aRomain 11:1-36
11 Tongaso mbi hunda ndo, mbi tene: Nzapa ake azo ti lo awe? Zia ye tongaso asi lâ oko pëpe! Teti mbi kue mbi yeke mbeni zo ti Israël, mbi yeke ti ngongoa ti Abraham, na ti kete mara ti Benjamin.
2 Nzapa ake azo ti lo pëpe, ala so lo hinga ala kozoni. Na ngoi so Élie adema na Nzapa ndali ti sarango ye ti azo ti Israël, ALA hinga ye so Mbeti ti Nzapa atene na ndo ti lo pëpe? Lo tene:
3 “Jéhovah, ala fâ aprophète ti mo, ala kungbi agbalaka ti mo, gi mbi oko si mbi ngbâ, na ala yeke gi âme ti mbi.”
4 Me Nzapa akiri tënë wa na lo? Nzapa atene: “Mbi zia ndali ti mbi akoli saki mbasambala so akuku na likuni ti ala na gbe ti Baal pëpe.”
5 Legeoko nga, na ngoi ti fadeso, mbeni tanga ti azo nga angbâ a lingbi na sorongo ye so Nzapa asoro ndali ti kota nzobe ti lo.
6 Tongana a yeke na lege ti kota nzobe ti Nzapa, a yeke na lege ti akusala mbeni pëpe. Tongana fade a yeke na lege ti akusala, ka kota nzobe ti Nzapa ni ayeke duti kota nzobe mbeni pëpe.
7 Tongaso, e tene nyen? Même ye so Israël ayeke gi gingo na nzara ni, lo wara pëpe, me ala so a soro ala awara ni. Me tanga ti azo ni, bê ti ala akpengba.
8 Legeoko tongana ti so a sû na Mbeti ti Nzapa, a tene: “Nzapa amû na ala yingo ti kota lango, na lo mû na ala lê si ala bâ ndo pëpe nga mê si ala mä ndo pëpe, juska laso.”
9 Nga, David atene: “Zia table ti ala aga mbeni kûkû nga mbeni gbanda ndali ti ala, mbeni tênë so ala pika gere ti ala dä nga mbeni futa ti peko ti tambela ti ala.
10 Zia lê ti ala avuko si ala bâ ndo pëpe, na zia mo sara si peko ti ala aba bango lakue.”
11 Tongaso mbi hunda ndo, mbi tene: Ala pika gere ti ala si ala tï biani biani awe? Zia ye tongaso asi lâ oko pëpe! Me ndali ti pikango gere ti ala ni, azo ti amara awara salut, na ye so apusu ala ti sara mbanda.
12 Asinga so pikango gere ti ala aga na mosoro na dunia so, nga wungo ti ala so akiri na gbe ni aga na mosoro na azo ti amara, si fade wungo ti ala kue ayeke ga na mosoro mingi pëpe?
13 Fadeso mbi yeke sara tënë na ALA, ALA so ayeke azo ti amara. Teti so mbi yeke biani mbeni bazengele ti amara nde, mbi yeke gonda kusala ti mbi
14 tongana mbi lingbi na alege kue ti pusu ala so ayeke ti mara ti mbi ti sara mbanda nga ti sö ambeni na popo ti ala.
15 Teti tongana kengo ala asara si dunia akiri asara songo na Nzapa, fade yambango ala aye ti tene ande nyen? a ye ti tene so ala yeke na fini na popo ti akuâ.
16 Tongana mbage ti mengo farine so a mû tongana kozo li ti ye ayeke nzoni-kue, tanga ti mengo farine ni kue ayeke nzoni-kue nga. Na tongana gunda ti keke ni ayeke nzoni-kue, amaboko ti keke ni ayeke nzoni-kue nga.
17 Ye oko, tongana a fâ ambeni maboko ti keke ni, na mo, atâa so mo yeke keke ti olive ti ngonda, a mû mo a greffé mo na tere ti ala na mo yeke bâ nzoni ndali ti aye ti nzoni so alondo na yâ ti gunda ti keke ti olive ni,
18 mo pika kate ti mo pëpe ndali ti amaboko ti keke ni. Tongana mo yeke pika kate ti mo ndali ti ala, zia na li ti mo so a yeke mo si mo yô gunda ti keke ni pëpe, me gunda ti keke ni si ayô mo.
