Apocalypse 9:1-21
9 Na pekoni, oku ange ni ahuru trompette ti lo. Mbi bâ mbeni tongoro so alondo na yayu atï na sese, na a mû na lo kelele ti kota dû so alï mingi.
2 Na lo zi yanga ti kota dû ni so alï mingi so, na guru alondo na yâ ti dû ni amontê mo bâ mo tene guru ti wâ ti mbeni kota four, na guru ti dû ni avuko lê ti lâ nga avuko yâ ti pupu.
3 Na agbadora asigigi na yâ ti guru ni ala mû ndo ti sese; na a mû na ala komandema, mara ti komandema so akpalakongo ti sese ayeke na ni.
4 A tene na ala ti sara sioni oko pëpe na ngonda ti sese, wala na afini pere wala na mbeni keke oko pëpe, me gi na azo so ayeke na nzoroko ti Nzapa na ndo ti lê ti ala pëpe so.
5 Na a mû lege na agbadora ni ti fâ azo so pëpe, me ti sara pasi na ala teti nze oku, na pasi ni so ayeke na ndo ti ala ayeke tongana pasi so mbeni zo ayeke bâ na ngoi so kpalakongo akpo lo.
6 Na yâ ti alango ni so, fade azo ni ayeke gi kuâ, me ala yeke wara ni oko pëpe, na ala yeke duti na nzara ti kui, me kuâ ni ayeke kpe gi ala kpengo.
7 Na agbadora ni akpa ambarata so a leke ala ti sara bira; na ndo ti li ti ala, mbeni ye tongana couronne ti lor ayeke dä, na lê ti ala akpa ti zo,
8 me ala yeke na kuä ti li so ayeke tongana kuä ti li ti awali. Na pembe ti ala ayeke tongana pembe ti abamara;
9 ala yü mbeni ye tongana bongo ti wen na kate ti ala. Na toto ti kpangbi ti ala ayeke tongana toto ti gere ti apuse so gbâ ti ambarata agboto ni si akpe loro ti gue na bira.
10 Nga, ala yeke na damba nga na kî so akpa ti akpalakongo; na a mû komandema na damba ti ala ti sara sioni na azo teti nze oku.
11 Mbeni gbia ayeke na ndo ti ala, ange ti kota dû so alï mingi. Na yanga ti Hébreu, iri ti lo ayeke Abaddon, me na yanga ti Grec iri ti lo ayeke Apollyon.
12 Mbeni mawa ni oko ahon awe. Bâ, ambeni use ayeke ga na peko ti aye so.
13 Omene ange ni ahuru trompette ti lo. Na mbi mä mbeni go so alondo na adidi ti gbalaka ti lor so ayeke na gbele Nzapa,
14 go ni atene na omene ange ni, so ayeke fade na trompette, lo tene: “Zi a-ange osio so a kanga ala na tere ti kota ngu ti Euphrate.”
15 Na a zi a-ange osio so, so a leke ala ndali ti ngbonga ni na lango ni, nze ni nga na ngu ni, ti fâ zo oko na popo ti azo ota.
16 Na mbi mä wungo ti aturugu so ayeke kpe na ambarata so: a yeke kutu ngbangbo use.
17 Ambarata ni na azo so ayeke kpe na ala so mbi bâ na yâ ti ye so ayeke tongana suma so ayeke tongaso: Tere ti bongo ti wen so ala yü na kate ti ala abê tongana lê ti wâ, a yeke tongana lê ti nduzu nga a yeke kambiri tongana soufre; li ti ambarata ni ayeke tongana li ti abamara; wâ, guru na soufre ayeke sigigi na yanga ti ala.
18 A fâ zo oko na popo ti azo ota na lege ti asioni ye ota so: wâ, guru nga na soufre ni so asigigi na yanga ti ala.
19 Na ngangu ti ambarata ni ayeke na yâ ti yanga ti ala nga na yâ ti damba ti ala; teti adamba ti ala ayeke tongana angbo na ali ni ayeke dä, na ala yeke sara sioni na azo na ni.
20 Me ti tanga ti azo ni so asioni ye so afâ ala pëpe, ala changé bê ti ala pëpe ti zia lege ti akusala ti maboko ti ala, tongaso si ala voro pëpe asioni yingo, ayanda so a sara ni na lor, na argent na gengere na tênë nga na keke, so alingbi ti bâ ndo pëpe, ti mä ndo pëpe nga ti tambela pëpe;
21 na ala changé bê ti ala pëpe ti zia lege ti fango zo so ala yeke fâ, sarango yorö so ala yeke sara, lango-sioni so ala yeke sara nga na nzi so ala yeke nzi.
