. Lege so mbi yeke fi gobo ayeke ti pika yâ ti pupu pëpe.
27 Me mbi pika tere ti mbi na mbi sara lo tongana ngbâa, teti mbi sara mbeto ti tene tongana mbi fa tënë na azo awe, na nda ni mbi ga zo so a yeda na lo pëpe.
