Apocalypse 20:1-15
20 Na pekoni, mbi bâ mbeni ange so alondo na yayu azu; kelele ti kota dû so alï mingi nga na kota zingiri ayeke na maboko ti lo.
2 Lo gbu sioni nyama so akpa ngbo so, ngbo ti giriri, so ayeke Zabolo na Satan, na lo kanga lo teti ngu saki oko.
3 Lo bi lo na yâ ti kota dû so alï mingi, lo kanga yanga ni na ndo ti lo nga lo kpo nzoroko dä, si lo handa amara mbeni pëpe juska angu saki oko ni ahunzi si. Na peko ti aye so, a yeke zi lo teti kete ngoi.
4 Nga, mbi bâ atrône na azo so aduti na ndo ni, na a mû na ala ngangu ti fâ ngbanga. Biani, mbi bâ âme ti ala so a fâ ala ândö na dö ndali ti tënë so ala fa na ndo ti Jésus nga ndali ti so ala fa tënë na ndo ti Nzapa; mbi bâ nga ala so avoro nyama ti ngonda ni nga na image ti lo pëpe si ala wara nga marque ti nyama ni na ndo ti lê ti ala nga na ndo ti maboko ti ala pëpe. Ala kiri na fini na ala komande tongana agbia legeoko na Christ teti ngu saki oko.
5 (Tanga ti akuâ ni akiri na fini pëpe juska ngu saki oko ni ahunzi si.) So ayeke kozo zingongo ti akuâ la.
6 Ngia ayeke na zo kue so azingo na kozo zingongo ti akuâ ni, nga lo yeke nzoni-kue; kuâ ti use ni ayeke na komandema na ndo ti azo so pëpe, me fade ala yeke duti aprêtre ti Nzapa na ti Christ na fade ala yeke komande tongana agbia legeoko na Christ na yâ ti ngu saki oko ni.
7 Gi so ngu saki oko ni ayeke hunzi, a yeke zi Satan na kanga so lo yeke dä,
8 na lo yeke sigigi ti gue ti handa amara so ayeke na andangoro osio ti sese, Gog na Magog, ti bungbi ala oko ti sara bira. Wungo ti ala ayeke tongana mbutu ti ngu-ingo.
9 Ala yeke mû kota lê ti sese ni ti ga na ni na ala ngoro kando ti azo so ayeke nzoni-kue nga na gbata so Nzapa andoye ni mingi. Me wâ alondo na yayu azu si agbi ala kue kue kue.
10 Nga, a mû Zabolo so ayeke handa ala, a bi lo na yâ ti lac ti wâ na soufre, ndo so nyama ti ngonda ni nga na prophète ti wataka ni ayeke ti ala dä kozo awe; na fade a yeke sara pasi na ala bï na lâ teti lakue lakue nga kpu na kpu.
11 Na pekoni, mbi bâ mbeni kota vuru trône na lo so aduti na ndo ni. Sese na yayu akpe na gbele lo, na a wara ndo ndali ti ala pëpe.
12 Mbi bâ nga akuâ, akota zo na akete zo, ala yeke luti na gbele trône ni, na a zi yâ ti ambeni mbeti so a rulê ni rulengo. Me a zi nga yâ ti mbeni mbeti ni nde so a rulê ni rulengo: a yeke mbeti ti fini. A fâ ngbanga ti akuâ ni alingbi na aye so a sû ni na yâ ti ambeti so, a lingbi na aye so ala sara.
13 Ngu-ingo akiri na azo so ayeke na yâ ti lo, kuâ na Hadès akiri na azo so akui si ayeke na yâ ti ala, nga a fâ ngbanga ti azo ni oko oko alingbi na aye so ala sara.
14 Na pekoni, a bi kuâ nga na Hadès na yâ ti lac ti wâ. So aye ti tene kuâ ti use ni, lac ti wâ ni.
15 Nga, zo kue so a wara iri ti lo na yâ ti buku ti fini pëpe, a bi lo na yâ ti lac ti wâ ni.
