2 aCorinthien 8:1-24
8 Aita, e yeke tene na ALA tënë ti kota nzobe ti Nzapa so lo sara na acongrégation ti Macédoine,
2 so na ngoi ti mbeni kota tara, na yâ ti pasi, ala fa so ala yeke na ngia mingi na ala mû ye mingi na zo, atâa so ala yeke na yâ ti kota yere.
3 Teti ye so ala sara alingbi na ngangu ti ala, na mbi lingbi ti tene so ala sara ni ahon ndo ti ngangu ti ala biani,
4 nga ala wani ahunda e mingi ti tene e zia lege na ala ti mû ye na nzobe nga ti mû mbage na yâ ti kusala so a yeke sara ni ndali ti ala so ayeke nzoni-kue.
5 Ala mû ye ni gi tongana ti so e ku fade pëpe, me ala mû tere ti ala kozoni kue na Seigneur nga na e na lege ti ye so bê ti Nzapa aye.
6 Ye so apusu e ti wa Tite ti hunzi kua ti rongo matabisi so ALA mû ni na nzobe, teti lo la lo to nda ti kua ni na popo ti ALA.
7 Gi tongana ti so ALA yeke na aye so kue mingi awe, ALA yeke na mabe, ALA hinga ti sara tënë, ALA hinga ye, ALA yapu na sarango ye nga ALA wu mingi na yâ ti ndoye ti e na mbage ti ALA, zia ALA wu mingi nga na ndo ti tënë ti mungo ye na nzobe.
8 A yeke pëpe ti mû yanga na ALA si mbi yeke sara tënë so, me mbi sara tënë so ndali ti ambeni mba ti ALA so ayapu na sarango ye nga ti bâ wala ALA yeke na tâ ndoye biani.
9 Teti ALA hinga kota nzobe ti Seigneur ti e Jésus Christ: atâa so lo yeke lani zo ti mosoro, lo ga wayere ndali ti ALA ti tene ALA ga azo ti mosoro na lege ti yere ti lo.
10 Mbi yeke fa tënë ti bê ti mbi na ndo ti tënë so: Ye ni so ayeke ndali ti nzoni ti ALA, teti mbi bâ so a sara ngu oko awe si ALA to nda ti sara ni. ALA ye gi pëpe ti sara ni, me ALA to nda ti sara ni awe.
11 Tongaso, zia ALA hunzi nga ni legeoko tongana ti so lani bê ti ALA aye biani ti sara ni, ALA mû nga ye so ALA yeke na ni so ti hunzi na ni.
12 Teti tongana bê ti zo aye biani ti mû ye, a yeke yamba ye ni alingbi na ye so lo yeke na ni, me a yeke yamba ni pëpe alingbi na ye so lo yeke na ni pëpe.
13 Teti mbi ye pëpe si mungo ye ni awoko na ambeni zo, na a kpengba na ALA.
14 Me ti tene ye ni alingbi tere, mbi ye si ye so ALA yeke na ni ahon ndo ni akanga fadeso lê ti ye so atia azo so, nga ye so azo so ayeke na ni ahon ndo ni akanga lê ti ye so atia ALA, si ye ni alingbi tere.
15 Legeoko tongana ti so a sû na Mbeti ti Nzapa, a tene: “Zo so ayeke fade na ni mingi, ti lo ahon ndo ni pëpe, na zo so ayeke fade na ni kete, ti lo ayeke kete mingi pëpe.”
16 Singila na Nzapa teti lo zia na yâ ti bê ti Tite oko bibe ti e so ayeke ti yapu na sarango ye na mbage ti ALA,
17 teti lo yeke biani nduru ti yeda na wango ni, nga teti lo yapu mingi na sarango ye, a yeke na bê ti lo wani si lo yeke gue na ALA kâ.
18 Me na tere ti lo, e yeke tokua nga ita so tënë ti gonda so lo wara ndali ti nzoni tënë amû yâ ti acongrégation kue.
19 Na gi ndali ti tënë so pëpe, me nga ndali ti so acongrégation asoro lo ti duti na tere ti e na yâ ti tambela ni ngbanga ti matabisi so a mû na nzoni bê, matabisi so e si e yeke bâ lege ni teti gloire ti Seigneur nga ti fa so bê ti e aye mingi ti mû maboko na ambeni zo.
20 Ni la, e kpe ti tene mbeni zo asara sioni tënë na ndo ti e ndali ti kota matabisi so a mû na e ti bâ lege ni.
21 Teti e “leke na bê ti e ti sara ye kue mbilimbili, gi na lê ti Jéhovah pëpe, me na lê ti azo nga.”
22 Nga, e yeke tokua legeoko na ala ita ti e so fani mingi nga na yâ ti aye mingi e bâ so lo yapu na sarango ye, me ti fadeso lo yapu na sarango ye mingi ahon ti kozo ndali ti so lo zia bê ti lo kue na ALA.
23 Ye oko, tongana ALA yeke na kite na ndo ti Tite, bâ lo yeke zo so amû mbage legeoko na mbi na yâ ti kusala nga mba ti mbi wakua teti nzoni ti ALA; wala tongana ALA yeke na kite na ndo ti aita ti e ni, bâ ala yeke abazengele ti acongrégation na ala yeke gloire ti Christ.
24 Tongaso, na lê ti acongrégation ni, zia ALA fa na aita ni ye so afa atene ALA yeke na ndoye nga ALA fa ye so e pika kate ti e na ndo ti ALA ndali ni.
