1 aThessalonicien 3:1-13
3 Tongaso, na ngoi so e lingbi ti kanga bê ti e na ni mbeni pëpe, e bâ so a yeke nzoni ti tene gi e oko e ngbâ na Athènes,
2 na e tokua ita ti e Timothée, wakua ti Nzapa so ayeke fa nzoni tënë na ndo ti Christ, ti gue ti kpengba ALA na ti dë bê ti ALA si a sara nzoni na mabe ti ALA,
3 si aye ti vundu so ayengi mbeni zo pëpe. Teti ALA wani ALA hinga so a yeke aye so a leke ni kozo awe ti si na e.
4 Biani, so e yeke ândö na tere ti ALA, lakue e yeke tene na ALA so a lingbi ye ti vundu asi na e, gi tongana ti so a si awe, nga tongana ti so ALA hinga.
5 Ndani la, na ngoi so mbi lingbi ti kanga bê ti mbi na ni mbeni pëpe, mbi tokua ndo na ALA kâ ti hinga tënë na ndo ti dutingo ti ALA be-ta-zo, teti mbi hinga pëpe wala Wahanda atara ALA awe, na tongaso peko ti ngangu kua ti e angbâ senge.
6 Me so Timothée alondo na ALA kâ, singo ti lo na e ge la, na lo tene na e nzoni tënë na ndo ti mabe ti ALA nga na ndo ti ndoye ti ALA. Lo tene so ALA ngbâ lakue ti dabe ti ALA na e na anzoni ye so e sara, na ALA sara nzara ti bango e tongana ti so e nga e sara nzara ti bango ALA.
7 Ndani la, aita, ndali ti so ALA fa so ALA yeke be-ta-zo, bê ti e adë ndali ti ALA na yâ ti pono nga na yâ ti vundu ti e kue,
8 teti fadeso e bâ so e kiri e wara ngangu tongana biani ALA luti ngangu na yâ ti Seigneur.
9 Teti singila ti nyen si e lingbi ti mû na Nzapa ngbanga ti ALA na peko ti ngia kue so e wara ni na gbele Nzapa ti e ndali ti ALA?
10 Nga bï na lâ e yeke voro tere ti e mingi mingi na lo ti tene e bâ lê ti ALA na ti zia na ndo ti mabe ti ALA ye so amanke dä si mabe ti ALA ni akpengba.
11 Zia Nzapa, lo so ayeke Babâ ti e, nga na Seigneur ti e Jésus afa lege na e nzoni ti si na ALA kâ.
12 Nga, zia Seigneur asara si ALA maï, biani, ALA si singo, na ndoye ti amba ti ALA nga na ti azo kue, gi tongana ti so e nga e yeke na ni na mbage ti ALA,
13 si lo lingbi ti sara si bê ti ALA ayengi pëpe, na ALA duti na tënë na li ti ALA pëpe nga nzoni-kue na lê ti Nzapa Babâ ti e, na ngoi so Seigneur ti e Jésus ayeke si na lo yeke duti dä, lo na azo ti lo kue so ayeke nzoni-kue.
