aRomain 1:1-32
1 Mbi Paul, ngbâa ti Jésus Christ, mbi so a iri mbi ti ga bazengele nga a zia mbi nde ti fa nzoni tënë ti Nzapa;
2 nzoni tënë so lo mû zendo ni ândö giriri na lege ti aprophète ti lo na yâ ti aMbeti so ayeke nzoni-kue
3 nga na ndo ti Molenge ti lo so, na lege ti mitele, asigigi na yâ ti ngongoa ti David,
4 me so na lege ti ngangu a mû lo ti ga Molenge ti Nzapa na lege ti yingo so ayeke nzoni-kue na zingongo lo na kuâ, lo Jésus Christ Seigneur ti e.
5 Lo so na lege ti lo e wara kota nzobe nga na kusala ti bazengele, tongaso si mango yanga na lege ti mabe aduti na popo ti amara kue ndali ti iri ti lo;
6 a yeke na popo ti amara so si a iri ALA nga ti ga azo so ayeke ti Jésus Christ.
7 Mbi sû mbeti so na ala kue so ayeke na Rome tongana azo so Nzapa andoye ala mingi, so a iri ala ti duti azo so ayeke nzoni-kue:
Zia kota nzobe na siriri so alondo na Nzapa Babâ ti e nga na Seigneur Jésus Christ aduti na ALA.
8 Kozoni kue, mbi kiri singila na Nzapa na lege ti Jésus Christ ndali ti ALA kue, ngbanga ti so a yeke sara tënë ti mabe ti ALA na yâ ti dunia kue.
9 Teti Nzapa, so na bê ti mbi kue mbi yeke sara kusala so ayeke nzoni-kue na lo na lege ti fango nzoni tënë na ndo ti Molenge ti lo, ayeke témoin ti mbi so mbi zia lâ oko pëpe ti sara tënë ti ALA na yâ ti asambela ti mbi,
10 mbi hunda mingi ti tene tongana lege ayeke dä, na tongana Nzapa aye, mbi wara lege ti si na ALA kâ.
11 Teti mbi yeke na nzara mingi ti bâ ALA, si mbi mû na ALA mbeni matabisi ti yingo ti tene a sara si ALA kpengba,
12 wala ti tene e kpengba tere na popo ti e, e oko oko e kpengba na lege ti mabe ti mba, mabe ti ALA na ti mbi nga.
13 Me aita, mbi ye si ALA hinga so fani mingi mbi leke na bê ti mbi ti si na ALA, tongaso si mbi lingbi ti wara ambeni lengo na popo ti ALA tongana ti so mbi wara na popo ti tanga ti amara, me a kanga lege na mbi juska fadeso.
14 Mbi yeke na kuda na li ti mbi, kuda ti aGrec na ti aWande, ti awandara na ti azo so amanda ye pëpe:
15 ndani la mbi yeke tâ na kota nzara ti fa nzoni tënë nga na ALA kâ na Rome.
16 Teti mbi yeke na kamene ti nzoni tënë pëpe. Biani, nzoni tënë so ayeke ngangu ti Nzapa ndali ti salut ti zo kue so ayeke na mabe, salut ti Juif kozoni na ti Grec nga.
17 Teti na lege ti nzoni tënë ni, a ngbâ ti fa mbilimbili ti Nzapa na gigi. Ye so asi ndali ti mabe nga ti maï mabe, gi tongana ti so a sû na Mbeti ti Nzapa, a tene: “Me ti zo so ayeke mbilimbili, fade lo yeke duti na fini na lege ti mabe.”
18 Teti ngonzo ti Nzapa alondo na yayu ti ga na tere ti asarango ye kue so ayeke nde na ye so Nzapa aye nga na aye kue so ayeke mbilimbili pëpe ti azo so ayeke pete ndo ti tâ tënë na mbeni lege so ayeke mbilimbili pëpe,
19 ngbanga ti ye so zo alingbi ti hinga na ndo ti Nzapa asigigi polele na popo ti ala, teti Nzapa asara si a duti polele na lê ti ala.
20 Teti asarango ye ti tere ti Nzapa so lê abâ ni pëpe asigigi polele ngbene ye so a leke dunia ti ga na ni, ngbanga ti so a bâ ni na lege ti aye so lo sara, so ti tene ngangu ti lo so ayeke lakue lakue na dutingo ti lo tongana Nzapa, si a lingbi ti wara mbeni raison oko pëpe ti zi tënë na li ti ala.
21 Teti, atâa so ala hinga Nzapa, ala mû gloire na lo pëpe tongana lo so ayeke Nzapa nga ala kiri singila na lo pëpe, me sarango tënë ti ala afa so yâ ti li ti ala ayeke senge nga bê ti ala so hingango ndo amanke ni aga bingo.
22 Atâa so ala tene ala yeke awandara, ala ga awabuba
23 na ala changé gloire ti Nzapa, lo so tere ti lo alingbi ti buba pëpe, ti ga mbeni ye tongana image ti zo so tere ti lo alingbi ti buba, ti andeke, ti anyama ti gere osio nga na ti anyama so ayeke hara harango.
24 Ni la, ti lingbi na anzara ti bê ti ala, Nzapa azia ala ti duti na yâ ti sioni ye, si ala lingbi ti sara ye ti kamene na tere ti ala wani.
25 A yeke a-oko zo so amû tâ tënë ti Nzapa achangé ni na mvene na so amû gonda nga avoro aye so Nzapa asara ahon ti sara na Lo so aleke aye ni, lo so a yeke gonda lo lakue lakue. Amen.
26 Ndani la si Nzapa azia ala na anzara ti tere ti ala so ayeke ye ti kamene, teti awali so ayeke na popo ti ala azia lege ti ye so a leke tere ti ala ndali ni na ala sara ye so ague nde na ti so Nzapa aleke.
27 Legeoko nga, même akoli ni azia lege ti awali so Nzapa aleke ndali ti ala, na nzara ti tere ti ala aza wâ ngangu na tere ti amba ti ala, akoli na akoli, ala yeke sara ye ti kamene na ala yeke wara na yâ ti tere ti ala wani futa kue ti peko ti aye so ala sara a lingbi na girisango lege ti ala.
28 Na gi tongana ti so ala yeda pëpe ti hinga Nzapa tâ nzoni, Nzapa azia ala ti duti na mbeni bango ndo so anzere na lo pëpe, ti sara aye so akpa pëpe,
29 ala si singo na ye kue so ayeke mbilimbili pëpe, ye ti sioni kue, sarango bê ti ye kue, sioni bê kue, nga bê ti ala asi singo na kota bê, fango zo, tiri, handa, yengo gi ti sara mbana na zo, ala yeke azo ti dikongo atënë na gbe ti go na mê ti mba ti ala,
30 azo ti dikongo asioni tënë na tere ti zo, azo ti kengo Nzapa, azo ti sioni yanga, azo ti baba, azo ti pikango kate, azo ti sigingo na akode ti sarango sioni, azo ti mango yanga ti babâ na mama ti ala pëpe,
31 azo so hingango ndo amanke ala, azo so asara ye alingbi na azendo ti ala pëpe, azo so aye amba ti ala zo pëpe, azo so ayeke sara nzoni bê na zo pëpe.
32 Atâa so azo so ahinga nzoni mingi mbilimbili mbela ti Nzapa, mbela so atene ala so angbâ ti sara aye tongaso alingbi na kuâ, azo so angbâ gi pëpe ti sara aye so, me nga ala yeda na azo so angbâ ti sara ni.
