2 aCorinthien 6:1-18
6 So e yeke sara kusala legeoko na Nzapa, e voro nga yanga na ALA ti tene ALA yeda na kota nzobe ti Nzapa na ALA hon nde pëpe na ye so kota nzobe ni aye.
2 Teti lo tene: “Na mbeni ngoi ti sarango nzoni na zo, mbi mä mo lani, nga na mbeni lango ti salut, mbi mû lani maboko na mo.” Bâ, fadeso a yeke biani ngoi so a sara nzoni na zo. Bâ, fadeso a yeke lango ti salut.
3 E yeke sara kue ti ga pëpe mbeni ye so asara si bê ti zo ason, si a kasa kusala ti e pëpe;
4 me na yâ ti aye kue, e wani e sara nzoni tënë ti e tongana awakua ti Nzapa na lege so e gbu ngangu na yâ ti aye mingi, so ti tene, na yâ ti aye ti vundu, angoi so ye atia e, akpale,
5 na yâ ti apika, akanga, awusuwusu, akua ti ngangu, abï so e lango pëpe na angoi so e te kobe pëpe.
6 E fa so e yeke awakua ti Nzapa na lege so e duti na sioni oko pëpe, na lege ti hingango ye, kangango bê ti ku, sarango nzoni na zo, na lege ti yingo vulu, na lege ti ndoye ti handango lê ti zo pëpe,
7 na lege ti atënë so ayeke tâ tënë nga na lege ti ngangu ti Nzapa. E fa nga ni na gbungo aye ti bira ti mbilimbili na maboko ti e ti koli nga na ti wali,
8 na yâ ti gloire nga na yâ ti kamene, na lege so a yeke tene sioni tënë na iri ti e nga a yeke tene nzoni tënë na iri ti e; a bâ e tongana azo ti handango azo, andâ e yeke tene tâ tënë.
9 E sara nga nzoni tënë ti e wani na lege so a bâ e tongana azo so a hinga ala pëpe, andâ a hinga e nzoni; a bâ e tongana azo so ayeke kui kuingo, andâ e yeke na fini; a bâ e tongana azo so a se ala, me a fâ e pëpe;
10 a bâ e tongana azo so ayeke na vundu, me e yeke na ngia lakue; a bâ e tongana awayere, me e sara si azo mingi aga awamosoro; a bâ e tongana azo so ayeke na ye oko pëpe, andâ e yeke na aye kue.
11 Aita ti Corinthe, e sara tënë na ALA polele nga ndoye so ayeke na bê ti e amaï.*
12 E ke ti fa ndoye ti e na ALA pëpe, me ALA si ake ti fa tâ ndoye so ayeke na bê ti ALA.
13 Ni la, ti sara nga tongaso na e, mbi sara tënë na ALA tongana amolenge ti mbi, ALA nga ALA maï tâ ndoye so ayeke na bê ti ALA.
14 ALA bungbi oko pëpe na azo so amä na bê pëpe na gbe ti joug oko. Teti songo wa ayeke na popo ti mbilimbili na kpengo ndia pëpe? Wala lumière na bingo aduti ndo oko?
15 Nga, mango tere wa si atingbi Christ na Bélial? Wala nyen si abungbi zo so amä na bê na zo so amä na bê pëpe?
16 Nga mango tere wa si ayeke na popo ti temple ti Nzapa na ayanda? Teti e yeke mbeni temple ti Nzapa so ayeke na fini, gi tongana ti so Nzapa atene: “Fade mbi yeke sara kodoro na popo ti ala na mbi yeke tambela na popo ti ala, fade mbi ga Nzapa ti ala na fade ala ga azo ti mbi.”
17 “Jéhovah atene: ‘Tongaso ALA sigigi na popo ti azo ni, ALA duti nde, ALA zia ti ndu sioni ye’ ”; “ ‘na mbi yeke yamba ALA ande.’ ”
18 “Jéhovah, lo ti ngangu ahon kue, atene: ‘Mbi yeke duti ande babâ ti ALA, na ALA yeke duti ande amolenge ti mbi ti koli na amolenge ti mbi ti wali.’ ”
Akete tënë na terê ni
^ Na Grec: “yâ ti bê ti e akono.”
