aPhilippien 3:1-21
3 Ti hunzi na ni, aita ti mbi, ALA ngbâ ti duti na ngia na yâ ti Seigneur. Ti mbi, ti kiri ti sû mbeti na ndo ti a-oko tënë so ason mbi pëpe, me a yeke ti bata ALA nzoni.
2 ALA sara hange na ambo, ALA sara hange na azo so ayeke sara sioni na amba ti ala, ALA sara hange na ala so afâ zo na ganza.
3 Teti e yeke azo so afâ tâ ganza ni, na so ayeke sara kusala so ayeke nzoni-kue na Nzapa na lege ti yingo ti lo, na e pika kate na ndo ti Christ Jésus nga e zia bê ti e kue na ndo ti aye ti mitele pëpe,
4 atâa so mbi yeke na araison ahon tanga ti azo kue ti zia bê ti mbi kue na ndo ti aye ti mitele.
Tongana mbeni zo abâ ti lo so lo yeke na araison ti zia bê ti lo kue na ndo ti aye ti mitele, mbi yeke na ni ahon lo:
5 A fâ mbi na ganza lango miombe na peko ti dungo mbi, mbi yeke zo ti mara ti Israël, ti kete mara ti Benjamin, mbi yeke Hébreu na babâ na mama ti mbi kue ayeke aHébreu; âdu ti tënë ti ndia, mbi yeke Farizien;
6 âdu ti sarango ye na yapungo tere, mbi sara ngangu na congrégation; âdu ti gango zo ti mbilimbili na lege ti kpengo ndia, mbi yeke mbeni zo so a wara tënë na li ti lo oko pëpe.
7 Me ti aye so lani mbi yeke bâ nzoni dä, na bê ti mbi wani mbi dö ni mbi zia ndali ti Christ.
8 Biani, ndali ti hingango ye na ndo ti Christ Jésus Seigneur ti mbi so mbeni ye ti hon ni ayeke dä pëpe, mbi dö aye kue mbi zia. Ndali ti lo, mbi dö aye kue mbi zia, na mbi bâ aye ni tongana gbâ ti azende si mbi lingbi ti wara Christ
9 na a bâ so mbi yeke beoko na lo; so mbi yeke beoko na lo so, a yeke ndali ti mbilimbili ti mbi wani pëpe, mbilimbili so aga na lege ti ndia, me a yeke ndali ti mbilimbili so aga na lege ti mabe na Christ, mbilimbili so alondo na Nzapa ngbanga ti mabe,
10 si mbi hinga Christ nga na ngangu ti zingongo ti lo na kuâ, ti bâ pasi tongana lo, ti kui mara ti kuâ ti lo,
11 ti bâ wala mbi lingbi ti wara lege ti zingo na zingongo ti akuâ so ayeke duti ti lo hio.
12 Mbi tene pëpe so mbi wara futa ni awe wala mbi ga ti mbi zo so alingbi kue awe, me mbi yeke tomba pekoni ti bâ wala mbi lingbi nga ti gbu ye so Christ Jésus kue agbu mbi ndali ni.
13 Aita, mbi bâ ti mbi so mbi de ti gbu ye ni pëpe; me ye oko so mbi hinga ayeke so: Mbi yeke girisa aye kue so ayeke na peko ti mbi na mbi yôro go ti mbi na mbage ti aye so ayeke na dawa,
14 mbi ngbâ ti kpe loro ni ti wara ye so ayeke na gbele mbi so ayeke futa ti iringo ndo ti gue na yayu, iringo ndo so Nzapa airi na lege ti Christ Jésus.
15 Tongaso, e kue so e kpengba awe, zia e duti na mara ti bango ndo tongaso, na tongana ALA yeke na mbeni bibe nde na ndo ti mbeni tënë, Nzapa ayeke fa ande na ALA bango ndo ni so e sara tënë ni fade.
16 Atâa nyen la asi, ndo so e maï ngbii si e si dä awe so, zia e ngbâ ti tambela mbilimbili na ndo ti oko lege ni so.
17 Aita, ALA kue ALA ga azo so asara ye tongana mbi, na ALA zia lê ti ALA na ndo ti azo so ayeke tambela alingbi na tapande so ALA bâ na mbage ti e.
18 Teti azo mingi ayeke dä (mbi yeke sara ka tënë ti ala lani, me fadeso mbi yeke sara tënë ti ala nga na ngu ti lê) so ayeke tambela tongana awato ti keke ti pasi ti Christ,
19 na ala yeke gue gi ti tene a futi ala, nzapa ti azo so ayeke yâ ti ala, na ala sara baba na ndo ti aye so alingbi fade ti zia kamene na lê ti ala, na ala bi bê ti ala na ndo ti aye ti sese.
20 Âdu ti e, kodoro ti e ayeke na yayu, na a yeke kâ si mbeni sauveur ayeke londo ti ga, Seigneur Jésus Christ so lê ti e ayeke na lege ti ku lo;
21 lo si fade lo yeke kiri ti leke tere ti e ti kamene so ti kpa tere ti lo so ayeke na gloire a lingbi na ngangu so lo yeke na ni ti sara na kua, même ti zia aye kue na gbe ti lo.