19 Mo yeke tene ande mo tene: “A fâ ambeni maboko ti keke ni si a greffé mbi na tere ni.”
20 Tâ tënë! A dë ala ndali ti so mabe amanke ala, me mo, mo yeke luti ndali ti mabe. Mo zia ti sara wuma, me duti na mbeto.
21 So Nzapa abata atâ maboko ti keke ni pëpe so, fade lo yeke bata mo nga pëpe.
22 Tongaso, bâ lege so Nzapa ayeke sara nzoni na zo nga lege so lo yeke son na ni. Lo son songo na ndo ti ala so atï, me Nzapa ayeke sara nzoni na mo, gi tongana mo lingbi lakue ti tene lo sara nzoni na mo, tongaso pëpe, mo nga kue a yeke dë mo ande na sese.
23 Azo so nga kue, tongana ala ngbâ pëpe na yâ ti mabe so amanke ala, fade a yeke greffé ala na tere ti keke ni, teti Nzapa alingbi ti kiri ti greffé ala dä.
24 Asinga so a dë mo na tere ti keke ti olive ni so ayeke ti lo ti ngonda na a greffé mo na tere ti keke ti olive ti kodoro, atâa so a lingbi fade ti sara tongaso pëpe, si fade a greffé ala so ayeke ti keke ti olive ti kodoro ni na tere ti keke ti olive ti ala wani pëpe?
25 Aita, mbi ye si ALA hinga ye na ndo ti tënë so Nzapa ahonde nda ni, tongaso si ALA bâ tere ti ALA wani pëpe tongana azo so ayeke sara ye na ndara: ye so asi ayeke so bê ti ambeni zo ti Israël akpengba juska wungo ti azo ti amara nde kue aga alï,
26 na a yeke tongaso si a yeke sö ande Israël ni kue. Legeoko tongana ti so a sû na Mbeti ti Nzapa, a tene: “Zo ti zingo azo ayeke londo ande na Sion si aga na lo yeke zi yongoro na tere ti amolenge ti Jacob asarango ye ti azo so akpe Nzapa pëpe.
27 Bâ, so ayeke mbele so mbi te na ala na ngoi so mbi yeke zi asiokpari ti ala.”
28 Ti tâ tënë ni, tongana a ndu tënë ti nzoni tënë, azo so aga awato ti Nzapa ndali ti ALA. Me tongana a ndu tënë ti sorongo ye so Nzapa asoro, ala yeke azo so Nzapa andoye ala mingi ndali ti akotara ti ala.
29 Teti amatabisi ti Nzapa nga na iringo ndo ti lo ayeke aye so lo yeke wara vundu ndali ni pëpe.
30 Teti legeoko tongana ALA, ALA ke yanga ti Nzapa lani, me fadeso a sara nzoni bê na ALA ndali ti kengo yanga so azo so ake,
31 tongaso nga azo so ake yanga fadeso, na ye ti pekoni ayeke so a sara nzoni bê na ALA, tongaso si a sara nzoni bê na azo so nga.
32 Teti Nzapa akanga ala kue legeoko na yâ ti kengo yanga, tongaso si lo sara nzoni bê na ala kue.
33 Bâ, tongana nyen mosoro ti Nzapa, ndara ti lo na hingango ye ti lo ayeke kota! Biani, zo alingbi ti gi nda ti afango ngbanga ti lo pëpe, zo alingbi nga ti hinga alege ti lo kue pëpe.
34 Teti “zo wa si ahinga bibe ti Jéhovah, wala zo wa si aga zo ti mungo wango na lo?”
35 Wala “zo wa si amû li ni kozo ti mû ye na lo, tongaso si lo kiri lo futa ni na zo ni?”
36 Aye kue alondo na lo, ayeke na lege ti lo na ayeke ti lo. Zia a mû na lo gloire lakue lakue. Amen.
