2 aCorinthien 2:1-17
2 Ye so mbi wani mbi leke ti sara ayeke so: mbi ye ti kiri ti gue na ALA kâ, me mbi ye ti gue na yâ ti vundu pëpe.
2 Teti tongana mbi zia vundu na bê ti ALA, zo wa si ayeke zia ngia na bê ti mbi zo wa? A yeke gi ala so mbi zia vundu na bê ti ala so pëpe?
3 Ndani la mbi sû tënë so biani na ALA, si tongana mbi ga, mbi duti na vundu pëpe ndali ti ala so a yeke ti mbi ti duti na ngia ndali ti ala; teti mbi hinga so oko ngia so mbi yeke na ni, ALA kue ayeke na ni nga.
4 Teti a yeke na kota vundu nga na mawa mingi na bê si mbi sû lani mbeti na ALA na ngu ti lê mingi; mbi ye pëpe si ALA duti na vundu, me mbi ye si ALA hinga ndoye so mbi yeke na ni mingi na mbage ti ALA.
5 So mbeni zo asara si vundu aga, lo zia vundu na bê ti mbi pëpe, me lo zia vundu kamême na bê ti ALA kue. Mbi ye ti sara tënë mingi ti son bê ti ALA pëpe.
6 Sukungo so mingi ti ALA asuku na koli so alingbi awe,
7 me ti fadeso, a yeke nzoni ALA pardone lo na bê ti ALA kue nga ALA dë bê ti lo si vundu so asara lo mingi awoko lo pëpe.
8 Ni la, mbi wa ALA ti fa na lo so biani ALA ndoye lo.
9 Ndani la mbi sû nga mbeti so na ALA ti hinga mbilimbili wala ALA yeke mä yanga na yâ ti ye kue.
10 Ye kue so ALA pardone na mbeni zo na bê ti ALA kue, mbi kue mbi pardone ni. Biani, ti mbi, ye so mbi pardone na bê ti mbi kue awe, tongana biani mbi pardone mbeni ye na bê ti mbi kue, a yeke ndali ti nzoni ti ALA na lê ti Christ,
11 si Satan awara go na ndo ti e pëpe, ngbanga ti so e hinga nzoni mingi aye so lo ye ti sara.
12 Tongana mbi si lani na Troas ti fa nzoni tënë na ndo ti Christ, na fini yanga-da azi na mbi lani na yâ ti kusala ti Seigneur,
13 bê* ti mbi adë lani pëpe ngbanga ti so mbi wara ita ti mbi Tite pëpe, me mbi tene na adisciple ni kâ ti ngbâ nzoni na mbi zia ala mbi gue na Macédoine.
14 Me singila na Nzapa so ayeke mû li ni lakue ti hon na e na yâ ti kpongo molongo tongana azo so asö benda si e yeke tambela legeoko na Christ, nga so lo sara si na lege ti e a yeke mä fion ti hingango ye na ndo ti Nzapa na ndo kue!
15 Ti Nzapa, e yeke pendere fion ti Christ na lê ti ala so a ngbâ ti sö ala nga na lê ti ala so ayeke gue ti wara futingo.
16 Ti ala so ayeke gue ti wara futingo, e yeke fion ti kuâ so ayeke gue na zo na kuâ, ti ala so a ngbâ ti sö ala, e yeke fion ti fini so ayeke gue na zo na fini. Zo wa la alingbi biani na kusala so?
17 E la e lingbi na ni. Teti e yeke pëpe azo so ayeke kä tënë ti Nzapa kango tongana ti ambeni zo mingi, me e yeke sara tënë na vuru bê tongana azo so Nzapa si atokua ala, so ayeke na gbe ti lê ti lo, nga na tere ti Christ.
Akete tënë na terê ni
^ Na Grec: “yingo.”
