1 Jean 5:1-21
5 Zo kue so amä na bê so Jésus ayeke Christ, Nzapa si adü zo so. Na zo kue so andoye Nzapa, lo ndoye nga zo so Nzapa adü lo.
2 E hinga so e yeke ndoye amolenge ti Nzapa na lege so: tongana e ngbâ ti ndoye Nzapa na e ngbâ ti bata acommandement ti lo.
3 Ndoye ti Nzapa ayeke so: e bata acommandement ti lo; me acommandement ti lo ayeke ye so ane pëpe,
4 teti ye kue so Nzapa adü ahon dunia so na ngangu. Songo benda so ahon dunia so na ngangu ayeke mabe ti e.
5 Zo wa ayeke lo so ahon dunia so na ngangu? A yeke zo so amä na bê so Jésus ayeke Molenge ti Nzapa pëpe?
6 A yeke lo so aga lani na lege ti ngu na mênë, Jésus Christ. Lo ga gi na ngu pëpe, me na ngu nga na mênë. Na yingo ayeke témoin ti ye so, ngbanga ti so yingo ni ayeke tâ tënë.
7 Teti atémoin ayeke ota:
8 yingo, ngu nga na mênë. Na ala ota kue amä tere.
9 Tongana e yeda na tënë so azo afa, tënë so Nzapa afa ayeke kota mingi ahon ti ala, ngbanga ti so tënë so Nzapa afa ayeke so: lo sara tënë na ndo ti Molenge ti lo.
10 Zo so amä na bê na Molenge ti Nzapa, lo wara ti lo tënë ni awe. Zo so amä na bê na Nzapa pëpe, lo sara si Nzapa aga zo ti mvene, ndali ti so lo mä na bê pëpe na tënë so Nzapa afa tongana témoin na ndo ti Molenge ti lo.
11 Tënë ni so a fa ayeke so: Nzapa amû na e fini ti lakue lakue, na fini so ayeke na yâ ti Molenge ti lo.
12 Zo so ayeke beoko na Molenge ni ayeke na fini so. Zo so ayeke beoko na Molenge ti Nzapa pëpe ayeke na fini so pëpe.
13 ALA so amä na bê na iri ti Molenge ti Nzapa, mbi sû aye so na ALA si ALA hinga so ALA yeke na fini ti lakue lakue.
14 Bê so e zia na ndo ti lo ayeke so: Atâa ye wa e hunda, tongana a gue oko na ye so bê ti lo aye, lo yeke mä e.
15 Na tongana e hinga so lo yeke mä e na ndo ti aye kue so e yeke hunda, e hinga nga so e yeke wara biani aye so e hunda ni ngbanga ti so e hunda ni na lo.
16 Tongana mbeni zo abâ ita ti lo atï na yâ ti mbeni siokpari so ayeke gue na zo na kuâ pëpe, a lingbi lo hunda Nzapa, na fade Nzapa amû fini na ita ti lo ni. Biani, Nzapa ayeke mû fini na ala so atï na yâ ti mbeni siokpari so ague na zo na kuâ pëpe. Mbeni siokpari ayeke dä so ague na zo na kuâ. A yeke na ndo ti tënë ti siokpari so si mbi tene na lo ti hunda Nzapa pëpe.
17 Ye kue so ayeke mbilimbili pëpe ayeke siokpari. Me mbeni siokpari ayeke dä so ague na zo na kuâ pëpe.
18 E hinga so azo kue so Nzapa si adü ala angbâ ti sara siokpari pëpe, me Lo so Nzapa adü Lo ayeke bâ ndo na ndo ti ala, na Zo ti sioni agbu ala pëpe.
19 E hinga so e yeke ti Nzapa, me dunia so kue ayeke na gbe ti Zo ti sioni.
20 Me e hinga so Molenge ti Nzapa aga, na lo mû na e hingango ndo si e lingbi ti hinga tâ Nzapa. Na e yeke beoko na tâ Nzapa ni na lege ti Molenge ti lo Jésus Christ. So ayeke tâ Nzapa na fini ti lakue lakue ni la.
21 Amolenge so mbi ndoye ALA mingi, ALA kpe lege ti ayanda.
