aRomain 2:1-29
2 Tongaso, mo zo, atâa mo yeke zo wa, raison ayeke dä pëpe ti zi tënë na li ti mo tongana mo fâ ngbanga na li ti mbeni zo. Teti na ndo ti ye so mo yeke fâ ngbanga na li ti mba ti mo dä, mo yeke fâ ngbanga na li ti mo wani, ndali ti so mo so mo yeke fâ ngbanga ni, mo kue mo ngbâ ti sara a-oko ye ni so.
2 E hinga so ngbanga ti Nzapa ayeke na ndo ti ala so angbâ ti sara aye so, na fango ngbanga ni ague oko na tâ tënë.
3 Mo zo, tongana mo fâ ngbanga na li ti ala so angbâ ti sara aye so, me mo kue mo yeke sara aye ni so, mo bâ ti mo mo tene mo yeke kpe ande ngbanga ti Nzapa?
4 Wala mo yeke bâ na nene ni pëpe amosoro ti nzoni ye so lo yeke sara na zo, ti kangango bê ti lo ti ku nga na ti bê ti lo so ason hio hio pëpe? Mo hinga pëpe so nzobe ti Nzapa ayeke gi ti gue na mo ti changé bê ti mo?
5 Me a lingbi na kpengbango li ti mo nga na bê ti mo so aye ti changé pëpe, mo yeke iri ngonzo na ndo ti mo wani na lango ti ngonzo na ti fango na gigi ngbanga ti Nzapa so ayeke mbilimbili.
6 Na fade lo futa zo oko oko alingbi na akusala ti lo:
7 fini ti lakue lakue na ala so ayeke gi gloire, yango iri nga na tere so alingbi ti buba pëpe na lege ti gbungo ngangu na yâ ti kusala so ayeke nzoni.
8 Ye oko, ti ala so aye papa nga ake ti mä tâ tënë me amä gi ye so ayeke mbilimbili pëpe, fade songo bê nga na ngonzo ayeke londo na tere ti ala.
9 Fade ye ti vundu na ye ti mawa ayeke tï na ndo ti âme ti zo oko oko kue so asara ye so ayeke sioni, ti Juif kozoni na ti Grec nga.
10 Me fade gloire, yango iri na siriri ayeke teti zo kue so asara ye ti nzoni, teti Juif kozoni na teti Grec nga.
11 Teti Nzapa ayeke sara kangbi na popo ti azo oko pëpe.
12 Na tapande, azo kue so asara siokpari na ngoi so ndia ayeke dä pëpe, fade ala yeke kui atâa so ndia ayeke dä pëpe. Me ala kue so ayeke na gbe ti ndia si asara siokpari, fade a fâ ngbanga ti ala na lege ti ndia.
13 Teti a yeke pëpe azo so ayeke mä tënë ti ndia gi na mê si ayeke mbilimbili na lê ti Nzapa, me a yeke ala so ayeke azo ti kpengo ndia ni si a yeke diko ala ande tongana azo ti mbilimbili.
14 Teti tongana azo ti amara so ayeke na ndia pëpe ayeke sara aye ti ndia gi na bê ti ala wani, azo so, atâa so ala yeke na ndia pëpe, ala wani ayeke ndia ti ala.
15 Ala yeke azo so afa na gigi so a sû tënë ti ndia na yâ ti bê ti ala, na oko ngoi ni yingo-ti-hinga ti ala ayeke sara tënë ti témoin na ala, nga atënë so ayeke tambela na yâ ti li ti ala wani ayeke bi tënë na li ti ala wala ayeke zi tënë na li ti ala.
16 Ye so ayeke si ande na lango so Nzapa, na lege ti Christ Jésus, ayeke fâ ngbanga ti aye so azo ahonde ni, a lingbi na nzoni tënë so mbi yeke fa.
17 Tongana mo tene mo yeke Juif si mo yeke zia bê ti mo na ndo ti ndia nga mo yeke pika kate ti mo na ndo ti songo ti mo na Nzapa,
18 na mo hinga ye so bê ti lo aye nga mo yeda na aye so ayeke nzoni mingi teti a fa na mo tënë ti Ndia na yanga,
19 na mo hinga na bê ti mo biani so mo yeke mbeni zo so ayeke fa lege na awaziba, mo yeke mbeni lumière teti ala so ayeke na yâ ti bingo,
20 mo yeke mbeni zo ti kiringo na azo so ahinga ndo pëpe na nzoni lege, mo yeke mbeni wafango ye na akete molenge na mo yeke na kozo hingango ye nga na tâ tënë so ayeke na yâ ti Ndia,
21 mo so mo yeke fa ye na mbeni zo, mo fa ye na mo wani pëpe? Mo so mo yeke fa tënë, mo tene: “Mo nzi ye pëpe”, mo yeke nzi ye?
22 Mo so mo yeke tene: “Mo gi wali wala koli nde pëpe”, mo yeke gi wali wala koli nde? Mo so mo yeke fa na lê ti azo so mo ke ayanda tâ na bê ti mo oko, mo yeke gbu aye ti yâ ti atemple na ngangu?
23 Mo so mo yeke pika kate na ndo ti ndia, na lege ti dorongo Ndia mo yeke bi kamene na lê ti Nzapa?
24 Bâ, “ndali ti ALA, zonga ayeke ga na ndo ti iri ti Nzapa na popo ti azo ti amara”, gi tongana ti so a sû na Mbeti ti Nzapa.
25 Biani, nzoni ti fango ganza ayeke dä gi tongana mo ngbâ ti bata ndia. Me tongana mo yeke mbeni zo so ayeke doro ndia, fango ganza ti mo aga fango ganza pëpe.
26 Tongaso, tongana mbeni zo so afâ ganza pëpe angbâ ti bata aye so ayeke mbilimbili na so Ndia ahunda na zo ti sara, atâa so lo fâ ganza pëpe, a yeke bâ lo tongana zo so afâ ganza awe, ni la pëpe?
27 Na zo so ayeke zo ti mara nde so lo fâ ganza pëpe, tongana lo yeke sara ye alingbi na Ndia, lo yeke fâ ngbanga na li ti mo, mo so mo yeke na mbeti ti andia nga so mo fâ ganza awe, me mo yeke mbeni zo so adoro ndia.
28 Teti zo so ayeke Juif ayeke pëpe lo so ayeke Juif na gigi, nga fango ganza ayeke pëpe ti gigi, so a sara ni na ndo ti poro ti tere ti zo.
29 Me zo so ayeke Juif ayeke lo so ayeke Juif na yâ ni, na fango ganza ti lo ayeke fango ganza ti bê na lege ti yingo, me na lege ti mbeni mbeti ti andia pëpe. Gonda ti zo tongaso alondo na azo pëpe, me a londo na Nzapa.
