1 Jean 3:1-24
3 Bâ mara ti ndoye so Babâ ni afa na mbage ti e, si a lingbi ti iri e amolenge ti Nzapa! Na e yeke amolenge ti lo biani. Ndani la, dunia so ahinga e pëpe ngbanga ti so dunia ni ahinga lo pëpe.
2 ALA so mbi ndoye ALA mingi, fadeso e yeke amolenge ti Nzapa, me ade a fa pëpe na gigi ye so e yeke ga ni ande. E hinga so na ngoi so lo yeke fa tere ti lo na gigi, e yeke duti ande tongana lo, ngbanga ti so e yeke bâ lo ande gi tongana ti so lo yeke.
3 Na azo kue so ayeke na beku so, so ayeke na ndo ti lo, asukula sioni ye kue na tere ti ala gi tongana ti so Jésus Christ ayeke na sioni oko na tere ti lo pëpe.
4 Zo kue so angbâ na yâ ti siokpari, lo yeke nga zo ti kpengo ndia pëpe. Tongaso, siokpari ayeke kpengo ndia pëpe.
5 ALA hinga nga so lo fa lani tere ti lo na gigi ti zi asiokpari ti e, na siokpari oko ayeke na yâ ti lo pëpe.
6 Zo kue so angbâ beoko na lo angbâ ti sara siokpari pëpe. Zo so angbâ ti sara siokpari abâ lo pëpe nga ahinga lo pëpe.
7 Amolenge so mbi ndoye ALA mingi, zia mbeni zo ahanda ALA pëpe. Zo so angbâ ti sara ye ti mbilimbili ayeke mbilimbili legeoko tongana ti so lo yeke mbilimbili.
8 Zo so angbâ ti sara siokpari alondo na Zabolo, ngbanga ti so a yeke ngbene ye na tongo nda ni si Zabolo ayeke sara siokpari. Nda ni so Molenge ti Nzapa afa tere ti lo na gigi ayeke ti futi akusala ti Zabolo.
9 Zo kue so Nzapa adü lo angbâ ti sara siokpari pëpe ngbanga ti so ngongoa so ayeke gi ti sigigi, ngongoa ti Nzapa, angbâ na yâ ti lo. Nga, lo lingbi ti ngbâ ti sara siokpari pëpe, ngbanga ti so Nzapa si adü lo.
10 A hinga amolenge ti Nzapa na amolenge ti Zabolo na lege ti ye so: Zo kue so ayeke sara ye ti mbilimbili pëpe alondo na Nzapa pëpe, nga zo so andoye ita ti lo pëpe alondo na Nzapa pëpe.
11 Tënë so ALA mä na tongo nda ni ayeke so: a lingbi e ndoye tere na popo ti e.
12 E sara tongana Caïn pëpe, so alondo na Zo ti sioni na lo fâ ita ti lo. Na lo fâ lo ngbanga ti nyen? Ngbanga ti so akusala ti lo ayeke sioni, me akusala ti ita ti lo ayeke mbilimbili.
13 Aita, zia bê ti ALA adö pëpe ndali ti so dunia so ake ALA.
14 E hinga so e londo na yâ ti kuâ awe ti si na fini ngbanga ti so e ndoye aita. Zo so andoye ita ti lo pëpe angbâ na yâ ti kuâ.
15 Zo kue so ake ita ti lo ayeke wafango zo. Na ALA hinga so mbeni wafango zo ayeke na fini ti lakue lakue na yâ ti lo oko pëpe.
16 A yeke tongaso si e hinga ndoye, ngbanga ti so lo kä âme ti lo na kuâ ndali ti e. Na a yeke ngbanga ti e ti kä âme ti e na kuâ ndali ti aita ti e.
17 Me zo kue so ayeke na aye ti gigi so, na lo bâ so ita ti lo ayeke na ye pëpe, me lo ke ti bâ mawa ti lo, tongana nyen si ndoye ti Nzapa ayeke ngbâ na yâ ti lo?
18 Amolenge so mbi ndoye ALA mingi, zia e ndoye tere gi na tënë pëpe wala na yanga pëpe, me na lege ti kusala nga na tâ tënë.
19 A yeke na lege so si e yeke hinga ande so e yeke ti tâ tënë, nga e yeke sara si bê ti e adë na gbele lo
20 na ndo ti ye kue so bê ti e ni alingbi ti fâ ngbanga na ndo ti e ndali ni, ngbanga ti so Nzapa ayeke kota ahon bê ti e, na lo hinga ye kue.
21 ALA so mbi ndoye ALA mingi, tongana bê ti e afâ ngbanga na ndo ti e pëpe, e yeke na kamene pëpe ti sara tënë na Nzapa;
22 na ye kue so e hunda na lo, e yeke wara ni ndali ti so e yeke bata acommandement ti lo nga e yeke sara aye so anzere na lê ti lo.
23 Biani, commandement ti lo ayeke so: e mä na bê na iri ti Molenge ti lo Jésus Christ na e ndoye tere na popo ti e, gi tongana ti so lo mû commandement ni na e.
24 Na ndo ni, zo so abata acommandement ti lo angbâ beoko na lo, na lo yeke beoko na zo tongaso. E hinga so lo ngbâ beoko na e na lege so: ndali ti yingo so lo mû na e.
