1 Pierre 4:1-19
4 Ni la, teti so Christ abâ pasi na yâ ti mitele awe, ALA nga kue ALA mû oko bibe ti lo so tongana ye ti bira; ngbanga ti so zo so abâ pasi na yâ ti mitele, ti lo na siokpari ahunzi awe,
2 si tanga ti ngoi so lo yeke sara na yâ ti mitele, fini ti lo aduti ndali ti anzara ti bê ti azo pëpe, me ndali ti ye so bê ti Nzapa aye.
3 Teti ngoi so ahon alingbi na ALA awe ti sara ye so amara aye, ngoi so lani ALA yeke sara sioni ye na kamene pëpe, ALA yeke tambela na lege ti asioni nzara ti tere, nyongo vin ahon ndo ni, apumba ti kirikiri, nyongo sämba mingi nga avorongo yanda so ndia ake.
4 Me ngbanga ti so ALA ngbâ ti kpe loro na azo so pëpe ti gue na yâ ti oko popoto ti asioni ye so, li ti azo so aga kirikiri na ala ngbâ gi ti tene asioni tënë ti ALA.
5 Me fade azo so ayeke kiri tënë na lo so ayeke nduru ti fâ ngbanga ti azo so ayeke na fini na ti ala so akui awe.
6 Ndali ti ye so, a fa nga nzoni tënë na akuâ, si a fâ ngbanga ti ala na lege ti mitele alingbi na bango ndo ti azo, me ala duti na fini na lege ti yingo alingbi na bango ndo ti Nzapa.
7 Nda ti aye kue aga nduru awe. Tongaso, ALA bata bibe ti ALA nzoni, na zia lê ti ALA akpengba ti sambela.
8 Kota ye ni kue ayeke ti tene ALA ndoye tere ngangu na popo ti ALA, ngbanga ti so ndoye akanga ndo ti asiokpari mingi.
9 ALA yamba tere nzoni na popo ti ALA na demango na gbe ti go ti ALA pëpe.
10 So zo oko oko awara mbeni matabisi, ALA mû ni ALA sara na kua na amba ti ALA tongana anzoni wabatango ye ti kota nzobe ti Nzapa so lo yeke sara ni na alege nde nde.
11 Tongana mbeni zo ayeke sara tënë, zia lo sara tënë ni tongana atënë so ayeke nzoni-kue so alondo na yanga ti Nzapa; tongana mbeni zo ayeke sara kua na azo, zia lo sara ni tongana zo so azia bê ti lo na ngangu so Nzapa ayeke mû; si na yâ ti aye kue a gonda Nzapa na lege ti Jésus Christ. Gloire na ngangu ayeke ti lo lakue lakue nga kpu na kpu. Amen.
12 Aita so mbi ndoye ALA mingi, zia li ti ALA aga kirikiri pëpe ndali ti wâ ti akpale so ayeke na popo ti ALA, so asi na ALA ti tara ALA; zia li ti ALA aga kirikiri pëpe mo bâ mo tene mbeni ye ti ndima si ayeke si na ALA so.
13 Ahon ti zia si li ti ALA aga kirikiri, ALA ngbâ ti duti na ngia ndali ti so ALA nga ALA yeke azo so ayeke bâ apasi so Christ abâ, tongaso si ALA duti na ngia na tere ti ALA anzere mingi na ngoi so lo yeke fa gloire ti lo na gigi.
14 Tongana a yeke zonga ALA ndali ti iri ti Christ, ALA duti na ngia, ngbanga ti so yingo ti gloire, so ti tene yingo ti Nzapa, ayeke duti na ndo ti ALA.
15 Ye oko, zia mbeni zo na popo ti ALA abâ pasi pëpe ndali ti so lo yeke zo ti fango zo, wala zo ti nzi, wala sioni zo wala zo so ayeke yôro yanga ti lo na yâ ti tënë ti azo.
16 Me tongana lo yeke bâ pasi ndali ti so lo yeke Chrétien, zia kamene asara lo pëpe, me lo ngbâ ti gonda Nzapa na ngoi so iri ni so ayeke na ndo ti lo.
17 Biani, so ayeke ngoi so a fa ni awe ti tene ngbanga ato nda ni na yâ ti da ti Nzapa. Na tongana ngbanga ni ato nda ni na e kozo, ka ti azo so ayeke yeda na nzoni tënë ti Nzapa pëpe so ayeke duti ande tongana nyen?
18 “Na tongana a yeke kete ye pëpe ti tene zo ti mbilimbili awara salut, ka zo so akpe Nzapa pëpe nga na wasiokpari ayeke duti ti ala na ndo wa?”
19 Tongaso nga, zia ala so ayeke bâ pasi a lingbi na ti so bê ti Nzapa aye angbâ ti zia âme ti ala na maboko ti Wasarango ye so ayeke be-ta-zo na ngoi so ala ngbâ ti sara ye ti nzoni.
