2 Jean 1:1-13
1 Mbi, mbakoro-koli, mbi sû mbeti so na mama so a soro lo. Mbi sû ni nga na amolenge ti lo so mbi ndoye ala mingi. A yeke gi mbi oko pëpe si andoye ala mingi, me nga azo kue so ahinga tâ tënë.
2 E ndoye ala ndali ti tâ tënë so angbâ na yâ ti e, na a yeke ngbâ ande na e lakue lakue.
3 Fade kota nzobe, nzoni bê nga na siriri so alondo na Nzapa Babâ ni nga na Jésus Christ Molenge ti Babâ ni ayeke duti na e, legeoko na tâ tënë nga na ndoye.
4 A nzere na mbi mingi ti mä so ambeni molenge ti mo ayeke tambela na yâ ti tâ tënë, gi tongana ti so e wara commandement ni na mbage ti Babâ ni.
5 Fadeso, mama, mbi so mbi yeke sû mbeti so na mo, mbi yeke sû na mo mbeni fini commandement pëpe, me gi commandement so e wara lani na tongo nda ni. Ni la, mbi hunda ye so na mo: e ndoye tere na popo ti e.
6 Na ndoye ni ayeke so: e ngbâ ti tambela alingbi na acommandement ti lo. Gi tongana ti so ALA mä na tongo nda ni, so commandement ni la: ALA ngbâ ti tambela na yâ ti ndoye.
7 Teti gbâ ti azo ti handango azo abâ gigi na yâ ti dunia so awe. Ala yeke azo so ayeda pëpe so Jésus Christ aga na yâ ti mitele. So ayeke zo ti handango azo na wato-ti-Christ ni la!
8 ALA bâ tere ti ALA nzoni, si aye so e sara kua ngangu ti wara ni so agirisa na tïtî ALA pëpe, me ALA wara futa ni kue.
9 Zo kue so ahon na dawa na lo ngbâ na yâ ti fango ye ti Christ pëpe, lo yeke beoko na Nzapa pëpe. Me zo so angbâ na yâ ti fango ye so, lo yeke beoko na Babâ ni nga na Molenge ni.
10 Tongana mbeni zo aga na da ti ALA na lo ga na fango ye so pëpe, ALA yamba lo na da ti ALA oko pëpe na ALA bara lo nga pëpe.
11 Teti zo so abara lo amû mbage na asioni kusala ti lo.
12 Atâa so mbi yeke na tënë mingi ti tene na ALA, mbi ye pëpe ti sû ni na encre na lê ti mbeti. Me mbi yeke na beku ti tingbi na ALA na ti sara tënë na ALA lê na lê tongaso si ngia ti ALA alingbi kue.
13 Amolenge ti ita ti mo ti wali, lo so a soro lo, atokua bara ti ala na mo.
