2 Timothée 4:1-22
4 Mbi mû yanga na mo na lê ti Nzapa nga na ti Christ Jésus, lo so a fa lo kozo awe ti fâ ngbanga ti ala so ayeke na fini nga na ti akuâ, na lege ti fango tere ti lo na gigi nga na lege ti royaume ti lo:
2 Fa tënë ni, ngbâ na ndo ni atâa a yeke na ngoi so aye atambela nzoni wala na ngoi ti wusuwusu; suku na zo, kiri zo na nzoni lege, wa zo, sara ni na kangango bê kue ti ku nga na kode ti fa ye na zo.
3 Teti mbeni ngoi ayeke ga so ala yeke kanga bê gbä na nzoni fango ye ni, me ti lingbi na anzara ti bê ti ala wani, ala yeke soro gbâ ti awafango ye ti fa na ala atënë so anzere na mê ti ala;
4 na ala yeke kanga mê ti ala na tâ tënë ni, ti mä gi ambaï ti mvene.
5 Me ti mo, zia li ti mo kpô na yâ ti aye kue, kanga bê ti mo na yâ ti pasi, sara kusala ti wafango nzoni tënë, sara kusala ti mo ni kue.
6 Teti a to nda ti tuku mbi awe tongana offrande ti sämba so a yeke tuku ni na ndo ti sandaga, nga ngoi so a fa ni ti zi mbi aga nduru ti si awe.
7 Mbi tiri pendere bira ni awe, mbi kpe loro ni ahunzi awe, mbi sara ye alingbi na tënë ti mabe awe.
8 Ti londo na ndembe ni so ti ga na ni, a bata na mbi couronne ti mbilimbili, couronne so Seigneur, wafango ngbanga so ayeke mbilimbili, ayeke mû na mbi na lango ni so tongana futa ti mbi; lo yeke mû ande ni gi na mbi oko pëpe, me lo yeke mû ni nga na ala kue so asara nzara ti bâ lo na ngoi so lo yeke fa tere ti lo na gigi.
9 Mo sara kue ti si na mbi ge hio si.
10 Teti Démas adö mbi azia ngbanga ti so lo ndoye aye ti ngoi ti fadeso, na lo gue na Thessalonique; Crescens ague na Galatie, na Tite ague na Dalmatie.
11 Gi Luc oko si ayeke na tere ti mbi. Mo mû Marc na tere ti mo, mo ga na lo, teti lo lingbi ti mû na mbi maboko na yâ ti kusala ni.
12 Me mbi tokua Tychique na Éphèse.
13 Na gango ti mo, mo mû kota bongo ti dê so mbi zia ni na tïtî Carpus na kodoro ti Troas, nga na ambeti so a rulê ni rulengo so, mbilimbili ambeti so a sara ni na poro ti nyama so.
14 Alexandre, lo so kua ti lo ayeke ti leke aye na gengere so, asara lani sioni na mbi mingi; Jéhovah ayeke kiri ande futa ni na lo alingbi na aye so lo sara.
15 Me mo kue mo sara hange na lo, teti lo dë kite ngangu mingi na atënë ti e.
16 Na ngoi ti kozo gbungo koko ti mbi na gbele ngbanga, zo oko aga na tere ti mbi pëpe, ala kue ato nda ti dö mbi ti zia (zia Nzapa akiri pekoni na ala pëpe),
17 me Seigneur aluti na tere ti mbi na lo mû na mbi ngangu, si na lege ti mbi, a fa tënë ni kue si azo ti amara kue amä ni, na a zi mbi na yanga ti bamara.
18 Seigneur ayeke zi mbi ande na yâ ti asioni kusala kue na lo yeke sö mbi teti royaume ti lo ti yayu. Zia a mû gloire na lo lakue lakue nga kpu na kpu. Amen.
19 Mo tene bara ti mbi na Prisca na Aquila nga na azo ti da ti Onésiphore.
20 Éraste angbâ na Corinthe, me mbi zia Trophime na kobela na Milet.
21 Mo sara kue ti si kozo si ngoi ti dê alingbi.
Eubule atokua bara na mo, Pudens, Linus, Claudia nga na aita kue abara mo.
22 Zia Seigneur aduti na bibe so mo yeke na ni so. Zia kota nzobe ti lo aduti na ALA.
