Apocalypse 12:1-17
12 Na pekoni, a bâ mbeni kpengba fä na yayu: mbeni wali so ayü lâ tongana bongo na tere ti lo, nze ayeke na gbe ti gere ti lo, mbeni couronne ti atongoro bale-oko na use ayeke na li ti lo,
2 na lo yeke na ngo. Lo yeke dekongo ndali ti songo yâ ti lo nga ndali ti pasi ti dungo ni.
3 A bâ nga mbeni fä nde na yayu: bâ, mbeni kota sioni nyama so akpa ngbo so tere ti lo abe tongana wâ, lo yeke na ali mbasambala na adidi bale-oko; akpoto ti gbia ayeke na ali ti lo ni oko oko si akpoto ni kue ayeke mbasambala;
4 tongana a mû atongoro kue ti yayu, damba ti sioni nyama so agboto mbage oko ti ala na popo ti ambage ota na lo bi atongoro so na sese. Sioni nyama so akpa ngbo so ayeke luti na gbele wali ni so aye ti dü, si tongana lo dü awe, lo te molenge ni.
5 Na wali ni adü mbeni molenge ti koli so, tongana berger, ayeke komande amara kue na keke ti wen. Na a mû molenge ni hio a gue na lo na tere ti Nzapa na ti trône ti lo.
6 Wali ni akpe ague na yando, na mbeni ndo so Nzapa aleke na lo kâ, si a mû na lo kobe na yâ ti alango saki oko ngbangbo use na bale-omene.
7 Na pekoni, bira alondo na yayu: Michel na a-ange ti lo atiri bira na sioni nyama so akpa ngbo so, na sioni nyama ni na a-ange ti lo nga atiri na ala,
8 me sioni nyama ni asö benda pëpe, nga ndo angbâ mbeni pëpe ndali ti ala na yayu.
9 Tongaso a bi kota sioni nyama so akpa ngbo so, ngbo ti giriri, lo so a iri lo Zabolo na Satan, lo so ayeke handa sese kue so azo ayeke dä; a bi lo na sese, na a bi nga a-ange ti lo ni legeoko na lo.
10 Na mbi mä mbeni go asara tënë na kota go na yayu atene:
“Fadeso salut, na ngangu, na royaume ti Nzapa ti e nga na komandema ti Christ ti lo aga tâ ye awe, ngbanga ti so a bi zo ti bingo tënë na li ti aita ti e na sese awe, lo so ayeke bi tënë na li ti ala bï na lâ na gbele Nzapa ti e!
11 Na ala sö benda na ndo ti lo ngbanga ti mênë ti Molenge ti ngasangbaga ni nga ngbanga ti ye so ala yeke fa tënë na ndo ni; na tënë ti âme ti ala agbu bê ti ala pëpe, même tongana ala tingbi lê na lê na kuâ.
12 Ndani la, ALA duti na ngia, ayayu na ALA so ayeke kâ! Mawa na sese nga na ngu-ingo, ngbanga ti so Zabolo azu na mbage ti ALA, lo yeke na kota ngonzo, teti lo hinga so lo yeke na ngoi mingi pëpe.”
13 Tongana sioni nyama so akpa ngbo so abâ so a bi lo na sese awe, lo sara ye ti ngangu na wali so adü fade molenge ti koli so.
14 Me a mû akpangbi use ti kota ngualo na wali ni si lo huru lo gue na yando, na ndo ti lo; kâ si a yeke mû kobe na lo teti ngoi oko, ngoi use na ndambo ti ngoi oko, yongoro na lê ti ngbo ni.
15 Na ngbo ni adë mbeni ngu na yanga ti lo tongana bale na peko ti wali ni, ti tene bale ni amene lo.
16 Me sese aga amû maboko na wali ni, sese azi yanga ti lo na amene bale so sioni nyama ni adë na yanga ti lo so.
17 Na ngonzo agbu sioni nyama so na tere ti wali ni, si lo gue ti sara bira na tanga ti ala so ayeke ti ngongoa ti wali ni, ala so ayeke bata acommandement ti Nzapa nga so ayeke na kusala ti fango tënë na ndo ti Jésus.
