2 Pierre 3:1-18
3 Aita so mbi ndoye ALA mingi, so ayeke use mbeti ni si mbi yeke sara na ALA so; na yâ ti mbeti so, nga na yâ ti kozo mbeti ti mbi ni, mbi zingo ngangu ti gbungo nda ti ye ti ALA nzoni na lege ti tënë ti dango bê,
2 si ALA dabe ti ALA na atënë so aprophète so ayeke nzoni-kue atene ândö nga na commandement ti Seigneur na Sauveur so abazengele ti ALA afa.
3 Kozoni kue ALA hinga ye so awe: Na alango ti nda ni, fade azo ti hengo ndo ayeke ga na atënë ti hengo ndo ti ala, na sarango ye alingbi na anzara ti bê ti ala,
4 ala yeke tene: “Ngoi so lo yeke si na lo yeke duti dä, so a mû zendo ni ândö so, ayeke na ndo wa? Teti a londo na ngoi so akotara ti e akui,* aye kue angbâ tâ gi tongana ti so a yeke na tongo nda ti sarango dunia.”
5 Na bê ti ala wani, ala girisa ye so: ngbene ye giriri ayayu ayeke dä nga mbeni kuru sese ayeke dä so asigigi na yâ ti ngu si a yeke na popo ti ngu na lege ti tënë ti yanga ti Nzapa;
6 nga na lege ti aye so, dunia ti ngoi ni so afuti na ngoi so kota ngu apika amene ni.
7 Me na lege ti oko tënë so, a bata ayayu na sese ti fadeso ti ku na wâ, na a bata ni ti ku lango ti ngbanga nga ti futingo azo so akpe Nzapa pëpe.
8 Ye oko, aita so mbi ndoye ALA mingi, zia ALA girisa ye so pëpe: na lê ti Jéhovah lango oko ayeke tongana ngu saki oko na ngu saki oko ayeke tongana lango oko.
9 Jéhovah ane nengo pëpe na ndo ti tënë ti zendo ti lo, tongana ti so ambeni zo abâ na sarango ye ti zo so ane nengo, me lo yeke kanga bê na ALA ngbanga ti so lo ye si zo oko akui pëpe, me lo ye si azo kue achangé bê ti ala.
10 Me lâ ti Jéhovah ayeke ga tongana zo ti nzi; na lango ni so, ayayu ayeke hon hio tongaso tongana toto ti bekpa, na aye ni so amû wâ ngangu ayeke ga tongana ngu si a girisa, nga sese na akusala so ayeke na yâ ni ayeke sigigi dandara.
11 So aye so kue ayeke ga tongana ngu so, a yeke nzoni ALA bâ wala dutingo ti ALA ayeke tongana nyen na lege ti sarango ye so ayeke nzoni-kue nga na akusala so afa so ALA gbu tënë ti Nzapa ngangu;
12 ALA ku na ALA bata na li ti ALA ngoi so lâ ti Jéhovah ayeke si na ayeke duti dä, so na yâ ni ayayu so wâ amû ni ayeke ga tongana ngu si a girisa na aye ni so amû wâ ngangu mingi ayeke ga tongana ngu.
13 Me na lege ti zendo ti lo, e yeke ku afini yayu na fini sese so mbilimbili ayeke duti ande na yâ ni.
14 Tongaso, aita so mbi ndoye ALA mingi, so ALA yeke ku aye so, ALA sara ngangu kue ti tene na nda ni lo wara ALA na saleté na tere ti ALA pëpe, na sioni ye na tere ti ALA pëpe nga na yâ ti siriri.
15 Nga, ALA bâ kangango bê ti Seigneur ti e tongana salut, gi tongana ti so ita ti e Paul so e ndoye lo mingi asû ni na mbeti na ALA alingbi na ndara so a mû na lo;
16 lo sara tënë na ndo ti aye so gi tongana ti so lo sara nga na yâ ti ambeti ti lo kue. Me, na yâ ti ambeti ni so, ambeni ye ayeke dä so a yeke ngangu ti mä yâ ni, aye so azo so ahinga mbeti pëpe nga so gere ti ala aluti kpô pëpe ayeke ba yâ ni, tongana ti so ala yeke sara na tanga ti Mbeti ti Nzapa kue, ti ga na futingo na ndo ti ala.
17 Tongaso, aita so mbi ndoye ALA mingi, so ALA hinga ye so kozo awe, ALA sara hange si girisango lege ti azo ni so akpe ndia pëpe ague na ALA yongoro pëpe si ALA tï, atâa so ALA wani ALA luti fade ngangu.
18 Me ALA ngbâ ti maï na yâ ti kota nzobe nga na yâ ti hingango ye na ndo ti Seigneur na Sauveur ti e Jésus Christ. Zia a mû na lo gloire laso nga teti lakue lakue.
Akete tënë na terê ni
^ Na Grec: “alango (na yâ ti kuâ).”
