2 aCorinthien 7:1-16
7 Aita so mbi ndoye ALA mingi, so e yeke na azendo so, zia e sukula tere ti e wani ti zi aye kue so asara si tere na bibe aga sioni, nga na lege ti kpengo mbeto ti Nzapa zia e gi ti ga azo so ayeke nzoni-kue ahon ti kozo.
2 ALA leke mbeni ndo na e na yâ ti bê ti ALA. E sara sioni na zo oko pëpe, e buba sarango ye ti zo oko pëpe, e wara go na ndo ti zo oko pëpe.
3 Mbi sara tënë so pëpe ti fâ ngbanga na ndo ti ALA. Teti mbi tene kozoni awe so, atâa e yeke na fini wala e kui, ALA yeke lakue na yâ ti bê ti e.
4 Mbi yeke sara tënë na ALA na kamene oko tongaso pëpe. Mbi pika kate ti mbi mingi na ndo ti ALA. Bê ti mbi asi singo na tënë ti dengo bê nga ngia ti mbi ahon ndo ni na yâ ti pasi ti e kue.
5 Biani, na ngoi so e si lani na Macédoine, tere ti e awara lege ti wu pupu pëpe, me e ngbâ ti bâ pasi na alege nde nde kue: na gigi tiri ayeke dä, na yâ ni a yeke mbeto.
6 Ye oko, Nzapa, lo so ayeke dë bê ti ala so vundu ahon ndo ti ala, adë bê ti e na lege ti dutingo ti Tite na tere ti e,
7 gi na lege ti dutingo ti lo na tere ti e pëpe, me nga na lege ti dengo bê so lo wara ngbanga ti ALA, teti lo kiri lo sara tënë ti ALA na e, lo tene so ALA ye biani ti changé bê ti ALA, ALA yeke na vundu mingi nga ALA ye mbi na bê ti ALA kue. Tongaso mbi yeke na ngia mingi.
8 Ni la, atâa tongana mbeti so mbi tokua na ALA azia vundu na bê ti ALA, vundu asara mbi ndali ni pëpe. Même tongana kozoni vundu asara mbi (mbi bâ so mbeti ni so azia vundu na bê ti ALA, me vundu ni ayeke gi ti kete ngoi),
9 fadeso mbi yeke na ngia. Mbi yeke na ngia gi pëpe ndali ti so mbeti ni azia vundu na bê ti ALA, me ndali ti so vundu ni ague na ALA ti changé bê ti ALA. Teti vundu so ALA wara ague oko na ye so bê ti Nzapa aye, tongaso si mbeni ye ti sioni awara ALA pëpe ndali ti e.
10 Teti vundu so ague oko na ye so bê ti Nzapa aye asara si zo achangé bê ti lo ti wara salut, na so ayeke ye ti sara mawa ni pëpe; me vundu so ayeke ti dunia so aga na kuâ.
11 ALA bâ ye so vundu so ague oko na ye so bê ti Nzapa aye aga na ni: ALA sara ye na ngangu ti ALA kue, ALA gi ti zi tënë na li ti ALA, bê ti ALA ason na sioni ye so asi, ALA yeke na mbeto ti Nzapa, ALA ye mingi ti changé bê ti ALA, ALA yapu na sarango ye, ALA leke ye ti sioni so asi. Na yâ ti ye kue, ALA fa so ALA yeke na tënë oko pëpe na li ti ALA na ndo ti tënë so.
12 Biani, tongana mbi sara lani mbeti na ALA, mbi sara ni pëpe ndali ti zo so asara sioni; mbi sara ni nga pëpe ndali ti zo so a sara sioni na lo, me mbi sara ni ti tene na popo ti ALA nga na gbele Nzapa a bâ ngangu so ALA sara ti mä tënë ti e.
13 Ndani la si bê ti e adë.
Me na ndo ti bê ti e so adë, e kiri e duti na ngia mingi ndali ti ngia so Tite ayeke na ni, ngbanga ti so ALA kue ALA sara si bê ti lo adë.
14 Teti tongana lani mbi pika kate kamême na ndo ti ALA na lê ti lo, kamene asara mbi na pekoni pëpe; me tongana ti so aye kue so e tene na ALA ayeke tâ tënë, tongaso nga a bâ so pikango kate so e pika na lê ti Tite ayeke tâ tënë.
15 Nga, tongana lo dabe ti lo na lege so ALA kue amä yanga nga lege so ALA yamba lo lani na mbeto nga na dongo tere, lo kiri lo ye ALA mingi.
16 Mbi yeke na ngia so na alege nde nde kue ALA sara si mbi wara ngangu.
