Apocalypse 13:1-18
13 Lo ngbâ lo luti na ndo ti mbutu ti ngu-ingo.
Na mbi bâ mbeni nyama ti ngonda, lo londo na yâ ti ngu-ingo ni lo yeke sigigi; lo yeke na adidi bale-oko na ali mbasambala; akpoto ti gbia ayeke na ndo ti adidi ti lo ni oko oko si akpoto ni kue ayeke bale-oko; me na ndo ti ali ti lo ni, airi so azonga Nzapa ayeke dä.
2 Nyama ti ngonda so mbi bâ akpa ze, me agere ti lo ayeke tongana agere ti nyama so a iri lo ours nga yanga ti lo akpa yanga ti bamara. Na sioni nyama so akpa ngbo so amû ngangu ti lo, trône ti lo na kota komandema ti lo na nyama ti ngonda so.
3 Na pekoni, mbi bâ mbeni oko ti ali ti nyama ni, mo bâ mo tene a dë ni dengo si kä ni akpa ti tene lo kui fade na ni, me kä ni amü. Na sese kue amû peko ti nyama ti ngonda so na gondango lo.
4 Ala voro sioni nyama so akpa ngbo so ngbanga ti so lo mû komandema na nyama ti ngonda ni, nga ala voro nyama ti ngonda ni, ala tene: “Zo wa si ayeke tongana nyama ti ngonda so? Na zo wa si alingbi ti tiri na lo?”
5 A mû na nyama so mbeni yanga so atene akota tënë na atënë ti zongango ndo, nga a mû na lo komandema ti sara ye teti nze bale-osio na use.
6 Na lo zi yanga ti lo ti zonga Nzapa, ti zonga iri ti lo nga na ndo so lo duti dä, so ti tene azo so ayeke na yayu.
7 A mû lege na lo ti sara bira na azo so ayeke nzoni-kue nga ti sö benda na ndo ti ala; a mû na lo komandema na ndo ti akete mara kue, azo ti kodoro kue, azo ti yanga ti kodoro kue nga na amara kue.
8 Na azo kue so asara kodoro na ndo ti sese ayeke voro nyama ti ngonda so; ti londo na ngoi so a zia gere ti dunia, a sû iri ti zo oko pëpe na popo ti ala na yâ ti mbeti ti fini so ayeke ti Molenge ti ngasangbaga so a fâ lo ândö.
9 Zia zo so ayeke na mê ti mä amä.
10 Tongana a leke ti tene a gbu mbeni zo na ngbâa, lo yeke gue gi na ngbâa ni. Tongana a si so mbeni zo afâ zo na épée, a lingbi a fâ lo na épée. Ge la si a hunda na azo so ayeke nzoni-kue ti gbu ngangu nga ti duti na mabe.
11 Na mbi bâ mbeni nyama ti ngonda ni nde so alondo na yâ ti sese ayeke montê, lo yeke na adidi use tongana ti molenge ti ngasangbaga, me lo to nda ti sara tënë tongana mbeni sioni nyama so akpa ngbo.
12 Lo sara kusala na komandema kue ti kozo nyama ti ngonda ni, na lo sara ni na gbele lo. Lo sara si sese nga na azo so asara kodoro na ndo ni avoro kozo nyama ti ngonda ni, so ayeke na kä so akpa ti tene lo kui fade na ni, me so a mü.
13 Lo sara akota fä, juska lo sara si wâ alondo na yayu azu na sese na lê ti azo kue.
14 Lo handa azo so asara kodoro na sese, ndali ti afä so a mû lege na lo ti sara na lê ti nyama ti ngonda ni; na oko ngoi ni, lo tene na azo so asara kodoro na sese ti leke mbeni image ndali ti nyama ti ngonda so a dë lo na épée me lo kiri lo zingo so.
15 A mû na lo lege ti tokua pupu na yâ ti image ti nyama ti ngonda ni, tongaso si image ni asara tënë nga a lingbi ti sara si a fâ ala kue so ayeke ke ti voro image ti nyama ti ngonda ni.
16 Lo gbu azo kue na ngangu, akete zo na akota zo, azo ti mosoro na awayere, azo so ayeke ngbâa pëpe na angbâa, ti tene a zia mbeni marque na yâ ti maboko ti ala ti koli wala na ndo ti lê ti ala,
17 nga ti tene mbeni zo awara lege ti vo ye wala ti kä ye pëpe, me gi zo so ayeke na marque ni, so ti tene iri ti nyama ti ngonda ni wala numero ti iri ti lo ni.
18 Ge la si a hunda ti duti na ndara: Zia zo so ayeke na hingango ndo adiko numero ti nyama ti ngonda ni, teti a yeke numero ti zo; na numero ni ayeke ngbangbo omene na bale-omene na omene.
