aColossien 2:1-23
2 Mbi ye ALA hinga tâ kota tiri so mbi yeke tiri ni ndali ti ALA, ndali ti ala so ayeke na Laodicée nga ndali ti ala kue so ade ti bâ lê ti mbi lâ oko pëpe,
2 si bê ti ala alingbi ti dë, tongaso si ala kue atingbi ti ga oko na yâ ti ndoye ti tene ala wara kota mosoro so ayeke gbungo nda ti ye nzoni so ala yeke na ni, so ayeke polele nga so ayeke tâ gi ni la awe, ti tene ala wara tâ hingango ye ti tënë so Nzapa ahonde nda ni, so ayeke Christ.
3 A yeke na yâ ti lo si a honde ngangu amosoro kue ti ndara na ti hingango ye.
4 Mbi tene tongaso si mbeni zo ahanda ALA pëpe na atënë so ague na zo ti ye peko ti mbeni ye.
5 Teti atâa so mbi wani mbi yeke dä pëpe, bê ti mbi ayeke na ALA, mbi yeke na ngia nga mbi yeke bâ so aye ayeke tambela na lege ni na popo ti ALA nga mabe ti ALA na Christ ayengi pëpe.
6 So ALA yeda na Seigneur Christ Jésus awe, zia ALA ngbâ ti tambela beoko na lo,
7 gunda ti ALA alï sese na ALA kpengba na yâ ti lo, ALA yengi pëpe na yâ ti mabe gi tongana ti so a fa lani na ALA, nga na ngoi so ALA yeke kiri singila na Nzapa, zia mabe awu mingi mingi na yâ ti ALA.
8 ALA sara hange si mbeni zo agbu ALA na kûkû pëpe na lege ti senda-ndara na senge tënë ti handa so alondo na ngobo ti azo, so ague oko na aye ti dunia so, so ayeke tongana aye ti molenge, me a gue oko na Christ pëpe,
9 ngbanga ti so a yeke na yâ ti lo si asarango ye ti tere ti Nzapa kue kue kue aga mbeni tere na a duti dä.
10 Ni la, ALA manke mbeni ye oko pëpe na lege ti lo, lo so lo yeke li ti ngorogbia kue nga na komandema kue.
11 Ndali ti songo so ALA yeke na ni na lo, a fâ nga ALA na ganza, so ayeke ganza ti Christ, so maboko si afâ ni pëpe na zingo tere ti zo so siokpari ayeke dä,
12 teti a lu ALA na Christ na yâ ti batême ti lo, nga ndali ti songo so ALA yeke na ni na lo, a zingo ALA nga na kuâ ndali ti mabe ti ALA na yâ ti ye so Nzapa asara, Nzapa so azingo Christ na kuâ.
13 Nga, atâa so ALA kui lani awe na yâ ti afaute ti ALA, na yâ ti dutingo ti ALA ti zo so a fâ lo na ganza pëpe, Nzapa asara si ALA kiri na fini na ALA ga oko na Christ. Nzapa asara nzoni bê, lo pardone afaute ti e kue
14 na lo mbô mbeti so a sû ni si a zia tënë na li ti e, so na yâ ni a yeke wara ambela so afâ ngbanga na li ti e; na Nzapa alungula ni na lege so lo pika ni na pointe na ndo ti keke ti pasi.
15 Lo zi aye kue na tere ti angorogbia na akomandema si ala ngbâ tere senge, na lo fa ala na lê ti azo tongana azo so a kinda ala awe; na lege ti keke ti pasi ni lo yeke gboto ala gbotongo na yâ ti molongo ti azo so asö benda awe si ayeke tambela na yâ ni.
16 Ndani la, zia mbeni zo afâ ngbanga na li ti ALA pëpe ndali ti tengo ye na nyongo ye wala ndali ti mbeni matanga wala batango mbeni fini nze wala lâ ti sabbat;
17 teti aye so kue ayeke gbede ti mbeni ye so ayeke ga ande, me tâ ye ni ayeke ti Christ.
18 ALA zia si mbeni zo anzi futa ti ALA pëpe, mbeni zo so ayeke wara ngia na yâ ti be-ti-molenge so ayeke gi ti mvene ni nga na yâ ti mbeni lege ti vorongo a-ange. Zo tongaso “aluti mingi na ndo ti” aye so lo bâ, na bibe ti lo ti mitele apusu lo ti pika kate senge senge,
19 me lo ngbâ pëpe na tere ti li ni, so ti tene, lo so na lege ti lo, tere ni kue angbâ gi ti kono na konongo ti so Nzapa aye, ndali ti so tere ni ayeke wara ye na atingbi oko na lege ti kusala ti ando so abio ni atingbi dä nga ndali ti akamba ti tere ni.
20 Tongana ALA kui legeoko na Christ awe na ndo ti tënë ti aye ti dunia so, so ayeke tongana aye ti molenge, ngbanga ti nyen ALA kiri ALA woko tere na gbe ti ambela so, mo bâ mo tene ALA ngbâ na yâ ti dunia ni? Ambela so atene:
21 “Mû ye so pëpe, tara ye so pëpe, ndu ye so pëpe”;
22 so kue so ayeke gi acommandement nga na afango ye ti azo na ndo ti tënë ti aye so tongana a sara kua na ni awe a yeke hunzi hunzingo.
23 Biani, ambela so akpa ye so ayeke na ndara, na a yeke bâ ni na lege ti vorongo Nzapa ti li ti zo wani, sarango ye na be-ti-molenge so ayeke gi ti mvene ni na sarango tere ti zo na pasi. Me aye so kue so ayeke senge senge na yâ ti bira so zo ayeke sara na nzara ti bê ti lo.
