2 aCorinthien 10:1-18
10 Mbi Paul, mbi voro yanga na ALA na lege ti sarango ye ti Christ na ngangu pëpe nga na lege ti nzoni bê so lo yeke na ni; mbi so tongana mbi yeke na popo ti ALA mbi kpa mbeni zo so adë dengo, me tongana mbi yeke dä pëpe mbi yeke sara ye na ALA na mbeto pëpe.
2 Biani, mbi voro ALA: Mbi ye pëpe si na ngoi so mbi yeke duti na tere ti ALA kâ, mbi son na ndo ti zo, tongana ti so mbi leke na bê ti mbi awe ti mû angangu desizion na tere ti ambeni so abâ e tongana azo so ayeke tambela alingbi na abibe ti e ti mitele.
3 Atâa so e yeke azo ti mitele, e yeke tiri bira alingbi na abibe ti e ti mitele pëpe.
4 Aye ti bira ti e ayeke ti mitele pëpe, me Nzapa asara si aye ti bira so akpengba ti kinda na aye so gere ni aluti ngangu.
5 Teti e yeke kinda atënë so ayeke na lege ni pëpe nga na kota ye kue so alondo ti ke hingango ye ti Nzapa. Na e mû bibe kue na ngbâa ti sara si bibe ni amä yanga ti Christ.
6 Nga na pekoni so ALA fa so ALA ga azo ti mango yanga na yâ ti ye kue awe, e yeke duti nduru ti se azo kue ti kengo yanga.
7 ALA yeke bâ ti ALA gi ye so lê ti zo abâ. Tongana mbeni zo abâ biani so lo yeke ti Christ, zia lo dabe ti lo na tënë so: Gi tongana ti so lo yeke ti Christ, e nga e yeke ti Christ.
8 Teti tongana a si so mbi pika kate ti mbi ahon ndo ni kete ndali ti komandema so Seigneur amû na e ti leke ALA si ALA luti me ti sara si ALA tï pëpe, kamene ayeke sara mbi pëpe.
9 Mbi sara tënë so ti tene ALA hinga so mbi ye ti zia mbeto na bê ti ALA pëpe na lege ti ambeti ti mbi.
10 Teti ambeni atene: “Atënë ti yâ ti ambeti ti lo ane nga ayeke na ngangu, me tongana lo yeke na tere ti e, lo yeke na ngangu pëpe nga lo yeke tene mbeni sörö tënë pëpe.”
11 Zia zo tongaso ahinga tënë so nzoni: Oko sarango ye ti e so asigigi na yâ ti ambeti so e tokua na ALA, na ngoi so e yeke dä pëpe so, a yeke gi ni si e yeke sara ande tongana e yeke na tere ti ALA.
12 Teti e wani e yeke zia pëpe si ye ahanda e ti zia tere ti e na popo ti ambeni wala ti haka tere ti e na ambeni so ala wani si ayeke sara nzoni tënë ti ala. Biani, na bango tere ti ala tongana azo so alingbi awe gi na lege ti andia ti ala wani, nga na hakango tere ti ala gi na ala wani, ala fa so hingango ndo ayeke na ala pëpe.
13 Ti e, e yeke pika ande kate pëpe ahon akatikati ti ndo so a mû na e ti sara kua dä, me e yeke pika kate ti e gi na yâ ti katikati ti ndo so Nzapa adiko yongo ni si amû na e, ndo so ALA nga ayeke na yâ ni.
14 Ti tâ tënë ni, e yeke hon pëpe akatikati ti ndo so a fa na e ti sara kua dä; e yeke hon ni gi tongana fade ALA yeke na yâ ni pëpe; me e yeke hon akatikati so pëpe teti e la e yeke akozo zo so asi juska na ALA ti fa nzoni tënë na ndo ti Christ.
15 Ên-ën, e yeke pika kate ti e pëpe na ndo ti ngangu kusala ti mbeni zo nde ahon akatikati ti ndo so a mû na e ti sara kua dä. Me e yeke na beku so, na ngoi so mabe ti ALA ayeke kono, e lingbi ti sara kota kua mingi na popo ti ALA na yâ ti ndo so a mû na e. Na pekoni fade e yeke sara même kota kua ahon ti fadeso,
16 ti fa nzoni tënë na akodoro so ayeke kâ na peko ti ALA, si e pika kate ti e pëpe na ndo ti mbeni ndo so a fa na mbeni zo nde na so a leke aye kue na yâ ni awe.
17 “Me zo so ayeke pika kate, zia lo pika kate na ndo ti Jéhovah.”
18 Teti a yeke pëpe zo so ayeke sara nzoni tënë ti lo wani si a yeke yeda na lo, me a yeke yeda gi na zo so Jéhovah si asara nzoni tënë ti lo.
