1 Jean 1:1-10
1 E yeke fa peko ti ye so ayeke tënë ti fini, ye so ayeke dä na tongo nda ni, ye so e mä tënë ni, e bâ ni na lê ti e, so e bâ ni mbilimbili, nga maboko ti e andu ni.
2 (Biani, a fa fini ni na gigi si azo kue abâ. E bâ fini ti lakue lakue so ayeke lani na tere ti Babâ ni na a fa ni polele na e; e yeke sara tënë ni, nga e yeke fa pekoni na ALA.)
3 Ye so e bâ na e mä, e yeke fa nga pekoni na ALA, tongaso si ALA nga kue alingbi ti sara songo na e. Na songo ti e ni so, e yeke na ni na Babâ ni nga na Molenge ti lo Jésus Christ.
4 Ni la, e yeke sû aye so na mbeti si ngia ti e alingbi kue.
5 Tënë so e mä na yanga ti lo na e yeke fa ni na ALA ayeke so: Nzapa ayeke lumière na bingo ayeke na yâ ti lo kete pëpe.
6 Tongana e tene: “E yeke na songo na lo,” me e ngbâ ti tambela na yâ ti bingo, andâ e yeke tene mvene na e ngbâ ti sara ye alingbi na tâ tënë pëpe.
7 Me, teti so lo wani lo yeke na yâ ti lumière, tongana e yeke tambela na yâ ti lumière, biani e yeke na songo na popo ti e. Nga, mênë ti Molenge ti lo Jésus asukula e na asiokpari kue awe.
8 Tongana e tene: “E yeke na siokpari na yâ ti tere ti e pëpe,” e yeke handa tere ti e wani na tâ tënë ayeke na yâ ti e pëpe.
9 Tongana e fa asiokpari ti e na gigi, lo yeke be-ta-zo nga mbilimbili ti pardone siokpari ti e na ti sukula e na aye kue so ayeke mbilimbili pëpe.
10 Tongana e tene: “E sara siokpari pëpe,” e yeke sara si lo ga zo ti mvene, na tënë ti lo ayeke na yâ ti e pëpe.
