Apocalypse 6:1-17
6 Mbi bâ ndo na ngoi so Molenge ti ngasangbaga ni azi mbeni oko ti anzoroko mbasambala ni, na mbi mä mbeni oko ti acréature osio so ayeke na fini asara tënë na mbeni go so atoto tongana bekpa, lo tene: “Ga!”
2 Mbi bâ ndo, na bâ, mbeni vuru mbarata! Zo so aduti na ndo ti mbarata ni ayeke na gindi; na a mû na lo mbeni couronne, lo sigigi ti sö benda ti gue na ni nga ti hunzi songo benda ni.
3 Tongana lo zi use nzoroko ni, mbi mä use créature ni so ayeke na fini atene: “Ga!”
4 Mbeni mbarata ni asigigi, tere ti lo abe tongana wâ; a mû lege na zo so aduti na ndo ti lo ti zi siriri na ndo ti sese si ala fâ tere na popo ti ala; na a mû na lo mbeni kota épée.
5 Tongana lo zi ota nzoroko ni, mbi mä ota créature ni so ayeke na fini atene: “Ga!” Mbi bâ ndo, na bâ, mbeni vuko mbarata! Zo so aduti na ndo ti mbarata ni ayeke na kilo na maboko ti lo.
6 Na mbi mä mbeni go so, mo bâ mo tene a londo na popo ti acréature osio so, atene: “Kilo oko ti blé teti denier oko, na kilo ota ti orge teti denier oko; na mo buba mafuta ti olive nga na vin pëpe.”
7 Tongana lo zi osio nzoroko ni, mbi mä osio créature ni so ayeke na fini atene: “Ga!”
8 Mbi bâ ndo, na bâ, mbeni mbarata so tere ti lo akpa ti nyama so kobela asara lo! Iri ti zo so aduti na ndo ti mbarata ni ayeke Kuâ. Hadès ayeke mû peko ti lo nduru nduru. Na a mû na ala komandema na ndo ti mbage oko ti sese na popo ti ambage osio, ti fâ azo na yongoro épée, na kota nzara, na sioni kobela ti fango zo nga na lege ti anyama ti ngonda ti sese.
9 Tongana lo zi oku nzoroko ni, mbi bâ na gbe ti gbalaka ni a-âme ti ala so a fâ ala ngbanga ti tënë ti Nzapa nga ngbanga ti kusala ti fango tënë so ala sara giriri.
10 Na ala dekongo na kota go, ala tene: “Seigneur ti dunia kue so mo yeke nzoni-kue si mo yeke tene gi tâ tënë, juska lawa si mo yeke gbanzi tere ti mo ti fâ ngbanga na ti futa kula ti mênë ti e na ndo ti azo so asara kodoro na ndo ti sese?”
11 Na a mû yongoro vuru bongo na ala oko oko kue; na a tene na ala ti wu tere ti ala kete, juska wungo ti amba ti ala angbâa nga na aita ti ala so azo aga nduru ti fâ ala, tongana ti so a fâ nga ala lani so, alingbi si.
12 Mbi bâ ndo na ngoi so Molenge ti ngasangbaga azi omene nzoroko ni, na sese ayengi ngangu mingi; lâ avuko tongana vuko bongo ti fungo na asac, na lê ti nze kue abe tongana mênë,
13 na atongoro ti yayu atï na sese, mo bâ mo tene keke ti figue so kota pupu ayengi ni si akpikpii lê ni atuku.
14 Na yayu ahon mo bâ mo tene mbeni mbeti la si zo ayeke rulê ni, na a zi ahoto nga azoa kue na ndo so ala yeke dä.
15 Na agbia ti sese, akota zo, amokonzi ti aturugu, azo ti mosoro, angangu zo, angbâa kue nga na azo kue so ayeke angbâa pëpe ahonde tere ti ala na yâ ti adû ti tênë nga na gbe ti akota tênë ti ahoto.
16 Ala yeke tene na ahoto nga na akota tênë ni, ala tene: “ALA tï na ndo ti e na ALA honde e na lê ti Lo so aduti na ndo ti trône nga na lê ti ngonzo ti Molenge ti ngasangbaga,
17 ngbanga ti so kota lango ti ngonzo ti ala asi awe, na zo wa si alingbi ti gbu lê ni, zo wa?”
