aColossien 4:1-18
4 Awa ti angbâa, ALA sara lakue na angbâa ti ALA ye so ayeke mbilimbili nga na lege ni, na hingango so ALA yeke nga na mbeni Wa ti ALA na yayu.
2 ALA ngbâ lakue ti sambela. Na ndo ti tënë ti sambela ni, zia lê ti ALA angbâ na zingo ni na ALA kiri singila;
3 na oko ngoi ni ALA sambela nga ndali ti e si Nzapa azi mbeni yanga-da na e ti fa tënë ni nga ti fa na azo tënë ti Nzapa so lo honde nda ni, tënë so andu Christ, so ndali ni si mbi yeke na yâ ti zingiri,
4 tongaso si mbi fa tënë ni na gigi tongana ti so a lingbi mbi fa ni na azo.
5 ALA ngbâ lakue ti sara ye na ndara na mbage ti azo so ayeke na gigi, na sarango kusala nzoni na ngoi* ti ALA.
6 Zia lakue tënë ti yanga ti ALA aduti nzoni, ALA zia ingo dä, si ALA hinga tongana nyen a lingbi ALA kiri tënë na zo oko oko.
7 Tychique, ita ti mbi so mbi ndoye lo mingi, wakua be-ta-zo nga mba ti mbi ngbâa na yâ ti Seigneur, ayeke fa ande na ALA tënë ti aye kue so asi na mbi.
8 A yeke ti tene ALA hinga ye so asi na e na ti tene bê ti ALA adë si mbi yeke tokua lo na ALA so,
9 lo na Onésime, ita ti mbi so ayeke be-ta-zo nga so mbi ndoye lo mingi, lo so lo yeke ti ALA kâ. Fade aita so ayeke fa na ALA aye kue so asi ge.
10 Aristarque, mba ti mbi so a bi mbi na lo na kanga, atokua bara na ALA; Marc, fami ti Barnabas, abara ALA nga (lo la si a mû lani yanga na ALA ndali ti lo a tene: tongana lo si na ALA kâ, ALA yamba lo nzoni),
11 na Jésus, so a iri lo Justus; ala so ayeke ti azo so afâ ganza. Gi ala so si ayeke amba ti mbi wakua teti royaume ti Nzapa, na a yeke ala si aga awamungo maboko so akpengba mbi.
12 Épaphras, lo so lo yeke ti ALA kâ, mbeni ngbâa ti Christ Jésus, atokua bara na ALA. Lakue lo yeke tiri ngangu ndali ti ALA na yâ ti asambela ti lo ti tene na nda ni ALA ga azo so akpengba kue awe nga so amä na bê ngangu na ye kue so bê ti Nzapa aye.
13 Mbi yeke tene nzoni tënë ti lo, so lo yeke sara kua ngangu ndali ti ALA, ndali ti azo so ayeke na Laodicée nga na ala so ayeke na Hiérapolis.
14 Luc, wanganga so e ndoye lo mingi, atokua bara na ALA, Démas kue abara ALA.
15 ALA tene bara ti mbi na aita ti Laodicée, ALA tene ni nga na ita-wali Nymphas nga na congrégation so ayeke na yâ ti da ti lo.
16 Na tongana ALA diko mbeti so na popo ti ALA awe, ALA leke si a diko ni nga na yâ ti congrégation ti aita ti Laodicée na ALA diko nga mbeni mbeti ni so ayeke ti Laodicée.
17 Nga, ALA tene tënë so na Archippe, ALA tene: “Mo zia lê ti mo lakue na ndo ti kusala so mo yeda ti wara ni na yâ ti Seigneur, si mo sara ni a hunzi.”
18 So bara ti mbi Paul la, so mbi wani mbi sû na maboko ti mbi. ALA bi bê ti ALA lakue na zingiri so mbi yeke na yâ ni. Zia kota nzobe ti Nzapa aduti na ALA.
Akete tënë na terê ni
^ Na Grec: “vongo ngoi so alingbi.”
