1 Pierre 5:1-14
5 Ni la, mbi mû wango so na ala so ayeke a-ancien na popo ti ALA, teti mbi nga mbi yeke ancien legeoko na ala na mbi yeke témoin ti apasi so Christ abâ, na mbi yeke wara nga gloire so a yeke fa ni ande; mbi tene:
2 ALA bata angasangbaga ti Nzapa so lo zia na maboko ti ALA; zia a gbu ALA gbungo na ngangu pëpe ti sara ni, me zia ALA sara ni na bê ti ALA wani; ALA bata angasangbaga ni na bibe ti warango ye na lege ti likisi pëpe, me na bê ti ALA kue;
3 ALA bata angasangbaga ni na sarango mokonzi pëpe na ndo ti ala so ayeke aye ti Nzapa, me ALA ga atapande ndali ti angasangbaga ni.
4 Na ngoi so kota berger ni ayeke fa tere ti lo na gigi, fade ALA yeke wara couronne ti gloire so pendere ni ayeke hon pëpe.
5 Legeoko nga, amaseka-koli, ALA woko tere na gbe ti ambakoro. Me ALA kue, ALA yü bibe ti sarango tere kete tongana ALA yeke sara ye na mba na popo ti ALA, ngbanga ti so Nzapa ake azo ti baba, me lo yeke mû kota nzobe ti lo na azo so ayeke na tâ be-ti-molenge.
6 Tongaso, ALA sara tere ti ALA kete na gbe ti ngangu maboko ti Nzapa, tongaso si lo yä ALA na nduzu tongana ngoi ni alingbi;
7 na oko ngoi ni, ALA bi agingo bê ti ALA kue na ndo ti lo, ngbanga ti so lo yeke bi bê ti lo na ndo ti ALA.
8 ALA zia li ti ALA kpô, zia lê ti ALA akpengba. Wato ti ALA Zabolo ayeke tambela tongana mbeni bamara so ayeke toto, na lo yeke gi mbeni zo ti te lo.
9 Me ALA luti ti ke lo, ALA kpengba na yâ ti mabe, na hingango so a-oko pasi so ayeke si nga na sewa ti ALA ti aita kue na yâ ti dunia so.
10 Me na peko ti so ALA bâ pasi teti kete ngoi awe, Nzapa ti kota nzobe kue, lo so lo iri ALA ti wara gloire ti lo ti lakue lakue ndali ti so ALA sara beoko na Christ, ayeke hunzi lekengo ALA, lo yeke sara si ALA luti ngangu, lo yeke sara si ALA kpengba.
11 Ngangu ayeke ti lo teti lakue lakue. Amen.
12 A yeke na lege ti Sylvain, mbeni ita so mbi bâ lo tongana be-ta-zo, si mbi sû nduru mbeti so na ALA ti kpengba ALA nga ti fa na ALA so tâ kota nzobe ti Nzapa ni la; ALA luti ngangu na yâ ni.
13 Wali so ayeke na Babylone, lo so a soro lo tongana ALA, atokua bara na ALA; molenge ti mbi Marc nga atokua bara na ALA.
14 ALA bara mba na popo ti ALA na sungo ngbangba ti mba na ndoye.
ALA kue so ayeke beoko na Christ, zia siriri aduti na ALA.
