Apocalypse 3:1-22
3 “Sû mbeti na ange ti congrégation so ayeke na Sardes, mo tene: Bâ aye so lo so ayeke na ayingo mbasambala ti Nzapa na atongoro mbasambala atene la: ‘Mbi hinga aye so mo sara, mbi hinga so azo abâ atene mo yeke na fini, andâ mo kui ti mo awe.
2 Zia lê ti mo akpengba, na mo mû ngangu na aye so angbâ me so aga nduru ti kui, teti mbi bâ so aye so mo sara, mo sara ni ahunzi kue pëpe na gbele Nzapa ti mbi.
3 Tongaso, ngbâ ti dabe ti mo tongana nyen mo wara ni, tongana nyen mo mä ni na ngbâ ti bata ni, nga changé bê ti mo. Biani, mbi yeke ga tongana zo ti nzi na fade mo hinga oko pëpe na ngoi wa mbi yeke si na ndo ti mo; tongana mo zingo na lango, mbi yeke sara tongaso pëpe.
4 “ ‘Ye oko, mo yeke na ambeni zo oko oko na Sardes so ala sara si abongo ti ala ti ndo ni aga sioni pëpe, na ala yeke tambela ande na mbi na avuru bongo, ngbanga ti so ala lingbi.
5 Zo so asö benda, fade a yeke yü na lo avuru bongo ti ndo ni; na fade mbi mbô iri ti lo oko pëpe na yâ ti buku ti fini, me fade na lê ti Babâ ti mbi nga na lê ti a-ange ti lo, mbi yeke tene so mbi hinga iri ti lo.
6 Zia zo so ayeke na mê amä ye so yingo atene na acongrégation.’
7 “Sû mbeti na ange ti congrégation so ayeke na Philadelphie, mo tene: Bâ aye so lo so ayeke nzoni-kue, lo so ayeke biani ye so lo tene ni yeke, lo so ayeke na kelele ti David, so tongana lo zi mbeni ye zo ti kangango ni ayeke dä pëpe, nga so tongana lo kanga ni mbeni zo ti zingo ni ayeke dä pëpe, atene la:
8 ‘Mbi hinga aye so mo sara (bâ, mbi zia na gbele mo mbeni yanga-da so azi, so mbeni zo alingbi ti kanga ni pëpe), mbi hinga so mo yeke na ngangu kete, mo bata tënë ti mbi nga mo bere iri ti mbi pëpe.
9 Bâ, fade mbi mû ala so ayeke ti synagogue ti Satan, ala so atene ala yeke aJuif, andâ ala yeke aJuif pëpe, me ala yeke azo ti mvene . . . bâ, mbi yeke sara si ala ga na ala ba li ti ala na gbe ti mo na mbi yeke sara si ala hinga so mbi ndoye mo.
10 So mo bata tënë ti gbungo ngangu so mbi gbu, fade mbi nga mbi yeke bata mo na yâ ti ngbonga ti tara so ayeke ga na ndo ti sese kue so azo ayeke dä, ti tara azo so asara kodoro na ndo ti sese.
11 Mbi yeke ga fade fadeso. Ngbâ ti gbu ye so mo yeke na ni so ngangu, si mbeni zo amû couronne ti mo pëpe.
12 “ ‘Zo so asö benda, fade mbi yeke sara si lo ga mbeni pilier na yâ ti temple ti Nzapa ti mbi, fade lo yeke sigigi na yâ ni lâ oko pëpe, fade mbi yeke sû na ndo ti lo iri ti Nzapa ti mbi na iri ti gbata ti Nzapa ti mbi, fini Jérusalem, so alondo na Nzapa ti mbi na yayu si ayeke zu, nga na fini iri ti mbi.
13 Zia zo so ayeke na mê amä ye so yingo atene na acongrégation.’
14 “Sû mbeti na ange ti congrégation so ayeke na Laodicée, mo tene: Bâ aye so Amen, lo so lo yeke témoin so ayeke be-ta-zo si ayeke tene gi tâ tënë, lo so lo yeke tongo nda ti aye so Nzapa asara, atene la:
15 ‘Mbi hinga aye so mo sara, mbi hinga so mo yeke dê pëpe nga mo yeke wâ pëpe. Mbi ye fade si mo yeke dê wala mo yeke wâ.
16 Tongaso, so mo yeke wâ gi kete nga mo yeke wâ pëpe wala dê pëpe so, mbi yeke dë mo na yanga ti mbi na gigi.
17 So mo tene: “Mbi yeke zo ti mosoro, mbi wara amosoro na mbi yeke na bezoin ti mbeni ye oko pëpe,” me mo hinga pëpe so pasi ti mo ahon ndo ni, mawa ti mo ayeke mingi, mo yeke wayere, mo yeke waziba nga tere ti mo ayeke senge,
18 mbi wa mo ti vo na tïtî mbi lor so a tö ni na wâ si a zi saleté ni awe, si mo ga zo ti mosoro; mbi wa mo nga ti vo na tïtî mbi avuru bongo ti ndo ni si mo yü bongo na a bâ kamene ti mo pëpe ndali ti so tere ti mo ayeke senge; mbi wa mo ti vo na tïtî mbi yorö ti lê ti zia na lê ti mo si mo bâ ndo.
19 “ ‘Azo kue so mbi ye ala mingi, mbi suku na ala nga mbi se ala. Tongaso yapu na sarango ye nga changé bê ti mo.
20 Bâ, mbi luti na yanga-da na mbi yeke pika ni. Tongana mbeni zo amä go ti mbi na lo zi yanga-da ni, mbi yeke lï na da ti lo nga mbi yeke te kobe ti lakui legeoko na lo, na lo nga lo yeke te legeoko na mbi.
21 Zo so asö benda, fade mbi yeke mû lege na lo ti duti legeoko na mbi na ndo ti trône ti mbi, gi tongana ti so mbi kue mbi sö benda si mbi duti legeoko na Babâ ti mbi na ndo ti trône ti lo.
22 Zia zo so ayeke na mê amä ye so yingo atene na acongrégation.’ ”
