Apocalypse 19:1-21
19 Na peko ti aye so, mbi mä mbeni ye tongana go ti acréature mingi mingi na yayu. Ala tene: “ALA sepela Jah!* Salut, na gloire nga na ngangu ayeke ti Nzapa ti e,
2 ndali ti so angbanga so lo fâ ayeke tâ tënë nga mbilimbili. Teti lo fâ ngbanga na li ti kota wali-ndumba so abuba sese na lango-sioni ti lo, na lo futa kula ndali ti mênë ti angbâa ti lo so ayeke na maboko ti wali so.”
3 Na ala ngbâ ala tene ti fani use ni: “ALA sepela Jah! Na guru ti wâ so agbi wali so ayeke montê na nduzu teti lakue lakue nga kpu na kpu.”
4 A-ancien bale-use na osio nga na acréature osio so ayeke na fini akuku na ala voro Nzapa so aduti na ndo ti trône, ala tene: “Amen! ALA sepela Jah!”
5 Nga, mbeni go alondo na mbage ti trône ni atene: “ALA sepela Nzapa ti e, ALA angbâa ti lo kue so akpe mbeto ti lo, akete zo na akota zo.”
6 Na pekoni, mbi mä mbeni go tongana go ti azo mingi mingi, tongana toto ti angu so asua ngangu nga tongana toto ti abekpa so asungba ngangu. Ala tene: “ALA sepela Jah, ngbanga ti so Jéhovah Nzapa ti e, Lo ti ngangu ahon kue, ato nda ti komande tongana gbia awe.
7 Zia e duti na ngia na tere ti e anzere mingi; zia e mû gloire na lo, ngbanga ti so mariage ti Molenge ti ngasangbaga ni asi awe na wali ti lo aleke tere ti lo awe.
8 Biani, a mû lege na lo ti yü pendere bongo ti lin so aza zango, so saleté ayeke dä pëpe, teti pendere lin ni aduti fä ti akusala ti mbilimbili so azo so ayeke nzoni-kue asara ni.”
9 Na pekoni, lo tene na mbi: “Sû tënë so na mbeti: Ngia ayeke na ala so a tisa ala na matanga ti mariage ti Molenge ti ngasangbaga.” Nga, lo tene na mbi: “So ayeke atâ tënë so alondo na yanga ti Nzapa.”
10 Na mango tënë so, mbi tï na gere ti ange ni ti voro lo. Me lo tene na mbi: “Hange! Sara ye tongaso pëpe! Mbi yeke gi mba ti mo ngbâa nga na ti aita ti mo so kusala ti ala ayeke ti fa tënë na ndo ti Jésus. Mo voro Nzapa; teti fango tënë na ndo ti Jésus ayeke ye so aprophétie agboto lê dä.”
11 Na pekoni, mbi bâ yayu alungula, na bâ, mbeni vuru mbarata. Lo so aduti na ndo ti mbarata ni, iri ti lo ayeke Be-ta-zo so ayeke tene gi tâ tënë; lo fâ ngbanga nga lo sara bira na lege ti mbilimbili.
12 Lê ti lo ayeke menga-wa, akpoto mingi ti gbia ayeke na li ti lo. Lo yeke na mbeni iri so a sû ni sungo so mbeni zo ahinga ni pëpe, gi lo oko awe;
13 lo yü mbeni bongo ti ndo ni so a fi mênë na tere ni, na iri so a yeke iri na lo ayeke Tënë ti Nzapa.
14 Nga, aturugu so ayeke na yayu ayeke mû peko ti lo na ndo ti avuru mbarata, na ala yü pendere vuru bongo ti lin so saleté ayeke dä pëpe.
15 Mbeni yongoro épée so yanga ni aza asigigi na yanga ti lo, si lo lingbi ti dë amara na ni, na fade lo yeke komande ala na mbeni keke ti wen. Lo dö yâ ti kota dû ti petengo na vin ti ngonzo ti Nzapa, Lo ti ngangu ahon kue.
16 Lo yeke na mbeni iri so a sû na ndo ti bongo ti lo ti ndo ni, tâ na ndo ti kuni ti lo, a tene: Gbia ti agbia na Seigneur ti aseigneur.
17 Mbi bâ nga mbeni ange so ayeke luti na bê ti lâ, lo dekongo na kota go nga lo tene na andeke kue so ayeke huru na lê ti nduzu: “ALA ga ge, ALA bungbi tere ti ALA ndali ti kota matanga ti Nzapa,
18 si ALA te nyama ti tere ti agbia, ti amokonzi ti aturugu, ti angangu zo, ti ambarata na ti azo so aduti na ndo ti ambarata ni, ti azo kue, ti azo so ayeke angbâa pëpe na ti angbâa, ti akete zo na akota zo.”
19 Na pekoni, mbi bâ nyama ti ngonda ni, agbia ti sese nga na aturugu ti ala abungbi tere ti ala ti tiri bira na lo so aduti na ndo ti mbarata ni nga na aturugu ti lo.
20 A gbu nyama ti ngonda ni, a gbu nga prophète ti wataka ni so ayeke sara lani afä na lê ti lo si lo yeke handa azo so awara marque ti nyama ti ngonda ni nga na ala so avoro image ti lo. A mû ala na fini lê ti ala, a bi ala na yâ ti lac ti wâ so soufre ayeke gbi dä.
21 Me tanga ti azo ni, a fâ ala na yongoro épée ti lo so aduti na ndo ti mbarata ni, épée so asigigi na yanga ti lo. Na andeke kue ate nyama ti tere ti ala si yâ ti ala asi.
Akete tënë na terê ni
^ Wala “alléluia.”
