Apocalypse 5:1-14
5 Na pekoni, mbi bâ mbeni mbeti so a rulê ni rulengo. Lo so aduti na ndo ti trône ni agbu mbeti ni na yâ ti maboko ti lo ti koli. A sû tënë na lê ti mbeti ni na yâ ni nga na peko ni na a kanga ni ngangu si a kpo anzoroko mbasambala na ndo ni.
2 Mbi bâ mbeni ngangu ange so ato mbela na kota go atene: “Zo wa si akpa ti zi yâ ti mbeti so a rulê ni rulengo so nga ti zi anzoroko ti mbeti ni?”
3 Me atâa na yayu, na ndo ti sese nga na gbe ti sese, mbeni zo ayeke dä pëpe so alingbi ti zi yâ ti mbeti ni wala ti bâ ndo na yâ ni.
4 Na mbi tï na kota toto ngbanga ti so a wara mbeni zo oko pëpe so akpa ti zi yâ ti mbeti ni wala ti bâ ndo na yâ ni.
5 Me mbeni ancien ni oko atene na mbi: “Kaï toto ni. Bâ, bamara so ayeke ti kete mara ti Juda, gunda ti David, asö benda awe ti zi yâ ti mbeti ni nga na anzoroko mbasambala ni.”
6 Na pekoni, mbi bâ mbeni molenge ti ngasangbaga so mo bâ mo tene a fâ lo awe aluti na bê ti trône ni na popo ti acréature osio so ayeke na fini nga na popo ti a-ancien ni. Lo yeke na adidi mbasambala nga na alê mbasambala, alê ti lo ni aduti fä ti ayingo mbasambala ti Nzapa so a tokua ala na ndo ti sese kue.
7 Lo gue, na hio lo mû mbeti ni so Lo so aduti na ndo ti trône agbu na yâ ti maboko ti lo ti koli.
8 Tongana lo mû mbeti ni awe, acréature osio so ayeke na fini nga na a-ancien bale-use na osio atï na gbe ti Molenge ti ngasangbaga ni, zo oko oko ayeke na kundi nga na akete dû ti sembe ti lor so dukani asi yâ ni, na dukani ni aduti fä ti asambela ti azo so ayeke nzoni-kue.
9 Ala he mbeni fini bia, ala tene: “Mo lingbi awe ti mû mbeti so a rulê ni rulengo so na ti zi anzoroko ni, ngbanga ti so a fâ mo awe na mo vo na mênë ti mo azo na Nzapa, azo ti kete mara kue, azo ti yanga ti kodoro kue, azo ti kodoro kue nga na azo ti amara kue,
10 na mo sara si ala ga mbeni royaume na aprêtre ti Nzapa ti e, na ala yeke komande tongana agbia na ndo ti sese.”
11 Mbi bâ ndo, na mbi mä go ti a-ange mingi so angoro tere ti trône ni, na acréature so ayeke na fini nga na a-ancien ni, na wungo ti ala ayeke gbani gbani nga saki na saki,
12 so asara tënë na kota go, a tene: “Molenge ti ngasangbaga so a fâ lo ândö alingbi awe ti tene lo wara ngangu, mosoro, ndara, kode ti sarango na ye, gonda, gloire nga na tënë nzoni.”
13 Na pekoni, mbi mä acréature kue so ayeke na yayu, na ndo ti sese, na gbe ti sese, na lê ti ngu-ingo nga na aye kue so ayeke na yâ ti aye so, a tene: “Zia a iri tënë nzoni, a mû gonda, gloire na ngangu na Lo so aduti na ndo ti trône nga na Molenge ti ngasangbaga ni teti lakue lakue nga kpu na kpu.”
14 Acréature osio so ayeke na fini atene: “Amen!” nga a-ancien ni akuku na likuni ti ala na ala voro Nzapa.
