2 aThessalonicien 2:1-17
2 Ye oko, aita, na ndo ti tënë ti ngoi so Seigneur ti e Jésus Christ ayeke si na lo yeke duti dä nga ti bungbingo e na tere ti lo, e hunda na ALA
2 ti zia si li ti ALA aga kirikiri hio pëpe wala tere ti ALA adö pëpe ndali ti mbeni tënë so yingo atene wala ndali ti mbeni tënë so a tene na yanga wala ndali ti mbeni mbeti so mo bâ mo tene e si e tokua ni, so atene lâ ti Jéhovah asi awe.
3 Zia mbeni zo ahanda ALA na mbeni ye oko pëpe, ngbanga ti so lâ ni so ayeke ga kozoni pëpe si kengo tënë* alondo nga a hinga zo-ti-kpengo-ndia-pepe, molenge so a yeke futi lo ande.
4 Lo yeke zo ti kengo tënë na lo bâ tere ti lo so lo yeke na ndo ti azo kue so a iri ala “nzapa” wala so a yeke voro ala, tongaso lo duti na yâ ti temple ti Nzapa na lo fa tere ti lo na lê ti azo tongana mbeni nzapa.
5 So mbi yeke lani na tere ti ALA, ALA dabe ti ALA so mbi yeke sara ka tënë ti aye so na ALA pëpe?
6 Fadeso ALA hinga ye so ayeke kanga lege awe, si lo fa tere ti lo na ngoi ti lo.
7 Tâ tënë, tënë ti kpengo ndia pëpe so zo amä yâ ni pëpe so ato nda ti sara kua ti lo awe; me a yeke ngbâ ye so zo amä yâ ni pëpe ti si gi na ngoi so a yeke zi zo so ayeke kanga lege fadeso.
8 Na pekoni awe, fade zo-so-akpe-ndia-pepe so ayeke fa tere ti lo na gigi, lo so fade Seigneur Jésus ayeke fâ lo na pupu ti yanga ti lo na lo neka lo na lege ti ye so afa so lo si awe na lo yeke dä.
9 Me ngoi so zo-so-akpe-ndia-pepe ayeke si na lo yeke duti dä ayeke na lege ti kusala ti Satan, na lege ti akusala kue ti ngangu, afä nga na aye ti dongo bê ti mvene,
10 na lege ti sarango kusala na akode kue so ayeke mbilimbili pëpe ti handa na azo so ayeke gue ti wara futingo, so ayeke futa ti ala la, ngbanga ti so ala fa pëpe so ala yeke na kota nzara ti tâ tënë si ala wara salut.
11 Ndani la Nzapa azia si bibe ti handango zo asi na ala, si ala mä na bê na mvene,
12 ti tene a fâ ngbanga na li ti ala kue ndali ti so ala mä na bê na tâ tënë pëpe, me ala wara ngia na yâ ti ye so ayeke mbilimbili pëpe.
13 Ye oko, aita so Jéhovah andoye ALA, e bâ so a yeke ti e ti kiri singila na Nzapa lakue ndali ti ALA, ngbanga ti so, ngbene ye na tongo nda ni, Nzapa asoro ALA ti wara salut na lege so lo sara si ALA ga nzoni-kue na lege ti yingo ti lo; nga lo soro ALA na lege ti mabe ti ALA na tâ tënë.
14 A yeke ndali ti salut so la si lo iri ALA na lege ti nzoni tënë so e fa, ti tene ALA wara gloire ti Seigneur ti e Jésus Christ.
15 Tongaso, aita, ALA luti ngangu na ALA bata angobo so a fa na ALA lani, atâa a fa ni na ALA na yanga wala na lege ti mbeti so e tokua.
16 Nga, zia Seigneur ti e Jésus Christ na Nzapa Babâ ti e so andoye e nga so amû na e dengo bê ti lakue lakue nga na nzoni beku na lege ti kota nzobe ti lo
17 adë bê ti ALA na asara si ALA luti ngangu na yâ ti nzoni kusala nga na nzoni tënë kue.
Akete tënë na terê ni
^ Wala “azo so adö nzoni lege ti vorongo Nzapa azia.”
